Mbilive koVahebeli 10:1-39
10 Mokumona asi Veta kwa kere mundunduma goyininke yoyiwa yokomeho nye kapisi yininke yene-yene, azo* kapi za vhulire kuninka vantu ava ngava gava nonzambo nkenye mvhura mokukarera Karunga, va mangurukilire ko kononzo.
2 Ngano va mangurukilire ko kononzo, kugava nonzambo nani ngano kapisi kwa haga? Yeeyi ava ngava rugana sirugana soukareli kwava kuhura pwarumwe, makura ezwi lyawo lyokomutjima kapi ali va pe hena usima kononzo dawo.
3 Nye nonzambo edi ngava gava nkenye mvhura ngadi va diworokesa asi awo vananzo,
4 yeeyi honde zonontwedu nezi zoyikombo kapi za vhulire kugusa po nonzo.
5 Apa Kristusa ga wizire mouzuni kwa tente asi: “‘Nonzambo noyigava kapi wa yi here, nye ove kwa wapaikilire nge rutu.
6 Kapi wa haferere nonzambo deswakerero nononzambo dononzo.’
7 Makura tani tanta asi: ‘Karunga gwange ame kwa wiza (mobukegango kwa tjanga mo kuhamena nge) ni ya rugane mpango zoge.’”
8 Konyima zokutanta asi: “Ove kapi wa hara ndi o hafere nonzambo noyigava nononzambo deswakerero ntani nonzambo dononzo,” edi ngava gava kuliza noVeta,
9 ta tanta hena asi: “Ame kwa wiza ni ya rugane mpango zoge.” Age kwa hagekesere po ewapaiko lyanare nokutura po lyepe.
10 Kuliza ‘nompango’ zaKarunga, ose kwa tu pongwera monzambo zorutu rwaJesus Kristusa pwarumwe tupu.
11 Nkenye mupristeli, kurugana sirugana sokupongoka nkenye ezuva nokugava nonzambo dokulifana edi adi dili kugusilira po nonzo.
12 Nye Kristusa kwa gava nzambo zononzo rumwe tupu, makura yiyo ga ka hingira korulyo rwaKarunga,
13 a ndindire dogoro noku Karunga nga tura nonkore dendi konhi zonompadi dendi.
14 Age kwa gava nzambo zimwe tupu, yipo asi ava va lipongwera va sikilire mo.
15 Ntani hena, mpepo zokupongoka kwa yi tu pamekera pokutanta asi:
16 “Jehova kwa tanta asi ‘eli yilyo egwanekero ngani tura po kumwe nawo konyima zomazuva ogo. Ame ngani tura noveta dange monomutjima dawo nokuditjanga momagano gawo.’”
17 Azo kwa tanta hena asi: “Kapi hena ngani diworoka nonzo dawo noyirugana yawo yoyidona.”
18 Nsene nonzo va di dongonona po, kapi apa hepa hena nzambo zononzo.
19 Vakwetu, ose twa kara nehuguvaro* lyokukahwilira mevango lyokupongoka kupitira mohonde zaJesus
20 eli ga tu zegwilira ngonzira zokutwara komwenyo kupitira mekehe ndi asi rutu rwendi.
21 Ose hena twa kara nomupristeli gomunene ogu a gendesa embo lyaKarunga,
22 yipo nye, tu hedereni Karunga nomutjima nagunye nepuro lyokupama, morwa nomutjima detu kwa di kuhura, twa kara nezwi lyewa lyokomutjima ntani marutu getu kwa ga kuhwa nomema gomazera.
23 Tu twikireni kudivisa ehuguvaro lyetu twa hana kusinganyeka, yeeyi ose twa huguvara ogu ga li tu tumbwidira.
24 Atu gazadareni ko* vakwetu momunene, yipo yi tu tumangede* tu va hare nokuvaruganena yirugana yoyiwa,
25 walye atu zumbeni* mapongo getu, ngwendi moomu va yi yika vamwe, nye atu likorangede-korangedeni nokurugana unene nayinye eyi mokumona asi ezuva kuna kuhedera pepi.
26 Mokumona asi ose twa diva usili, nsene tu zonena mowina, kwato hena nzambo zokugusa po nonzo detu,
27 nye ose ngatu ndindira mpanguro noutjirwe ntani ehandu eli ali twera ngwendi mundiro, eli ngali veveka po ava ava rwanesa Karunga.
28 Nkenye ogu nga dili kusikisa mo Veta zaMosesa, ngava mu dipaga pwa hana nkenda, nsene pana kara nombangi mbali ndi ntatu.
29 Nye kupi ngali hura etengeko lyomuntu ogu a sense MunwaKarunga ndi a tare honde zegwanekero ezi va mu pongwera asi mulyo gwazo musesu ntani nogu a handukisa mpepo zaKarunga ogu a tu likida nkenda zonene?
30 Yeeyi ose twa diva ogu ga tente asi: “Nyame ani tengwida kuwoko, ngani va futisa.” Ntani hena asi: “Jehova nga pangura vantu vendi.”
31 Aso sininke sokutjilisa sili, nsene a ku tengeka Karunga gomunamwenyo.
32 Nye mwa ha divara mazuva gena apa mwa kondjere unene mu lididimikire mahepeko, konyima zapa sa mu temenene site saKarunga.
33 Poyiruwo yimwe, one ngava mu swaura nokumuhepeka moyitarameho, ano poyiruwo yimwe one kwa pitire momaukaro gokulifana ngomu mwa vaterere ava va hepekere.
34 One kwa likidire nkenda kwava va tulire modorongo ntani one kwa hefe unene apa va mu hokwene yiweka yeni, yeeyi mwa yi diva asi one kwa kara noyiweka yoyiwa eyi nga yi karerera.
35 Yipo nye, twikireni kuuyunga nouradi,* yeeyi ngomu ka u gwanena mfeto.
36 One mwa hepa elididimiko, yipo ngomu ka gwane eyi va mu tumbwidira konyima zokurugana mpango zaKarunga.
37 Yeeyi kwa tanta asi “karuwogona tupu kana hupu ko,” ntani hena asi “ogu ana kuwiza nga ya sika, kapi nga liranga.”
38 Ntani kwa tjanga asi “nye muhungami nga parukira mepuro,” ntani hena asi “nsene a tengura monyima, ame* nokumuhafera si.”
39 Ose kapi ngatu tengura monyima ngatu ka zonauke, nye ose kwa kara nepuro eli ngali ka parura nomwenyo detu.
Nonkango dokonhi
^ Ndi nampo asi “vantu.”
^ Ndi “kapi twa kara nowoma.”
^ Ndi “Atu kareni nosinka.”
^ Ndi “korangede.”
^ Ndi “faura; dumwa.”
^ MoRugereka asi “umanguruki wokuuyunga.”
^ Ndi “mwenyo gwange.”
