Mbilive koVahebeli 3:1-19
3 Vakwetu wokupongoka, one ava va horowora* mu ze meguru, gazadareni ko kosihonena saJesus ogu twa tambura ngomupositoli nomupristeli gomunene.
2 Age kwa limburukwire Karunga ogu ga mu pere situmbukira, ngamoomu tupu Mosesa ga limburukwire apa ga kere membo lyaKarunga.
3 Age* kwa mu pere efumano lyenene kupitakana Mosesa, yeeyi ogu a tungu nzugo kumufumadeka kupitakana nzugo ezi ga tunga.
4 Yimo, nkenye nzugo muntu azi tungu, nye mutungi goyininke nayinye Karunga.
5 Mosesa kwa kere mukareli gomulimburukwi membo lyaKarunga. Yirugana yendi kwa ya kere umbangi woyininke eyi ga ya uyungire Karunga,
6 nye Kristusa kwa kere muna gomulimburukwi ogu nga gendesa embo lyaKarunga. Ose embo lyendi nsene tu kwaterera kemanguruko lyetu lyokuuyunga nehuguvaro eli tuna kulikangangera dogoro ngesi.
7 Yipo nye, moomu tupu za tanta mpepo zokupongoka asi: “Naina nsene nomuzuvha ezwi lyange,
8 mwa ha kukutika nomutjima deni ngwendi moomu mwa handukisire nge unene nokuheteka nge momburundu,
9 apa ozinyakurweni va hetekere nge, nampili ngomu va mwene yirugana yange monomvhura 40.
10 Eyi yiyo na handukilire muhoko ogu nokutanta asi: ‘Awo kukwama nomutjima dawo ntani kapi va diva nonzira dange.’
11 Makura tani handuka nokugana asi: ‘Kapi ngava za mepwizumuko lyange.’”
12 Vakwetu, takameseni asi pwa ha kara gumwe mokatji keni gomutjima gomudona, gokudira epuro makura a zumbe Karunga gomunamwenyo,
13 nye likorangeda-korangedeni nkenye ezuva, paapa vana kutumbura asi “naina,” yipo nonzo di dire kukukutika po gumwe.
14 Yeeyi nose ngatu ka gwana eyi ga gwene Kristusa nsene tu kwaterera kehuguvaro eli twa kara nalyo kutunda ketameko.
15 Ngwendi moomu va yi tanta asi: “Naina nsene nomuzuvha ezwi lyange, mwa ha kukutika nomutjima deni ngwendi moomu mwa handukisire nge unene.”
16 Nani wolye va mu zuvhire makura va mu handukise unene? Kapisi vaava ga pitisilire Mosesa va tunde moEgipite?
17 Nani wolye ga handukilire Karunga nomvhura 40? Nani kapisi vaava va zonene makura va fire momburundu?
18 Ntani wolye ga gene asi kapi ngava za mepwizumuko lyendi? Nani kapisi vaava va dilire kumulimburukwa?
19 Tuna yi mono asi kapi va zire mo morwa kapi va kere nepuro.
