KoVagarata 3:1-29
-
Kusikisa mo Veta ntani kukara nepuro (1-14)
-
Muhungami nga parukira mepuro (11)
-
-
Etumbwidiro lyaAbirahamu kapi va li geve kupitira moVeta (15-18)
-
Ruvharo rwaAbirahamu, Kristusa (16)
-
-
Ntundiliro nositambo soVeta (19-25)
-
Vana vaKarunga morwa kukara nepuro (26-29)
-
Vemezimo lyaAbirahamu, ava va hamena kwaKristusa (29)
-
3 One Vagarata kougova yinke! Yilye ogu ga mu pukisa? Morwa one nare mwa gwana marongo kuhamena nomfa daJesus Kristusa dokositji.
2 Nina hara kumupura* ko sininke simwe: One kwa gwana mpepo zokupongoka kupitira mokusikisa mo Veta ndi morwa kupura mweyi mwa zuvha?
3 One nani kwato nondunge? Pomuhowo one kwa korerere kompepo* zokupongoka, ngapi nye omu hena muna kulihuguvara nyamweni?*
4 One ngoso kwa hepera mawoko-woko? Na yi diva nawa-nawa asi kapisi mawoko-woko.
5 Ogu a mu pe mpepo nokurugana yitetu mokatji keni, kuyiruganena morwa one kusikisa mo Veta ndi morwa mwa pura mweyi mwa zuvha?
6 Ngamoomu tupu Abirahamu ga “pulire mwaJehova makura tava mu varwire kouhungami.”
7 None mwa yi diva nawa-nawa asi ava va kara nepuro yiwo vana vaAbirahamu.
8 Matjangwa nare ga tanta asi Karunga nga hungameka vantu wokonomuhoko dapeke kupitira mepuro lyawo nye komeho zoyo, age kwa tanterere Abirahamu mbudi ezi zongwa asi: “Nomuhoko nadinye ngava di tungikira moge.”
9 Yipo nye asi ava va kara nepuro kuna kuvatungika kumwe naAbirahamu, ogu ga kere nepuro.
10 Navenye ava va korera koveta kwa va finga, yeeyi kwa tjanga asi: “Navenye ava ava dili kulimburukwa nayinye eyi va tjanga mobuke zoVeta, kwa va finga.”
11 Ayo kuyimonenena nawa-nawa asi Karunga kwato ogu a hungameke kupitira moveta morwa “muhungami nga parukira mepuro.”
12 Veta kapi va zi tatekera kepuro. Yeeyi kwa tjanga asi: “Nkenye ogu a sikisa mo yininke eyi, nga parukira mwayo.”
13 Kristusa kwa tu randa pokutuzowora mefingo lyoVeta morwa age kwa mu fingire mevango lyetu, yeeyi kwa tjanga asi: “Nkenye ogu ava kulike kositji kwa mu finga.”
14 Eyi kwa horokerere yipo nomuhoko di gwane matungiko kupitira mwaJesus Kristusa ngamoomu va yi tumbwidilire Abirahamu, yipo ngatu ka gwane mpepo zokupongoka ezi ga tu tumbwidira Karunga morwa twa kara nepuro.
15 Vakwetu, tani ruganesa sihonena esi mwa diva: Egwanekero nampili muntu ana li tulisa po, kwato gokulihagekesa po ndi asi a gwede ko yapeke.
16 Matumbwidiro kwa tembe kwaAbirahamu noruvharo* rwendi. Etjangwa kapi lya tanta asi “kovatekuru woge” ngwendi asi kwa tamba kovantu wovanzi nye alyo kwa tanta asi “kwamutekuroge” pokutamba komuntu gumwe tupu, Kristusa.
17 Simwe hena seesi asi: Veta kapi za vhulire kuhagekesa po egwanekero lyaKarunga ndi etumbwidiro lyendi, yeeyi Veta kwa ya kere po tupu konyima zonomvhura 430.
18 Yeeyi upingwa nsene u pitira moveta, kapi tau vhuru hena kupitira metumbwidiro, nye Karunga kwa u geve kwaAbirahamu kupitira metumbwidiro.
19 Morwasinke nye va zi gaverere Veta? Azo kwa zi gaverere zi horore nonzo dogoro noku ga wizire gomoruvharo* rwetumbwidiro. Vaengeli kwa geve Veta kovantu kupitira momugwanekedesi.
20 Kapi pwa hepa mugwanekedesi nsene asi muntu gumwe tupu ana hamene mo, Karunga nage gelike ga tulire po etumbwidiro olyo.
21 Ayo ngoso kutanta nye asi Veta kwa lilimba nomatumbwidiro gaKarunga ndi? Hawe, yeeyi nsene asi veta ngano kwa zi geve zi gave eparu, ose ngano kuvhura kutuhungameka pokukwama veta.
22 Nye Matjangwa kwa gava yininke nayinye mepangero lyonzo, yipo asi ava va kara nepuro ngava gwane yininke yoyiwa eyi va tumbwidira ava ava likida epuro mwaJesus Kristusa.
23 Nye komeho li ya sike epuro, ose kwa kere moveta, yizo ngazi tu pangere, tu ndindire eyi ga ya tu horwerere Karunga.
24 Veta kwa ya kere mupitisili* gwetu dogoro paapa ga wizire Kristusa, yipo Karunga a tu hungameke kupitira mepuro.
25 Nye apa lya ya sika epuro, kapi hena tuna kara mepitisiro lyoveta.
26 Namuvenye mu vana vaKarunga morwa mwa pura mwaJesus Kristusa.
27 Yeeyi namuvenye one ava va kuhwira mwaKristusa, kwa dwara Kristusa.
28 Pwato elisigo pokatji koMujuda noMugereka, mupika nomumanguruki ndi mugara nomukadi, yeeyi namuvenye vamwe tupu mouumwe naJesus Kristusa.
29 Ntani hena, nsene asi one kwa hamena kwaKristusa, one vemezimo* lyaAbirahamu ntani ngomu gwana upingwa ou va tumbwidilire Abirahamu.
Nonkango dokonhi
^ MoRugereka asi “kudiva.”
^ Ndi “kwa tamekere mompepo.”
^ MoRugereka asi “kukahulisa nomagano gosintu.”
^ Ndi “novatekuru.”
^ MoRugereka asi “mbuto.”
^ Kutanta asi ngwendi muntu ogu a takamesa ndi a popere munona.
^ MoRugereka asi “mbuto.”
