Mbilive koVakorosi 3:1-25
3 Nsene asi one kwa mu pindura naKristusa, kondjereni yininke yemeguru omu ga hingira Kristusa korulyo rwaKarunga.
2 Nondunge deni di demenene koyininke yemeguru, nye kapisi kweyi yepevhu.
3 Yeeyi one kwa fa, ano eparu lyeni kwa li gava mwaKristusa ogu ga kara mouumwe naKarunga.
4 Apa nga moneka Kristusa ogu a gava eparu, none ngomu ka moneka nage mouyerere wendi.
5 Yipo nye, dipageni madowo geni gorutu ngwendi gaaga: ruhonda,* yirugana yokunyata, ruho,* magazaro gomadona ntani nedowo, morwa edowo kwa lifana nokukarera vakarunga woyimpempa.
6 Karunga nga handukira vantu ava ava rugana yininke oyo.
7 None yininke oyo yiyo ngomu rugana nare.
8 Nye ngesi zumbeni nayinye eyi: ukenya, ehandu, udona, nonkango donondona ntani motuna tweni mwa ha tunda nonkango donomuga.
9 Mwa ha litantera-tantera yimpempa. Hutureni muntu gomukuru-kuru noyirugana yendi yanare,
10 makura mu dware muntu gomupe ogu a twikire kukara gomupe kupitira mediwo lyousili nokulikida yikara yogu ga mu sita,
11 mwendi navenye kwa hetakana, yi kare asi Mugereka ndi Mujuda ndi ogu va rugana yovamba ndi ogu va dira kurugana yovamba, munayirongo ndi Musitiya,* mupika ndi mumanguruki, Kristusa kwa kara mwanayinye ntani ose kwa kara mouumwe nage.
12 Yipo nye asi one ava ga horowora Karunga, vapongoki ava ga hara, kareni* nomalizuvho geharo nonkenda nelinunupiko nougomoki ntani nedidimiko.
13 Twikireni kulididimikira-didimikira nokulidongwenena-dongwenena po nomutjima nagunye nsene wopeke vana mu zonene. None mwa hepa kuvadongwenena po nomutjima nagunye moomu ga mu dongwenena po none Jehova.
14 Nye unene po, dwareni eharo, yeeyi alyo kukwatakanesa nawa-nawa vantu mouumwe.
15 Pulisireni hena mbili zaKristusa zi pangere monomutjima deni, yeeyi mbili ozo yizo va mu zigidira mu kare rutu rumwe. Ntani omu pandure nkenye apa.
16 Pulisireni nonkango daKristusa di kare mweni nawa-nawa, yipo mu kare vanongo. Twikireni kulironga-ronga nokulikorangeda-korangeda* nonomutango dokupongoka, hamberereni Karunga, dimbeni nonsumo doukareli norupandu, oku tomu dimbire Jehova nonomutjima deni.*
17 Nkenye tupu eyi muna kuuyunga ndi muna kurugana, yi ruganeni medina lyaHompa Jesus, oku tomu pandura Karunga, Guhya, kupitira mwendi.
18 One vakadi, nkenye ogu a limburukwe kwamugara gwendi, yeeyi eyi yiyo ga hara Hompa.
19 One vagara, nkenye ogu a hare mukadendi ntani ga ha mu tekura nonyanya.
20 One vanona, omu limburukwe kovakurona veni mwanayinye, yeeyi ayo kuhafesa Hompa.
21 One vaguhya, walye omu nyegenyesa vana veni, neisi va dompa mutjima.
22 One vapika, limburukweni vahekuru veni vepevhu mwanayinye, kapisi paapa tupu ava mu tarere yipo mu hafese vantu,* nye omu yi rugane nomutjima nagunye morwa mwa tjira Jehova.
23 Nkenye eyi muna kurugana, omu yi rugane nomutjima nagunye, ngwendi googu a ruganene Jehova, nye kapisi vantu,
24 yeeyi mwa yi diva asi ngomu ka gwana upingwa kwaJehova ngomfeto. Ruganeneni Hekurweni, Kristusa.
25 Ogu a rugana yoyidona ngava mu tengeka koudona ou ga rugana, yeeyi Karunga kapi ga paka mpongo.
Nonkango dokonhi
^ Edowo lyokuhara kuligwanekera panyama nkenye siruwo nankenye ogu.
^ Nkango ezi zoRugereka kwa tamba kovantu ava ngava tara asi kwato mulyo morwa mparukiso nompo zawo.
^ MoRugereka asi “dwareni.”
^ Ndi “nokulipukurura-pukurura.”
^ Ndi “monomutjima deni.”
^ MoRugereka asi “kapisi mokulimonekesa ngwendi ava va hara kuhafesa vantu.”
