KoVafilipi 3:1-21
3 Vakwetu, yipo nye asi twikireni kuhafa mwaHompa. Ame nokufa si unye kumutjangera hena yininke eyi na mu tjangerere nare morwa ayo ngayi mu popera.
2 Takameseni kovantu ava va kara ngwendi nombwa* nava ava rugana yininke yoyidona ntani nava va hara asi va mu rugane yovamba.
3 Yeeyi ose nyose twa kara novamba zousili ntani ose kukarera Karunga nevatero lyompepo zendi, ose kulikangangera eyi ga rugana Jesus Kristusa ntani kapi twa huguvara mweyi va huguvara vantu.
4 Nye nsene pweli ogu ana hara kulikanganga morwa kuhuguvara mweyi va huguvara vantu, ame na mu pita, yeeyi ame yinzi yokuvhura kulikangangera:
5 Ame kwa rugene nge yovamba mezuva lyauntantatu, ame gomomuhoko goVaisraeli, gemezimo lyaMbenyameni, ame Muhebeli ntani vakondi vange nawo Vahebeli, ame Mufalisayi ogu nga kwama Veta,
6 ame ngani hepeke unene mbungakriste ntani ame kwa yi likidire asi ame mulimburukwi pokusikisa mo Veta.
7 Nye yininke eyi ya kere nomulyo kwange, ngesi ame kuyitara asi kwato mulyo* morwa Kristusa.
8 Ntani hena, ame yininke nayinye kuyitara asi kwato mulyo mokuyihetakanesa nediwo lyenene kuhamena Jesus Kristusa, Hompa gwange. Ame kwa siga nayinye mwarwendi ntani kuyitara asi yihando* tupu, yipo ni likwatakane naKristusa
9 ntani ni kare mouumwe nage. Kapi nina kutanta asi ame muhungami morwa kukwama Veta, nye morwa na pura mwaKristusa yiyo va hungameka nge. Yeeyi Karunga kutara ava va pura mwaKristusa asi va hungama.
10 Ame kwa hara kudiva Kristusa nononkondo devhumbuko lyendi ntani ni hepe nokufa ngwendi yige.
11 Ame kuyiruganena eyi yipo ni tare nsene asi kuvhura name ngani gwane evhumbuko lyokuhova lyovafe.
12 Kapi nina kutanta asi nina gwana nare mfeto ndi asi nina sikilire mo nye ame simpe kuna kukondja yipo ngani ka gwane mfeto ezi ga horowera nge Jesus Kristusa.
13 Vakwetu, kapi nina kugazara asi na gwana nare mfeto nye eyi nina diva yeyi asi: Ame na siga yininke yanare yiyo nina kukondjera yininke yokomeho.
14 Ame kuna kukondja ngani ka gwane mfeto. Mfeto ozo kuna kara kukaparukira meguru, Karunga nga zi gava kwava ga zigida kupitira mwaJesus Kristusa.
15 Yipo nye, ose ava tuna koro mepuro, tu gazareni kuliza noyininke eyi nina mu tantere nye nsene kapi omu gazara monkedi ezi, Karunga nga mu vatera mu gazare monkedi ezi.
16 Yi kare asi marunduruko musinke twa tura po, tu twikireni monkedi zokulifana.
17 Vakwetu, honeneni nge namuvenye ntani honeneni ava ava kwama sihonena esi twa mu tulira po.
18 Yeeyi vanzi ava ngani mu tantere, nye ngesi tani va mu tantere noruhodi, awo ngesi nonkore dositji* saKristusa.
19 Uhura wawo ezonauko ano karunga gwawo mazimo gawo, awo kulikangangera yininke yonomuga eyi ava rugana ntani awo kugazara tupu yininke yepevhu.
20 Nye ose vanamvharerwa vemeguru ntani ose kuna kundindira nononkondo muzowoli gwetu meguru, Hompa Jesus Kristusa.
21 Age nga ya rundurura marutu getu gokudira nonkondo ga kare ngwendi rutu rwendi rouyerere pokuruganesa nonkondo dononene edi va mu pa a pangere yininke nayinye.
Nonkango dokonhi
^ Kutanta asi ava va linyateka vene kosipara saKarunga morwa eyi ava rongo.
^ Ndi nampo asi “kwa yi siga nomutjima nagunye.”
^ Ndi “ndova.”
