Mbilive koVahebeli 9:1-28
9 Egwanekero lyanare lya kere nonoveta dalyo omu nava karera Karunga ntani tenta omu ngava karere Karunga, kwa kere paapa pevhu.
2 Nkondwa zokuhova ezi za kere motenta, kwa kere mo uzweko wonoramba nositafura ntani nomboroto donzambo.* Azo ngava zi tumbura asi evango lyokupongoka.
3 Nye konyima zekehe lyauvali, kwa kere ko nkondwa ezi ngava tumbura asi evango lyokupongokerera.
4 Amo kwa kere mo situtumikidiso songorodo, sikesa segwanekero esi va kwitire ngorodo. Mosikesa oso kwa kere mo kavaza kongorodo komana, mpango zaArona ezi za hokere nombya ntani yiperende yonoveta daKarunga,*
5 kontunda zaso kwa kere ko vakerubi wouyerere ava va kudumikire mbando* zosikesa nomavava gawo. Nye ngesi esi kapisi siruwo sokufaturura yininke eyi momunene.
6 Apa va mene kuwapaika yininke eyi, vapristeli nkenye apa ngava zi monkondwa zokuhova va rugane yirugana youkareli;
7 nye mupristeli gomunene nga hwilire gelike monkondwa zauvali rumwe momvhura, nohonde ezi nga zamba kononzo dendi ntani kononzo edi ngava tura vantu awo va hana kuyidivira.
8 Mpepo zokupongoka kwa horora asi kapi pwa kere mpito zokuza mevango lyokupongoka siruwo esi za kere po tenta zokuhova.
9 Tenta ezi kwa fanekesa yininke yina kuhoroka ngesi, ano mewapaiko eli kwa hamena mo kugava mauhwi ntani nononzambo. Nye yininke eyi kapi a yi ninkisa muntu ogu ana kurugana sirugana soukareli a kare nezwi lyokomutjima lyokuzererera.
10 Ayo kwa hamenene mo nondya noyikunwa ntani makuhuro gopampo gokulisiga-siga.* Ado kwa kere noveta kuhamena rutu ntani ado kwa kere po dogoro paapa sa sikire mo siruwo sokuwapeka yininke.
11 Nye Kristusa apa ga wizire ngomupristeli gomunene goyininke yoyiwa eyi ya horokere, age kwa hwililire motenta zonene zokusikilira mo ezi ga dira kurugana mawoko gomuntu ntani kapi za kara pevhu.
12 Age kwa hwililire mevango lyokupongoka pwarumwe tupu a tu zowore nohonde zendi, nye kapisi nohonde zoyikombo ndi zonontwedugona.
13 Honde zoyikombo nezi zonontwedu ntani nenoto lyondema kwa ninkisire vantu va kuhuke kosipara saKarunga,
14 nye honde zaKristusa mulyo unene. Age kwa mu pitisilire mpepo zokupongoka, yipo a ligave mwene kwaKarunga ngonzambo za hana sipo. Honde zendi kuzeresa ezwi lyetu lyokomutjima koyirugana ya hana sikwafo, yipo tu karere Karunga gomunamwenyo.
15 Eyi yiyo ga karera mugwanekedesi gegwanekero lyepe, mokumona asi age kwa fire, age kwa zowora ava va zigida va ka gwane upingwa wanarunye ou vava tumbwidira. Awo kwava zowora kononzo dawo edi ngava rugana apa va kere megwanekero lyanare.
16 Nkenye ogu a tulisa po egwanekero naKarunga ga hepa kufa,
17 yeeyi egwanekero kuza mosirugana apa a fu muntu ogo, alyo kapi a li zi mosirugana nsene asi age muzuni.
18 Nampili egwanekero lyanare kapi lya zire pasirugana pwa hana honde.
19 Apa Mosesa ga tanterere vantu yipango yomoVeta, age kwa gusire honde zonontwedugona ntani zoyikombo, makura ta zi vhongo nomema, makura ta gusa sisampo* ntani nonongodi donongeha nokusampesa ko honde kobuke* nokovantu,
20 ta tanta asi: “Ezi yizo honde zegwanekero eli ga mu pangerere Karunga asi mu li sikise mo.”
21 Ta sampere hena honde kotenta ntani koyipako nayinye eyi ava ruganesa kosirugana sokupongoka.
22 Kuliza noVeta, yininke nayinye kuyikuhura nohonde ntani Karunga kapi ta vhuru kugusira po vantu nonzo dawo pwa hana kutjika honde.
23 Yipo nye, ayo ya kere hepero asi yininke eyi ya fanekesa yemeguru va yi kuhure monkedi ezi, nye yininke yemeguru kuyikuhura nonzambo ezi za pitakana nzambo ezi.
24 Yeeyi Kristusa kapi ga ka hwililire mevango lyokupongoka eli va rugana nomawoko eli lya fanekesa yininke yene-yene, nye age kwa zire meguru mwene yipo a ka moneke kosipara saKarunga mwarwetu.
25 Age kapi ga lizembe mwene yikando yoyinzi, ngwendi moomu nga yi rugana mupristeli gomunene ogu nga zi mevango lyokupongoka nkenye mvhura a ka zambe nzambo zoyikorama.
26 Ngano yimo ga yi rugene ngoso, age ngano kwa hepa kutunda ketameko lyouzuni. Nye age kwa ligeve rumwe tupu pouhura wouzuni* ou yipo a guse po nonzo kupitira monzambo zendi.
27 Ngwendi moomu tupu vantu ava fu rumwe, makura konyima nga ku kwame mpanguro,
28 naKristusa nage kwa ligeve rumwe tupu mokuzowora vantu kononzo, sikando sauvali apa nga wiza, kapisi sokuyagusa po nonzo, nye mokuyaparura ava va mu ndindira.
Nonkango dokonhi
^ Ndi “nomboroto delikido.”
^ MoRugereka asi “yiperende yegwanekero.”
^ Ndi “evango lyokuzambera.”
^ MoRugereka asi “makuho gokulisiga-siga.”
^ Ndi “kegango.”
