Mbilive koVahebeli 1:1-14
1 Nare-nare Karunga, nga uyungisa ozinyakurwetu yikando yoyinzi kupitira movaporofete ntani mononkedi dononzi dapeke.
2 Age ngesi kutuuyungisa kupitira mwaMunendi, ogu ga horowora a kare mupingi goyininke nayinye, ano mwendi yimo va sitira yininke nayinye yomouzuni.
3 Age kuhorora uyerere waKarunga ntani kulikida nawa-nawa yikara yaKarunga, age kuninka nayinye yikare po kononkondo dononkango dendi. Konyima zapa ga tu kuhura kononzo detu, age kwa ka hingira korulyo rwaKarunga Munankondo nadinye ogu ga kara keguru-guru.
4 Age kwa ya pitakana vaengeli navenye pokumupa* edina eli lya pitakana madina gawo.
5 Pasihonena, kweli muengeli gumwe ogu ga tanterere Karunga asi: “Ove munange, naina ame nina kara oguho?” Ntani hena asi: “Ame ngani kara oguhwe, ano age nga kara munange?”
6 Nye apa ga tumine mbeli zendi mouzuni, age kwa tente asi: “Vaengeli navenye vaKarunga va mu tongamene.”*
7 Age hena kwa uyunga kuhamena vaengeli asi: “Age kuninka vaengeli vendi va kare nompepo, ano vakareli vendi va kare maraka gomundiro.”
8 Nye kuhamena Muna age kwa tanta asi: “Karunga kwa ku pa nonkondo dokupangera narunye nanarunye, ano Uhompa woge ngau pangera mouhungami.
9 Ove kwa hara uhungami ntani kwa nyenga udona. Eyi yiyo ga ku gwavekera Karunga nomagadi nokukupa ruhafo rorunene kupitakana vakweni.”
10 Ntani asi: “Pomuhowo ove Hompa kwa tulire etateko lyouzuni, ano eguru yirugana yomawoko goge.
11 Ayo ngayi dongonoka po nye ove ngo karerera, ayo ngayi kurupa ngwendi moomu asi kurupa sikoverero,
12 ove ngo yi gonya-gonya moomu ava gonya-gonya erwakani ndi sikoverero ntani ngayi litjindja, nye ove kapi ngo runduruka ntani nomvhura doge kapi ngadi paka uhura.”
13 Nye muengeli musinke ga tantera rumwe asi: “Hingira korulyo rwange dogoro ngani ture nonkore doge ngosilyatero sonompadi doge?”
14 Vaengeli navenye nani kapisi nompepo edi adi rugana sirugana sokupongoka, nani kapisi yiwo a tumu Karunga va vatere ava ngava paruka?
