Mbilive koVahebeli 11:1-40
11 Epuro kuna kara ehuguvaro lyoyininke eyi twa ndindira asi nga yi sika mo, alyo umbangi woyininke eyi twa pura asi usili nampili ngomu atu dili kuyimona.
2 Karunga kwa likidire asi ga haferere ozinyakurwetu, yeeyi awo kwa likidire epuro lyangoso.
3 Epuro kutuvatera tu kwate egano asi uzuni kwa u sita konkango zaKarunga ntani asi yininke eyi ayi moneka kwa tunda koyininke eyi ayi dili kumoneka.
4 Epuro yilyo lya ninkisire Abeli a gave nzambo zomulyo unene kwaKarunga kupitakana zaKaini, kupitira mepuro age kwa gwene umbangi asi age muhungami, yeeyi Karunga kwa tambwire nonzambo dendi. Ose kutwikira kulirongera ko kepuro lyendi nampili ngomu ga fa.
5 Epuro yilyo lya ninkisire Henoka va mu guse po, yipo a dire kufa ngwendi moomu ava fu vantu navenye, kwato ogu ga vhulire kumugwana, morwa Karunga ga mu gusire po. Komeho va mu guse po, age kwa gwene umbangi asi Karunga kwa mu hafera.
6 Nsene o dira kukara nepuro nokuvhura si kuhafesa Karunga, yeeyi nkenye ogu a hedere Karunga ga hepa kuyipura asi yipo ga kara ntani asi yige a futu ava ava mu papara nelituromo.
7 Epuro yilyo lya ninkisire Nowa, konyima zapa ga gwene marondoro kuhamena yininke eyi ga dilire kumona, a likide etjirokarunga nokutunga emuwato omu ga ya parukire kumwe nepata lyendi. Kupitira mepuro, age kwa pangwire uzuni ntani age kwa ya mu varwilire kouhungami morwa epuro lyendi.
8 Epuro yilyo lya ninkisire Abirahamu a limburukwe apa va mu zigidire a ze kosirongo esi va mu tumbwidilire ngoupingwa, age kwa zire nampili ngomu ga dilire kudiva asi kupi ana kuza.
9 Epuro yilyo lya mu ninkisire a ka tunge ngomunayirongo mosirongo esi va mu tumbwidilire. Age kwa tungire monotenta kumwe naIsaka naJakopo, ava nawo va gwene etumbwidiro lyokulifana.
10 Yeeyi age kwa ndindilire sitata esi sa kara netateko eli lyakora, mufaneki nomutungi gwaso, Karunga.
11 Epuro yilyo lya ninkisire Sara a kare nezimo,* nampili ngomu nomvhura dendi dokureta da pitire, age kwa huguvarere ogu ga mu pere etumbwidiro olyo.
12 Eyi yiyo ya ninkisire mugara ogu ga monekere asi kapi ta vhuru kureta vana, a rete vana wovanzi ngwendi nombungururu dekeguru ntani ngwendi muheke gwekefuta gokudira kuvhura kuvarura.
13 Navenye ava kwa fire awo hava karera nepuro. Awo kapi va gwene eyi vava tumbwidilire, nye kwa yi monenene ure nokuyitambura ntani awo kwa geve umbangi asi awo vageni ntani vagenda mosirongo.
14 Yeeyi ava ava uyunga monkedi ezi kuyilikida asi awo kuna kukondjera evango eli ngava tunga.
15 Awo ngano ngava diworoka kevango oku va tundire, ngano ya va ninkisire va tengure.
16 Nye awo kuna kukondjera evango lyewa po, eli lya kara meguru. Yipo nye, Karunga kapi ali fu nomuga kweyi ava mu tumbura asi Karunga gwawo, yeeyi age kwava wapaikira sitata.
17 Epuro yilyo lya ninkisire Abirahamu a hare kuzamba munendi Isaka, apa va mu hetekere. Mugara ogu ga tambwire matumbwidiro noruhafo, kwa here kuzamba munendi gelike a huru,
18 nampili ngomu va mu tanterere asi: “Ruvharo* roge ngaru tundilira mwaIsaka.”
