Mbilive koVahebeli 4:1-16
4 Yipo nye, mokumona asi etumbwidiro lyokuza mepwizumuko lyendi simpe polili, takameseni* asi pwa ha kara ogu ana kuzumbanesa etumbwidiro eli.
2 Yeeyi nose kwa tu udisilire mbudi zongwa, ngamoomu nawo va zi va udisilire, nye kapi za va reterere uwa morwa kapi va zi tambwire ngwendi moomu va zi tambwire wopeke.
3 Yeeyi ose twa kara nepuro ngatu za mepwizumuko lyendi, moomu tupu ga yi tanta asi: “Makura tani handuka nokugana asi ‘kapi ngava za mepwizumuko lyange,’” nampili ngomu ga mene yirugana yendi kutunda ketameko lyouzuni.
4 Yeeyi metjangwa limwe age kwa uyunga kuhamena ezuva lyauntambali asi: “Makura Karunga ta pwizumuka mezuva lyauntambali koyirugana yendi nayinye,”
5 ntani age kwa tanta hena asi: “Kapi ngava za mepwizumuko lyange.”
6 Ava va hovere kuzuvhisira mbudi zongwa kapi va zire mepwizumuko lyendi morwa kapi va limburukwire, nye mpito simpe kozili kwa vamwe mokuza mo.
7 Konyima zosiruwo, eyi yiyo Karunga ga ya tente mepisarome lyaNdafita eli tuna tumbura mombilive ezi asi: “Naina nsene nomu zuvha ezwi lyange, mwa ha kukutika nomutjima deni.” Yipo nye, age kwa didilikire ezuva lyongandi asi “naina.”
8 Yeeyi Josuwa ngano ga va twere mepwizumuko olyo, Karunga ngano kapi ga uyungire kuhamena ezuva lyapeke.
9 Yipo nye, simpe pwa kara ezuva lyesabata kovantu vaKarunga.
10 Yeeyi muntu ogu ga za mepwizumuko lyaKarunga, kwa pwizumuka koyirugana yendi ngwendi moomu Karunga ga pwizumuka koyirugana yendi.
11 Yipo nye, tu kondjeni tu ze mepwizumuko olyo, yipo tu dire kukwama sihonena sa wovena va dilire kulimburukwa.
12 Yeeyi nonkango daKarunga kwa kara nomwenyo ntani nononkondo. Ado kwa twepa da pitakana rufuro ronomemo mbali. Ado kuhwilira tadi hangura muntu gomonda nogu gokontunda ntani ado kuhangura yisupa komuhoko-hoko, ado kuhorora magazaro noyitambo yokomutjima.
13 Kwato sisitwa esi sa horama kosipara sendi, nye nayinye kwa kara poruzera ntani kuyimona Karunga ogu ngatu ka zeresera yirugana yetu.
14 Mokumona asi twa kara nomupristeli gomunene, Jesus Kristusa MunwaKarunga ogu ga za meguru, tu twikireni kumudivisa.
15 Yeeyi ose kapi twa kara nomupristeli gomunene ogu a dili kukwata egano maupirankondo getu, nye ose kwa kara nomupristeli gomunene ogu va hetekere mwanayinye ngwendi moomu va tu hetekere nose, nye age kapi ga paka nzo.
16 Tu hedereni nye sipundi saKarunga ogu ga kara nonkenda zonene ntani tu kanderereni kwendi nemanguruko, yipo a tu likide nkenda zendi zonene zi tu kwafe paapa tuna zi hepere.
Nonkango dokonhi
^ MoRugereka asi “kareni nowoma.”
