Mbilive koVakorosi 2:1-23
2 Yeeyi nina hara mu dive omu nina kukondja unene ni mu vatere kumwe nava womoRawodikeya ntani nanavenye ava va dira kumona nge.*
2 Ame kuyiruganena eyi yipo va gwane ehengagwido ntani va likwatakane meharo. Monkedi ezi awo ngava gwana ungawo, kutanta asi ngava kwata nawa egano noku kara nediwo lyousili kuhamena Kristusa, age yige sihoramo saKarunga.
3 Ungawo naunye wounongo nediwo kwa horama mwendi.
4 Ame kuna kuyimutantera eyi yipo va dire kumupukisa nononkango doyineya.
5 Nampili ngomu nina dili kukara none, nye none nina kara pampepo. Ame nina hafa kweyi muna kara moukaro wouwa ntani kweyi mwa huguvara Kristusa nomutjima nagunye.
6 Moomu nye ngoso mwa tambura Hompa Jesus Kristusa, twikireni kugenda nage,
7 epuro lyeni mwaKristusa li nkondope nokupama ngwendi nondandani dositji edi da simbama mevhu ngamoomu va yi mu ronga ntani omu pandure Karunga nkenye apa.
8 Takameseni asi va ha mu kwata mosiraha nounongo wouzuni nomagano goyimpempa aga ga tunda konompo dovantu nokoyininke youzuni ya hana asi kwaKristusa
9 ogu ga kara noyikara yaKarunga nayinye.
10 One kwa gwana nayinye kupitira mwendi, age yige mutwe gomapangero novanankondo navenye.
11 Kupitira melikwatakano lyeni kumwe nage, yimo va mu ruganena yovamba, kapisi nomawoko govantu nye nani pokuhutura marutu gokudira kusikilira mo, ezi yizo vamba zaKristusa.
12 Yeeyi one kwa mu vhumbika kumwe nage pokugwana ekuho ngwendi lyendi ntani one kwa mu pindura kumwe nage morwa mwa kara nelikwatakano nage ntani mwa kara nepuro moyirugana yaKarunga yononkondo. Age kwa pindwire Kristusa koufe.
13 Ntani hena, nampili ngomu mwa fire mononzo deni, one va hana kumurugana yovamba, Karunga kwa mu parura kumwe nage. Age kwa tu dongwenena po nonzo detu nadinye nomutjima nagunye
14 ntani kwa dongonona po Veta zonompango dononzi ezi va tjenge mokuhorora nonzo detu. Age kwa gusa po Veta ozo kupitira monomfa daKristusa dokositji.*
15 Age kwa funda mapangero novanankondo ntani kwa ga tura mounkwate noku ga fisa nomuga moyitarameho mokuyilikida asi age ga ga funda.
16 Yipo nye, ga ha mu pangura muntu kuhamena eyi omu li neyi omu nu ndi yokudana sipito ndi kwedi kokupe ndi yesabata.
17 Yininke oyo kuna kara tupu mundunduma goyininke eyi ngayi wiza nye rutu rwene ko Kristusa.
18 Takameseni kwava ava lininkisa asi kwa linunupika ntani nava ava karere vaengeli, morwa kuvhura ngava mu ninkise mu dire kukagwana mfeto. Awo kulikangangera eyi ava mono ntani awo kulinenepekera yininke yokudira mulyo, yeeyi awo kugazara tupu yopanyama.
19 Vantu vangoso kapi ava kwaterere komutwe, kutanta asi kogu a gava eyi rwa hepa rutu narunye ntani ogu a ninkisa maruha nagenye ga likwatakane. Karunga kuninkisa rutu narunye ru kure kupitira mwendi.
20 Nani one kapi mwa fa kumwe naKristusa pokunyoka magano gouzuni? Nsene asi yimo, morwasinke nye omu parukire ngwendi asi kwa hamena kouzuni? Ntani morwasinke omu limburukwire nompangera edi asi:
21 “Walye omu gusa, walye omu makere, walye omu kwata?”
22 Yeeyi yininke eyi kuzonauka pokuyiruganesa ntani nompangera edi kuna kara noveta nomarongo govantu.
23 Nampili ngomu nompangera odo adi moneka ngwendi unongo, kapi adi vatere vantu va funde po madowo gawo gorutu ntani awo kulimburukwa nompangera odo morwa awo kutokora pwavene omu nava karera Karunga. Awo kuhepeka marutu gawo yipo va moneke kovantu asi va linunupika.
