Mbilive koVahebeli 13:1-25
13 Twikireni kulihara-hara neharo lyosiumbya.
2 Walye omu divara kutambura vagenda,* yeeyi vamwe kwa tambwire vaengeli va hana kuyidivira.
3 Diworokeni ava vana kara modorongo,* ngwendi kumwe nawo muna kara modorongo, nava vana kuhepeka ngwendi kumwe nawo vana kumuhepeka.
4 Namuvenye omu fumadeke nonkwara, ntani valikwali kapisi va teze po mugano gwawo gononkwara, yeeyi Karunga nga pangura vanaruhonda* nava ava teza po nonkwara.
5 Walye omu dowokere yimaliwa, nye yi mu gwanene po eyi muna kara nayo, yeeyi Karunga kwa tanta asi: “Kapi ngani mu siga ndi asi ni mu zumbe.”
6 Yipo nye, ose kuvhura tu uyunge nouradi asi: “Jehova yige mukwafi gwange, kapi ngani tjira, muntu a rugane nge yinke?”
7 Diworokeni ava ava mu pitisire, ava va mu ronga nonkango daKarunga, nomeneni nkareso zawo zongwa, nokuhonena epuro lyawo.
8 Jesus Kristusa kapi ga runduruka kutunda nkera, nanaina, nanarunye.
9 Ga ha mu pukisa marongo gapeke gokulisiga-siga, yeeyi hansa nsene nkenda zaKarunga zonene zi nkondopeka mutjima kupitakana noveta dokuhamena nondya, edi adi dili kukwafa ava ava di kwama.
10 Sizambero esi twa kara naso, kapi va pulisira ava ava rugana konkongoronzugo va lye eyi ya kara po.
11 Yeeyi yikorama kukayihwikira ponze zokamba, ano honde zayo yizo a twara mupristeli gomunene mevango lyokupongoka aka zi zambe ngonzambo zononzo.
12 Yipo nye, Jesus nage kwa mu hepekere ponze zositata, yipo a pongore vantu nohonde zendi.
13 Tu zeni nye kwendi ponze zokamba, oku tatu lididimikire eswau eli ga lididimikilire,
14 yeeyi ose kapi twa kara nositata sokukarerera, nye ose kuna kukondjera esi ngasi wiza.
15 Tu gaveni nonzambo dehamberero kwaKaruga, kupitira mwendi, kutanta asi kuruganesa tuna twetu tu divise edina lyendi.
16 Ntani hena, walye omu divara kurugana yoyiwa nokuligavera novakweni eyi mwa kara nayo, yeeyi Karunga kumuhafesa unene nonzambo dangoso.
17 Omu limburukwe ava ava mu pitisire nokutambura mapukururo gawo, yipo va yi rugane noruhafo nye kapisi noruguwo, ngayi mu kwafe. Yeeyi awo kumutakamesa* ngwendi vava ngava yi zeresera Karunga.
18 Twikireni kutukanderera po, yeeyi twa yi pura asi ose kwa kara nezwi lyokuzera* lyokomutjima, yeeyi ose kwa hara kuhungika mwanayinye.
19 Nye unene po, tani mu korangeda mu kanderere, yipo ngani wize usimbu kweni.
20 Ngano Karunga gombili, ogu ga pindwire koufe Hompa gwetu Jesus, musita gomunene gononzwi, ogu ga kara nohonde zegwanekero lyanarunye,
21 a mu ninke mu wapere kurugana yirugana nayinye yoyiwa, yipo mu sikise mo mpango zendi. Age kututumangeda kupitira mwaJesus Kristusa tu rugane eyi ayi mu hafesa. Ngano Karunga va mu yererepeke narunye nanarunye. Amen.
22 Vakwetu, tani mu korangeda mu purakene nedidimiko kononkango dekorangedo, edi nina mu tjangere mombilive ezi zonsupi.
23 Nina hara mu dive asi mukwetu Timoteusa vana mu mangurura. Nsene nga wiza usimbu, ngatu wiza kumwe nage tu ya mu dingure.
24 Kundisireni po navenye ava ava pitisire novapongoki navenye. Vapuli vakweni womoItaliya vana mu kundisire po.
25 Ngano nkenda zaKarunga zonene, zi kare none namuvenye.
Nonkango dokonhi
^ Ndi “kulikida nkenda vageni.”
^ MoRugereka asi “ava vana kara monomango.”
^ Ndi “kutakamesa nomwenyo deni.”
^ MoRugereka asi “lyewa.”
