KoVagarata 5:1-26
5 Kristusa kwa tu mangurura yipo tu hafere umanguruki owo. Yipo nye asi koreni ntani mwa ha pulisira va mu ture hena mondjoko zoupika.
2 Ame Paurusa tani mu tantere asi nsene va mu rugana yovamba, eyi ga mu ruganena Kristusa kapi tayi kara hena nomulyo kweni.
3 Tani tantere hena nkenye mugara ogu ava rugana yovamba asi ga hepa kulimburukwa nayinye eyi ya kara moVeta.
4 One ava mwa ligusa ko kwaKristusa, one ava omu hetekere ko asi va mu hungameke pokusikisa mo Veta, kapi ngomu gwana hena nkenda zendi zonene.
5 Nye ose ko, mompepo zaKarunga kuna kundindira nokuhuguvara asi ngava tu hungameke kupitira mepuro.
6 Yeeyi va ku rugane yovamba ndi va dire kukurugana yovamba kwato mulyo mwaJesus Kristusa nye yomulyo po, epuro eli ava likida kupitira meharo.
7 One ngomu duka nawa. Yilye ogu ga mu kondera kokulimburukwa usili?
8 Erongo lyangesi kapi lina kutunda kwaKarunga ogu ga mu zigida.
9 Yihahesogona kuhahesa yiduva nayinye.
10 Nina si huguvara asi one ava mwa kara mouumwe naHompa nomu kwatesa nge ko, nye ogu ana kumupiyaganeka, yi kare asi yige yilye, nga gwana etengeko eli lya mu fira.
11 Nye ame ko vakwetu, nsene asi kuna kumuzuvhisira yovamba, morwasinke ava hepekere nge? Nsene asi yiyo ani zuvhisa, erongo lyange kuhamena nomfa daJesus dokositji,* kapi lya hepa kumupundukisa.
12 Ame kuna hara asi vagara ava vana kumupiyaganeka ngano va lituke vene.*
13 Vakwetu, one kwa mu zigidira emanguruko, mwa ha ruganesa emanguruko eli mokukwama madowo gopasintu, nye eharo ngano li mu tumangede mu livatere-vatere.
14 Veta nazinye kwa zi kwatakana mosipango simwe esi asi: “Hara mukweni moomu wa lihara nyamoge.”
15 Nye nsene tomu lihumagura oku tomu lilyaalya, takameseni asi mwa ha limana po.
16 Nye tani mu tantere asi twikireni kugenda mepitisiro lyompepo yipo mu dire kukwama madowo gopasintu.
17 Yeeyi madowo gosintu kurwanesa mpepo, ano mpepo kurwanesa madowo gosintu, yininke eyi kulirwanesa yipo mu dire kurugana yininke eyi mwa hara kurugana.
18 Ntani hena, nsene asi one kumugendesa mpepo, kapi mwa kara moveta.
19 Yirugana yorutu ya lihorora, ayo kuna kara ruhonda,* nkareso zokudira kukuhuka, nkareso zokunyata,*
20 kukarera yikarunga yoyimpempa, umpure,* unkore, marwanambo, mfudu, ehandu lyenene, nomutangu dononene, maligaunuko, kukwama marongo govantu,*
21 kunyenena, unkorwe, yipito yoyidona* nayimwe hena ngoso. Tani mu rondora hena kuhamena yininke eyi moomu na mu rondwere nare asi ava ava rugana yininke eyi kapi ngava ka pinga Uhompa waKarunga.
22 Nye yiyimwa yompepo kuna kara eharo, ehafo, mbili, edidimiko, nkenda, uwa, epuro,
23 ugomoki ntani elipangero. Eyi veta kapi za yi silika.
24 Ntani hena, ava va hamena kwaJesus Kristusa kwa dipaga* madowo gawo gopasintu.
25 Nsene asi ose kuna kuparuka kuliza nompepo, ngano zi tu pitisire nye mpepo.
26 Twa ha likanganga nokulirumbasana-rumbasana ndi tu lifira-fire mfudu.
Nonkango dokonhi
^ Ndi “va liruture vene.” Eyi kwa tamba kokukara ngwendi erenga, yipo va dire kuwapera kusikisa mo veta ezi ngava rongo.
^ Ndi “urodi; Nkango zoRugereka kwa tamba koyikwa epangwe.”
^ Ndi “tumbunga tomaukarelikarunga.” Tara koMauzera, koruha “Mbunga zomaukarelikarunga.”
^ Kwa tamba koyipito omu ava lizumbilire kurugana udona.
^ MoRugereka asi “kwa pampara.”
