Mbilive koVahebeli 7:1-28
7 Yeeyi Merekisedeki hompa gwaSaremu, mupristeli gwaKarunga gekeguru-guru, kwa ligwene naAbirahamu ogu ga ka tundire kokufunda vahompa, makura Merekisedeki ta mu tungike.
2 Abirahamu makura ta gava yiumurongo yoyininke nayinye eyi ga ka simbire kwaMerekisedeki. Edina lyendi kutanta asi “Hompa gouhungami,” ntani hompa gwaSaremu kutanta asi “Hompa gombili.”
3 Kapi pwa kara mauzera kuhamena oguhwe nozina ndi ruvharo omu ga tundilira ndi siruwo esi va mu hampuruka nesi ga ya fire. Monkedi ezi age kwa fana ngwendi MunwaKarunga ntani age mupristeli gwanarunye.*
4 Mugara ogu kwa kere nositumbukira sosinene, eyi yiyo zinyakurwetu Abirahamu ga mu pere yiumurongo yoyiwa po eyi ga ka simbire.
5 Yimo, kuliza noVeta, vana vaRevhi ava va horowere va kare vapristeli, kwava pere mpangera zokupongaika yiumurongo kovantu, kutanta asi kovakwawo, nampili ngomu va tundire moruvharo rwaAbirahamu.
6 Nye mugara ogu ga dilire kutunda moruvharo rwaRevhi, kwa gusire yiumurongo kwaAbirahamu nokutungika ogu va pere matumbwidiro.
7 Ayo usili asi gomunene po yige a tungike gomununu po.
8 Ntani vagara ava ava gwana yiumurongo awo kufa, nye mugara ogu ga gwene yiumurongo, matjangwa kwa yi pameka asi age kutwikira kuparuka.
9 Kuvhura tu tante asi Revhi, ogu ga gwene yiumurongo, nage kwa futire yiumurongo kupitira mwaAbirahamu,
10 yeeyi age kwa kere gomoruvharo rokomeho rwaAbirahamu apa Merekisedeki ga ligwene naAbirahamu.
11 Nsene asi upristeli woVarevhi kwa ninkisire vantu va dire kukara nononzo, (yeeyi ayo kwa kere ruha roVeta ezi va geve kovantu), morwasinke hena va heperere mupristeli gokufana ngwendi Merekisedeki nye kapisi ngwendi Arona?
12 Mokumona asi upristeli kuna kuurundurura, Veta nazo va hepa kuzirundurura.
13 Yeeyi mugara ogu ya hamena yininke eyi, kwa tunda morudi rwapeke omu ga dira kutunda rumwe mugara ogu ga rugana kosizambero.
14 Ayo ya zera asi Hompa gwetu kwa tundire morudi rwaJuda, nye Mosesa kapi ga tente asi vapristeli ngava tunda morudi oro.
15 Eyi kwa ya zera unene apa ga ya monekere mupristeli gwapeke ogu ga kere ngwendi Merekisedeki,
16 age kapi ga kara mupristeli morwa mezimo eli ga tunda kuliza noVeta, nye morwa ga kara nononkondo edi adi mu pe eparu eli ali dili kuzonauka.
17 Yeeyi etjangwa limwe kwa uyunga kumuhamena asi: “Ove mupristeli gwanarunye ngwendi Merekisedeki.”
18 Yipo nye, Veta zanare kwa zi hagekesere po morwa azo kwato nonkondo ntani kwato mulyo.
19 Yeeyi Veta kapi za vhulire kugusilira po nonzo, nye Karunga kwa tu pa ehuguvaro lyewa, ano kupitira mehuguvaro olyo ose kuvhura kumuhedera pepi.
20 Karunga kwa gene apa ga tulire Jesus a kare mupristeli
21 (yeeyi pwa kere vagara vamwe ava va ya kere vapristeli pwa hana mugano, nye Karunga apa ga horowere mugara ogu a kare mupristeli, age kwa gene kumuhamena asi: “Jehova ana gana ntani kapi nga rundurura magazaro gendi,* ‘ove mupristeli gwanarunye’”),
22 ano Jesus kwa ya kara umbangi wene-wene asi egwanekero lyewa ngali sika mo.
23 Ntani hena, vapristeli kapi va vhulire kutwikira nosirugana sawo morwa ngava fu, eyi yiyo wopeke vava pinganene po, va twikire sirugana oso.
24 Nye morwa age kapi a fu, kwato ogu nga pinganena mo moupristeli wendi.
25 Yipo nye, age kuvhura kuzowora ava ava hedere Karunga kupitira mwendi, morwa age kwa karera po narunye ava likwamberere po.
26 Ayo ya wapa kwetu kukara nomupristeli gomunene gomulimburukwi, age kwato nonzo, ga kuhuka, kwa mu pongora mo movananzo ntani kwa mu zerura a pitakane eguru.
27 Age kapi ga hepa kugava nonzambo nkenye ezuva ngwendi vapristeli ava ngava gava nonzambo dononzo davene nedi dovantu, morwa age kwa ligeve mwene pwarumwe tupu.
28 Yeeyi Veta kwa horowere vagara ava va kere nomaupirankondo va kare vapristeli wovanene, nye mugano ogu gwa ya kere po konyima zoVeta, kwa horowora Muna ogu va ninka a sikilire mo narunye.
