KoVagarata 2:1-21
2 Konyima zonomvhura 14 tani kanduka hena ni ze koJerusarema kumwe naBaranabasa, tani pitura Titusa.
2 Ame kwa tengwilire ko morwa Hompa ga yi horwerere nge. Kwina yiko na ka ligwene nava ava pitisire mombungakriste makura tani va tantere kuhamena mbudi zongwa ezi ani zuvhisire nomuhoko yipo ni divilise asi sirugana sange kapisi somawoko-woko.
3 NaTitusa si ogu twa kere nendi kapi va mu sininikire va mu rugane yovamba nampili ngomu ga kere Mugereka.
4 Udigu owo kwa horokere morwa vapuli vakwetu woyimpempa ava va livakerere mombungakriste va ya tu nomene. Awo kwa here kuzonagura po umanguruki wetu ou twa kara nawo mouumwe naJesus Kristusa yipo va tu ninke tu kare vapika.
5 Nye ose kapi twa va purakenene nampili kanunu* yipo mu twikire kukara ngorooro mousili wombudi zongwa.
6 Ano ava va monekere ngwendi mulyo, yi kare asi vantu musinke va kere nare, nayimwe si kwange, yeeyi Karunga kapi a tara emoneko lyokontunda. Vagara owo kapi va pere nge ko nampili magano gomape.
7 Nye apa va mwene asi nina gwana sirugana sokuzuvhisira mbudi zongwa kwava va dira kurugana yovamba, ngwendi moomu tupu Peturusa ga gwana sirugana sokuzuvhisira mbudi zongwa kwava va rugana yovamba
8 (yeeyi ogu ga pa Peturusa nonkondo dokukara mupositoli mokatji kava va rugana yovamba, yige name ga pa nge nonkondo dokukara mupositoli mokatji kovantu wokonomuhoko dapeke)
9 ntani apa va dimbwilire asi Karunga kwa likidire nge nkenda zonene, Jakopo naKefasa* naJohanesa ava va kere vapitisili,* tava tu morora naBaranabasa ngosidiviso asi natuvenye ngatu ruganena kumwe yipo asi ngatu ka zuvhisire nomuhoko ano awo ngava ka zuvhisire ava va rugana yovamba.
10 Awo kwa tu pulire tupu asi tu diworoke vapuli vakwetu woruhepo, ano name yiyo na tokomenene kurugana.
11 Nye Kefasa* apa ga wizire koAntiyokiya, ame kwa vyukilire kumutantera asi eyi ga rugene epuko.
12 Yeeyi komeho va wize vagara ava ga tumine Jakopo, nga li kumwe novantu wokonomuhoko dapeke nye apa va ya sikire, ta hageke nokuligusa ko kwawo morwa kutjira ava va rugana yovamba.
13 Vajuda wokuhupa ko nawo tava lipakerere nage mokulininkisa dogoro naBaranabasa googu nage ta gwire mo mokulininkisa kwawo.
14 Nye apa na mwene asi kapi vana kukwama usili wombudi zongwa yipo na tanterere Kefasa* moyitarameho yawo navenye asi: “Nsene asi ove Mujuda kuparuka ngwendi vantu wokonomuhoko dapeke, nye kapisi ngwendi Vajuda, ngapi nye omu no sininika vantu wokonomuhoko dapeke va kwame mpo zoVajuda?”
15 Ose Vajuda ava twa dira kukara ngwendi vantu wokonomuhoko wononzo,
16 twa yi diva asi muntu kapi ava mu tara asi ga hungama pokulimburukwa veta nye kupitira mepuro lyendi mwaJesus Kristusa. Ose kwa pura mwaJesus Kristusa, yipo ngava tu tare asi twa hungama morwa epuro lyetu mwaKristusa nye kapisi mokulimburukwa veta, yeeyi kwato ogu ngava tara asi ga hungama morwa kusikisa mo veta.
17 Nsene asi kututara asi ose vananzo morwa kuhara va tu hungameke kupitira mwaKristusa, ngoso kutanta nye asi Kristusa kwa tu harera tu zone ndi? Nokanunu si!
18 Nsene ni tungurura yininke eyi na zonagwire po, ngayi likida asi kapi ani limburukwa veta.
19 Yeeyi morwa ame kukwama veta, ame kwa fa moveta yipo ni parukire mwaKarunga.
20 Ame kwa pampara nge kumwe naKristusa kositji. Kapisi nyame hena nina kuparuka nye Kristusa yige ana kuparuka mouumwe name. Ano ame ngesi kuna kuparuka kuliza nepuro lyange mwaMunwaKarunga ogu ga here nge nokuligava mwene mwarwange.
21 Ame nokunyoka si* nkenda zaKarunga zonene, yeeyi nsene asi muntu kumuhungamekera mokusikisa mo Veta, Kristusa nayimwe si eyi ga fira.
Nonkango dokonhi
^ MoRugereka asi “vili zimwe.”
^ Eli edina limwe hena lyomupositoli Peturusa.
^ Ndi “ngwendi nongundi dombungakriste.”
^ Eli edina limwe hena lyomupositoli Peturusa.
^ Eli edina limwe hena lyomupositoli Peturusa.
^ Ndi “nokukandwira si kwina.”
