KoVagarata 1:1-24
1 Mbilive ezi kuna kutunda kwange ame mupositoli Paurusa. Kwato ogu ga horowora nge ni kare mupositoli, nye Jesus Kristusa naKarunga Guhyetu ogu ga mu pindwire koufe, yiwo va horowora nge.
2 Ame Paurusa kumwe novapuli vakwetu kuna kutjangera nombungakriste domoGarata:
3 Karunga Guhyetu naHompa Jesus Kristusa ngano va mu fire nkenda unene nokumupa mbili.
4 Age kwa ligeve mwene morwa nonzo detu yipo a tu parure mouzuni* ou woudona moomu ga yi harera Karunga Guhyetu,
5 ogu ga fira kumuyererepeka narunye nanarunye. Amen.
6 Ame yina tetukisa nge asi muna sigi* nare Karunga ogu ga mu zigida kupitira monkenda zaKristusa zonene, mu hame kombudi zongwa zapeke.
7 Kapi pwa kara mbudi zongwa zapeke, nye poveli vamwe ava vana hara kumupukisa pokutjindja mbudi zongwa kuhamena Kristusa.
8 Nsene asi gumwe gwetu ndi muengeli gemeguru a mu zuvhisira mbudi zongwa za hana asi zeezi twa mu zuvhisira, va mu finge.
9 Ngwendi moomu katu yi uyunga nare, tani yi uyunga hena asi nkenye ogu ana kumuzuvhisira mbudi zongwa za hana asi zeezi mwa tambura, va mu finge.
10 Ame kuna hara kuhafesa vantu ndi Karunga? Nsene asi ame kuna hara kuhafesa vantu, kapi tani vhuru kukara mupika gwaKristusa.
11 Vakwetu, yeeyi ame kuna mu harere mu dive asi mbudi zongwa ezi na mu zuvhisira kapisi kovantu za tunda,
12 ndi asi ni zi gwane komuntu ndi asi va zi ronge nge, nye Jesus Kristusa yige ga zi horwera nge.
13 Mwa zuvha kuhamena nkareso zange apa na kere moukarelikarunga woVajuda, ame ngani hepeke unene mbungakriste zaKarunga noku hetekera ko kuzizonagura po.
14 Ame kwa litulire mo unene moukarelikarunga woVajuda kupitakana vakwetu womapupi gange womomuhoko gwetu ntani ame kwa kere noupampi konompo dozinyakurwetu.
15 Nye apa Karunga ogu ga ninka onane va hampuruke nge, ga zigidire nge kupitira monkenda zendi zonene, age kwa gazarere asi ayo yiwa
16 kuruganesa nge ni zuvhise mbudi zongwa kumuhamena konomuhoko, yipo va dive Munendi. Apa ga yi rugene eyi, ame kapi na pulire magano komuntu gongandi,
17 ndi asi ni ze koJerusarema kowo va hovere kukara vapositoli, nye ame kwa zire koArabiya makura tani tengura koDamasikusi.
18 Makura konyima zonomvhura ntatu, tani kanduka ni ze koJerusarema ni ka dingure Kefasa,* ame kwa ka kere nage mazuva 15.
19 Nye kapi na ligwene nankenye mupositoli, ame kwa ligwene tupu naJakopo, mumbyaHompa.
20 Ano kuhamena yininke eyi nina kumutjangera, tani yi mu tantere kosipara saKarunga asi kapi nina kukumbagera.
21 Kutunda opo yipo na zire monomukunda daSiliya ntani daKilikiya.
22 Nye nombungakriste domoJudeya, kapi da divire nge.
23 Awo ngava zuvhu tupu asi: “Mugara ogu nga tu hepeke ntani ga here kuhagekesa po ukareli wetu, ngesi kuna kuzuvhisa mbudi zongwa.”
24 Makura tava hamberere Karunga mwarwange.
