Mbilive koVahebeli 8:1-13
8 Eyi tuna tamba yeyi asi: Ose kwa kara nomupristeli gomunene ogu ga hingira korulyo rosipundi saKarunga soUhompa meguru,
2 age mukareli gemevango lyokupongokerera nomotenta zousili ezi ga tura po Jehova, nye kapisi vantu.
3 Nkenye mupristeli gomunene kwa mu horowera a gave mauhwi nononzambo, eyi yiyo ya karera nomulyo asi nage a kare neyi yokugava.
4 Age ngano kwa kere pevhu, ngano kapi ana kara mupristeli morwa pevhu pwa kara nare vapristeli ava ava gava mauhwi kuliza noVeta.
5 Sirugana esi vana kurugana vagara ava kwa fanekesa yininke yemeguru. Eyi kwa yi likidire apa Karunga ga pangerere Mosesa omu na dika tenta, age kwa mu tanterere asi: “Koneka nawa yipo ngo rugane yininke nayinye moomu na yi kulikidire apa wa kere kondundu.”
6 Nye Jesus age kwa gwana situmbukira sosiwa unene kupitakana sovapristeli, morwa age mugwanekedesi gegwanekero lyewa eli va tulisa po paveta ntani nomatumbwidiro gomawa.
7 Egwanekero lyokuhova ngano kwa sikilire mo, ngano kapi pwa hepere lyauvali.
8 Yeeyi Jehova kwa gwene vantu usima apa ga tente asi: “‘Tareni! Mazuva taga wiza,’ ‘apa ngani tura po egwanekero lyepe noVaisraeli ntani noVajuda.
9 Kapi ngali kara ngwendi egwanekero eli na tulire po nozinyakurwawo mezuva eli nava kwete komawoko apa nava gusire mosirongo saEgipite, awo kapi va kwaterere kegwanekero lyange, makura yipo na hagekere kuvapakera mbili,’” yimo ana kutanta Jehova.
10 Jehova kwa tente hena asi: “‘Eli yilyo egwanekero ngani tura po noVaisraeli konyima zomazuva ogo, ame ngani tura noveta dange momagano gawo nokuditjanga monomutjima dawo. Ame ngani kara Karunga gwawo, ano awo ngava kara vantu vange.’”
11 “‘Kwato ogu nga tantera mukwawo ndi mupuli mukwawo asi: “Diva Jehova,” Yeeyi navenye ngava diva nge kutunda komununu dogoro komunene.
12 Ngani va gusira po koyirugana yawo yoyidona ntani kapi hena ngani diworoka nonzo dawo.’”
13 Pokutanta asi “egwanekero lyepe,” age kwa kurupika egwanekero lyanare. Nsene sininke sa kurupa aso kutavauka ano konyima ta si zonaukilire po.
