Mbilive koVahebeli 12:1-29
12 Yipo nye, morwa twa kara nombunga zonene zonombangi ezi za tu kundurukida, tu zumbeni nkenye mudigo nononzo edi adi tu lidingire, makura tu duke nedidimiko melirombero eli va tu tulira po,
2 oku tatu nwike kwaJesus mugavi geparu, ogu ga ninka epuro lyetu li sikilire mo. Age kwa lididimikilire nomfa dokositji* morwa ehafo eli lya kere komeho, ga hana kupakera mbili nomuga edi da mu reterere ntani age kwa ka hingira korulyo rosipundi saKarunga souhompa.
3 Gazadareni ko kosihonena sogu ga lididimikilire maswauro govantu ava va lipangwire vene pokurugana eyi, yipo mu dire kuroroka nokuhageka.
4 Mokukondja kweni nononzo, one kapi simpe mwa kondja rumwe dogoro konomfa.
5 One kwa divara epukururo eli va mu pa ngovana asi: “Munange, walye o sense mavyukiso gaJehova ndi asi o roroke nsene ta kupukurura;
6 yeeyi Jehova kuvyukisa ava ga hara ntani age kutengeka nkenye ogu a tambura ngamunendi.”
7 Mwa hepa kulididimikira mavyukiso.* Karunga kuna kumutekura ngwendi vana vendi. Ndi muna musinke ava dili kuvyukisa oguhwe?
8 Nye nsene kapi va mu pukurura, one kapisi vana vendi vene-vene, nye vana womuntu gwapeke.
9 Ntani hena, vaguhya vetu wopanyama ngava tu vyukisa, ano ose nga tu va fumadeke. Nani Guhyetu gopampepo ogu a tu pitisire nompepo zendi zokupongoka kapisi yige natu fumadeka po unene yipo tu paruke?
10 Vaguhya vetu ngava tu pukurura pokaruwogona tupu kuliza neyi ngava mono asi yiwa, nye Karunga kutupukurura morwa uwa wanyamwetu, yipo ngatu pongoke ngwendi yige.
11 Yimo, kwato ogu ayi hafere apa ava mu vyukisa, nye ayo kumukoresa.* Nampili ngoso ava ava vyukisa, konyima ku ya kara vahungami ntani vanambili.
12 Yipo nye, nkondopekeni mawoko aga gana mi ntani nongoro edi dina dili nonkondo,
13 ntani twikireni kugenda kuvyukilira monzira zouhunga, yipo asi maruha gorutu aga ga remana ga dire kutumpauka mo, nye yipo ga veruke.
14 Kondjereni kukara nombili novantu navenye nokukara muna pongoka, yeeyi muntu nsene a dira kupongoka kapi ta vhuru kumona Hompa.
15 Takameseni asi pa ha kara ogu ana kudira kugwana nkenda zaKarunga zonene, a kare ngwendi ndandani zouhungu ezi zina kuhokera zi rete udigu nokuzonagwisa po wovanzi,
16 ntani takameseni asi mokatji keni mwa ha kara munaruhonda* ndi ogu ga dira kukara norupandu koyininke eyi ya hamena kwaKarunga, ngwendi Esau ogu ga randesere umbeli wendi komuzuhwa gezuva limwe tupu.
17 Yeeyi mwa yi diva asi konyima, apa ga here kugwana etungiko, age kapi ga li gwene, nampli ngomu ga kondjere unene oku ta lili asi a rundurure magano goguhwe, nye kapi ya mu tompokere.
18 One kapi mwa hedera rumwe ndundu ezi zina kupya komundiro, ndi eremo lyesovagani nomundema gomunene ntani nekundungu,
19 ntani kapi mwa zuvha rumwe rumbendo runa kuhagara unene nezwi lina kuuyunga nonkango, ano vantu eyi va di zuvha tava likwambere asi va hageke ku di va tantera.
20 Yeeyi awo kwava tukukisire mpangera ezi asi: “Nampili nsene sikasama si guma kondundu, va hepa kusidipaga nomamanya.”
21 Mosesa nage kwa mu tjilisire eyi ga mwene makura ta tanta asi: “Ame nina tjira, kuna kukankama.”
22 Nye one kwa hedera Ndundu zaSiyoni ntani Jerusarema zemeguru, sitata saKarunga gomunamwenyo ntani novaengeli wovanzi*
23 ava ava pongo ntani mbungakriste zonombeli daKarunga, ano madina gawo kwa ga tjangera meguru, naKarunga mupanguli gwanavenye neparu lyopampepo lyovahungami ava va ninka va sikilire mo,
24 naJesus mugwanekedesi gegwanekero lyepe nohonde ezi va tjisanga, ezi za pitakana zaAbeli.
25 Takameseni asi mwa ha nyoka kupurakena* kogu ana kuuyunga. Nsene asi ava va nyokere kupurakena kogu ga va rondwere apa pevhu kapi va vhulire kuhenduka, ose nyose nye ngatu vhura kuhenduka nsene tu zumba ogu ana kutuuyungisa kutundilira meguru ndi?
26 Posiruwo sina ezwi lyendi kwa nyungangere evhu, nye ngesi age kwa tumbwidira asi: “Ame kapi ngani nyunganga hena tupu evhu lyelike, nye neguru nalyo.”
27 Nkango “hena,” kulikida asi yininke eyi ava nyunganga, eyi ga dira kurugana Karunga, ngava ka yi gusa po yipo yininke eyi ava dili kunyunganga ngayi twikire kukara po.
28 Yipo nye, mokumona asi ngatu ka za moUhompa ou ava dili kunyunganga, tu twikireni kugwana nkenda zaKarunga zonene, yeeyi kupitira mwazo ose kuvhura kukarera Karunga netjirokarunga nefumadeko lyenene.
29 Yeeyi Karunga gwetu, mundiro ogu agu veveke.
Nonkango dokonhi
^ Ndi “edeuro.”
^ Ndi “kumuguvisa.”
^ Ndi “mayovi nomayovi.”
^ Ndi “ligusa-gusa mo; kapisi mu dire kupakera mbili.”
