KoVafilipi 4:1-23
4 Vakwetu, ame kwa mu hara ntani nina hara kumumona, one ruhafo rwange ntani nkata zange. Vakwetu wokuhara, monkedi ezi yimo nomu kora mwaHompa.
2 Tani korangeda Ewodiya naSintike asi ngano va lize kumwe momagazaro mwaHompa.
3 Tani ku hundire ngomurugani mukwetu asi o twikire kuvatera vakadi owo. Vakadi owo naKeremenisi ntani navamwe, kwa rugana* unene kumwe name mokuzuvhisa mbudi zongwa. Navenye madina gawo kwa ga tjanga mobuke zomwenyo.
4 Hafeni nkenye apa mwaHompa. Tani ruguruka mo hena asi hafeni!
5 Vantu navenye ngano va mone asi one vagomoki. Hompa pepi ga kara.
6 Mwa ha kara nosinka sankenye eyi, nye gaveni yinka yeni nayinye kwaKarunga mekanderero, kanderereni kwendi nomutjima nagunye oku tomu likwambere nokupandura.
7 Karunga makura nga mu pa mbili ezi ava dili kuvhura kukwata egano vantu, monkedi ezi, age nga takamesa nomutjima nomagazaro geni kupitira mwaJesus Kristusa.
8 Moruhura, vakwetu, gazareni* yininke yousili, yininke yomulyo, yininke youhunga, yininke yokukuhuka, yininke eyi ayi tumangeda eharo, yininke eyi ava fumadeke, yininke yoyiwa ntani yininke eyi ava pandadeke.
9 Kwameni eyi mwa lironga neyi mwa tambura neyi mwa zuvha ntani neyi mwa mona kwange, makura Karunga gombili nga kara none.
10 Ame nina hafa unene mwaHompa morwa muna kara hena nosinka kwange. Nampili ngomu mwa kere nosinka kwange, kapi mwa gwene mpito zokuvatera nge.
11 Kapi nina kuyiuyungira eyi morwa nina hepa yuma, yeeyi ame na lironga kukara yina gwanene nge po mwankenye ukaro.
12 Ame na diva kuparuka neyi yoyisesu ntani neyi yoyinzi. Mwanayinye ntani mwankenye ukaro, ame na lironga eyi va dira kudiva vantu wovanzi, yi kare asi nina kara nonondya ndi kwato, yi kare asi nina kara neyi yoyinzi ndi yoyisesu, ame kuyitambura.
13 Yeeyi ame kuvhura nayinye nononkondo dogu a pameke nge.
14 Nye one mwa rugana nawa pokuvatera nge momaudigu gange.
15 One Vafilipi none mwa yi diva asi apa mwa zuvhire mbudi zongwa sikando sokuhova, nyonelike mwa vaterere nge apa na katukire ni tunde moMakedoniya,
16 yeeyi apa na kere moTesaronika, one kwa tuminine nge eyi na hepere, kapisi sikando simwe tupu nye yikando yivali.
17 Kapisi asi uhwi nina hara nye ame kuna hara yirugana yeni yoyiwa yi ligwederere kosipara saKarunga.
18 Ame ngesi kwato eyi nina hepa, morwa eyi nina kara nayo yinzi unene. Ame na gwana eyi mwa tumina nge kwaEpafuraditusa. Eyi mwa tumina nge kwa kara ngwendi nzambo zedumba lyewa ezi azi zi Karunga komutjima.
19 Karunga nage nga mu pa nayinye eyi muna hepa kuliza nouyerere wendi wounzi kupitira mwaJesus Kristusa.
20 Karunga Guhyetu va mu yererepeke narunye nanarunye. Amen.
21 Kundisireni po vapongoki navenye ava va kara mouumwe naJesus Kristusa. Vapuli vakwetu ava nina kara nawo, vana mu kundisire po.
22 Vapongoki navenye, unene po womombara zahompa gwaRoma,* vana mu kundisire po.
23 Ngano nkenda zonene zaHompa Jesus Kristusa, zi kare none morwa one kwa kara nonkareso zongwa.