19 Age ga yi pulire asi Karunga kuvhura kupindura munendi koufe ntani age kwa mu pindwire koufe pasifanekeso.
20 Epuro yilyo lya ninkisire Isaka a tungike Jakopo naEsau kuhamena yininke yokomeho.
21 Epuro yilyo lya ninkisire Jakopo apa ga kere pepi nokufa a tungike vana vaJosefa ntani a nyongeke mutwe gwendi kosipara saKarunga, age ana korere kompango zendi.
22 Epuro yilyo lya ninkisire Josefa apa ga kere pepi nokufa, a uyunge kuhamena rugendo roVaisraeli ntani age kwava tanterere* asi va guse mo yisupa yendi.
23 Epuro yilyo lya ninkisire vakondi vaMosesa va mu horeke makwedi gatatu konyima zokumuhampuruka, yeeyi awo kwa mwene asi age munona gomuwa ntani awo kapi va tjilire mpangera zahompa.
24 Epuro yilyo lya ninkisire Mosesa apa ga kulire, a nyoke kumutumbura asi ozina munwaFarawo,
25 age kwa horowere po yokumuhepeka kumwe novantu vaKarunga, mevango lyokuhafera karuwogona mononzo,
26 morwa age kwa tere yokumuswawira Kristusa asi mulyo unene kupitakana ungawo waEgipite, yeeyi age kwa nwikire mokukagwana mfeto.
27 Epuro yilyo lya mu ninkisire a tunde moEgipite ga hana kutjira ehandu lyahompa, yeeyi age kwa twikilire kulididimika ngwendi googu ana kumona Karunga ogu a dili kumoneka.
28 Epuro yilyo lya mu ninkisire a dane Paska nokuninka vantu va kwite honde koyikuravero yawo, yipo muengeli gwaKarunga a dire kudipaga* nombeli dawo.
29 Epuro yilyo lyava ninkisire va pite mEfuta lyEgeha ngwendi kuna kugenda pevhu lyekukutu, nye Vaegipite apa va yi hetekerere ta li va divida.
30 Epuro yilyo lya ninkisire makuma gositata saJeliko ga gwe, konyima zapa va si kundurukire mazuva ntambali.
31 Epuro yilyo lya ninkisire Rahabu gohondedi, va dire kumuzonagura po kumwe nava va dilire kulimburukwa, yeeyi age kwa tambwire nawa nondadi.
32 Yisinke hena nani vhura kuuyunga? Yeeyi siruwo kapi nasi vhura kupulisira nge ni uyunge kuhamena Ngidiyona, Baraka, Simisoni, Jefuta, Ndafita, Samwere ntani novaporofete vamwe.
33 Epuro yilyo lyava ninkisire va funde vahompa, va rugane youhunga, va gwane eyi vava tumbwidira, va kumateke tuna tovanyime,
34 gu dire kuvahwika mundiro, va dire kuvadipaga norufuro, vava nkondopeke moupirankondo wawo, va funde moyita ntani nokutjida nonkore dawo.
35 Epuro yilyo lya ninkisire vakadi va gwane vekoro lyawo pokuvapindura koufe, nampili ngomu vamwe vava hepekere, awo kapi va sigire epuro lyawo yipo vava mangurure. Awo kwa yi ruganene eyi, yipo ngava ka gwane evhumbuko lyewa po.
36 Ano vamwe kwava pangwire pokuvaswaura, kuvasopora* nokuvamanga mauketanga ntani kuvatura monodorongo.
37 Awo ngava va toona nomamanya, awo kwava hetekere asi va sige epuro lyawo, awo kwava sehe pavali, awo kwava dipagere norufuro, awo ngava dwara yipapa yononzwi neyi yoyikombo, awo kwa hepere, awo kwa kere momaudigu, awo kwava tekwire momudona,
38 ntani kapi va waperere kuparuka mouzuni ou. Awo kwa renda-rendere momburundu, monondundu, momakombombo ntani nomomakero.
39 Nampili ngomu Karunga ga likidire vantu navenye ava asi ga va haferere morwa epuro lyawo, awo kapi va gwene eyi ga va tumbwidilire,
40 morwa Karunga kwa tu pungwira yininke yoyiwa po, yipo vantu owo ngava dire kuhova kusikilira mo.
Nonkango dokonhi
^ MoRugereka asi “mbuto.”
^ MoRugereka asi “mbuto.”
^ Ndi “pangerere.”
^ MoRugereka asi “kukwata.”
