Mbilive koVakorosi 1:1-29
1 Mbilive ezi kuna kutunda kwaPaurusa, ogu ga kara mupositoli gwaJesus Kristusa keharo lyaKarunga ntani kwamukwetu Timoteusa,
2 zi ze kovapongoki nokovapuli vakwetu ava va kara mouumwe naKristusa moKorosi:
Karunga Guhyetu ngano a mu fire unene nkenda noku mu pa mbili.
3 Ose nkenye apa kupandura Karunga, Guhya Hompa gwetu Jesus Kristusa apa atu mu kanderere po,
4 kutunda apa twa zuvha kuhamena epuro lyeni mwaJesus Kristusa ntani neharo lyeni kovapongoki navenye
5 morwa one kuna kundindira mfeto zeni meguru. One kwa zuvha kuhamena ehuguvaro eli kupitira mousili wombudi zongwa
6 ezi mwa gwana. Ngamoomu tupu mbudi zongwa zina kuyima noku lihanena mouzuni naunye, yimo hena zina kuyima nokulihanena mokatji keni kutunda tupu apa mwa zuvha nokudiva nawa-nawa nkenda zaKarunga zonene.
7 Oyo yiyo mwa lironga komurugani mukwetu gokuhara Epafurasa, mukareli gwaKristusa gomulimburukwi ogu ga ya tu kwatera mo.
8 Age hena ga ya tu tantera kuhamena eharo lyeni eli mwa tunga po nevatero lyompepo zokupongoka.
9 Yipo nye kutunda apa twa zuvha kuhamena eharo nepuro lyeni, kapi twa hageka kumukanderera po noku hundira asi va mu zwide ediwo lyousili kuhamena mpango zendi ntani mu gwane unongo wousili noku kwata egano yininke yaKarunga,
10 mu paruke monkedi ezi ga yi harera Jehova, yipo mu mu hafese ngomu muna kutwikira kuyima mwankenye yirugana yoyiwa ntani yipo ediwo lyeni lyousili kuhamena Karunga li kure;
11 ngava mu nkondopeke unene yipo ngomu vhure kulididimikira nawa-nawa noruhafo yeeyi age kwa kara nononkondo dononene.
12 Pandureni Guhyeni ogu ga mu ninka mu wapere kukagwana upingwa ou va tumbwidira vapongoki ava ava gendi mouzera.
13 Age kwa tu zowora mononkondo domundema noku tu rundwilira mouhompa waMunendi ogu ga hara,
14 ogu ga tu mangurura kupitira mosizoweseso, a dongonone po nonzo detu.
15 Age kwa kara noyikara yokulifana neyi yaKarunga ogu atu dili kumona, age yige mbeli koyisitwa nayinye.
16 Yininke nayinye kwa yi sitira mwendi, yi kare asi yemeguru ndi yepevhu, eyi ayi moneka ndi eyi ayi dili kumoneka, vapangeli ndi vanamadina, mapangero ndi vanankondo. Yininke nayinye yapeke kwa yi sitira mwendi, yi kare yendi.
17 Age yipo ga kere komeho yi kare po yininke nayinye yapeke ntani yininke nayinye yapeke kwa ya kara po kupitira mwendi.
18 Age yige mutwe gorutu kutanta asi mbungakriste. Age yige etameko, yige mbeli ogu va hova kupindura koufe yipo a kare gokuhova mwanayinye;
19 morwa Karunga kwa here asi yikara yendi nayinye yi kare mwendi.
20 Kupitira mohonde zaKristusa ezi za tjikangerere kositji,* Karunga kwa tulisa po mbili yiyo ga litengwidira yininke nayinye yapeke, yemeguru neyi yepevhu.
21 One kwa kere nonkore daKarunga ntani kwa kere ure nage morwa one ngomu gazara yininke yoyidona.
22 Ano ngesi age kuna kumulitengwidira kupitira morutu rogu ga ligeve mwene monomfa, yipo mu pongoke kosipara sendi, mu zere mwa hana epuko.
23 Nye mwa hepa kutwikira kukara nepuro eli va tateka lyakora, yipo va dire kumugusa ko kehuguvaro lyombudi zongwa ezi mwa zuvha ntani va zuvhisira mouzuni mudima kovantu navenye. Ame Paurusa kwa horowora nge ni zuvhise mbudi ezi zongwa.
24 Ame nina hafa mokuhepera uwa weni ntani ame kuna kuhepa ngwendi Kristusa nye simpe na hepa kutwikira kuhepera rutu rwaKristusa, kutanta asi mbungakriste.
25 Ame kuruganena vantu vaKarunga morwa yige ga pa nge sirugana esi. Eyi yiyo ani zuvhisire nonkango daKarunga paapa na hulira yipo mu gwanene mo uwa.
26 Sihoramo saKarunga esi sa horamene kouzuni ntani kovantu vanare, ngesi va si horwera vapongoki vendi.
27 Ntani hena, Karunga kwa yi haferere yokuhorwera nomuhoko sihoramo esi souyerere, Kristusa ogu ga kara mouumwe none, eyi kutanta asi mwa kara nehuguvaro lyokukamuyererepeka kumwe nage.
28 Yige tuna kuudisa oku tatu rondora nokuronga navenye mounongo wousili, yipo tu vatere nkenye ogu ga kara mouumwe naKristusa a kore, tu mu gave kwaKarunga.
29 Eyi yiyo ani ruganene unene nokukondja nononkondo edi a pe nge.
