Vapanguli 1:1-36
1 Konyima zapa ga fire Josuwa, Vaisraeli* kwa pulire Jehova asi: “Yilye mokatji ketu ogu na hova kuza a ka rwise Vakanani?”
2 Jehova ta limburura asi: “Womorudi rwaJuda yiwo nava hova kuza. Ame kuna kugava* sirongo momawoko gawo.”
3 Makura womorudi rwaJuda tava tantere womorudi rwaSimiyoni asi: “Tu zeni kumwe mosirongo esi va tu pa tu ka rwise Vakanani. Konyima nose ngatu ya ze none mosirongo seni tu ka mu vatere.” Makura womorudi rwaSimiyoni tava zi kumwe nawo.
4 Apa va zire womorudi rwaJuda, Jehova kwa geve Vakanani noVaperesi momawoko gawo ntani awo kwa fundire vagara 10 000 womositata saBeseki.
5 Awo kwa ka gwene Adoni-beseki mositata saBeseki, tava mu rwisa, makura tava fundu Vakanani noVaperesi.
6 Apa ga dukire Adoni-beseki, awo tava mu tjida makura tava mu kwata ntani tava tete ko mapumbwara gendi gokonompadi naga gokomawoko.
7 Makura Adoni-beseki ta tanta asi: “Koveli vahompa 70 ava va teta mapumbwara gawo gokonompadi naga gokomawoko, ava ava toragura nondya edi adi gu kositafura sange. Karunga ana tengwida nge kuwoko pokurugana nge yokulifana.” Kutunda opo, tava mu twara koJerusarema makura ta ka fira kooko.
8 Vagara womorudi rwaJuda kwa homokerere hena sitata saJerusarema, tava si kwata. Awo kwa dipagere vantu womositata oso norufuro, makura tava si hwike.
9 Konyima, vagara womorudi rwaJuda kwa zire va ka rwise Vakanani ava va tunga momukunda gonondundu, moNegebu ntani moSefera.
10 Makura vagara womorudi rwaJuda tava ka rwisa Vakanani ava va tungire mositata saHeburoni, (Sitata saHeburoni ngava si tumbura nare asi Kiliyata-aruba.) tava ka dipaga Sesayi, Ahimani ntani Talimayi.
11 Kutunda opo, tava zi va ka homokere vantu ava va tunga moDebire. (Sitata saDebire ngava si tumbura nare asi Kiliyata-sefere.)
12 Makura Karebu ta tanta asi: “Mugara ogu nga rwisa sitata saKiliyata-sefere a si kwate, ngani mu ninka a kware munange Akisa.”
13 Makura Otiniyeli munaKenasi ta ka si kwata. Kenasi kwa kere mumbyaKarebu, ano Karebu ta mu pe munendi Akisa a mu kware.
14 Apa ga kere Akisa monzira zokuza kembo, ta tantere mugara gwendi a hundire epya koguhwe Karebu. Makura Akisa ta humburuka posindongi* sendi, ano oguhwe tava mu pura asi: “Yisinke ono hara?”
15 Age ta tanta asi: “One mwa pa nge sirongo sokoMbindakano,* tungikeni nge hena mu pe nge Guroti-mayimu.”* Makura Karebu ta mu pe sirongo saGuroti sokondundu nesi semedamenena.
16 Ano womoruvharo rwatamweyi zaMosesa goMukeni kwa tundire mositata soyitji yonongone kumwe novantu womorudi rwaJuda, va ze momburundu zaJuda koMbindakano zaAradi. Makura tava ka tunga kooko mokatji kovantu.
17 Nye womorudi rwaJuda noru rwaSimiyoni kwa rwisire Vakanani ava va tungire mositata saSefati, tava si zonagura po. Makura tava ruku sitata oso asi Horoma.*
18 Konyima, womorudi rwaJuda kwa kwete sitata saGasa nomukunda gwaso, sitata saAsikeroni nomukunda gwaso ntani sitata saEkironi nomukunda gwaso.
19 Jehova kwa kere novantu womorudi rwaJuda ntani awo kwa gusire mukunda gonondundu, nye kapi va vhulire kutjida mo vantu ava va kere mezana, yeeyi awo kwa kere noturukara toyita otu twa kara nomarufuro komakoso.*
20 Awo kwa geve sitata saHeburoni kwaKarebu ngwendi moomu ga mu tumbwidilire Mosesa ntani age kwa tjidire mo womoruvharo rovana vaAnaki vatatu.
21 Nye womorudi rwaMbenyameni kapi va tjidire mo Vajebusi ava va tunga moJerusarema, yipo nye, Vajebusi kwa tunga kumwe novantu womorudi rwaMbenyameni moJerusarema dogoro naina.
22 Ano womoruvharo rwaJosefa kwa rwisire sitata saBeteli ntani Jehova kwa kere nawo.
23 Awo kwa nomenene* sitata saBeteli (sitata saBeteli ngava si tumbura nare asi Rusu),
24 makura tava mono mugara ana kutunda mositata, tava mu pura asi: “Tuna kanderere, tu likida oku natu hwililira mositata ngatu ku fire nkenda.”*
25 Mugara ogo ta va likida oku nava hwililira, makura awo tava dipaga vantu womositata oso norufuro, nye awo kapi va dipagere mugara ogo nepata lyendi.
26 Mugara ogo ta zi kosirongo soVaheti makura ta ka tunga sitata, ta si ruku Rusu. Sitata oso kusitumbura asi Rusu dogoro naina.
27 Womorudi rwaManase kapi va gusire sitata saBete-seni nonodoropa edi da si kundurukida, sitata saTanaki nonodoropa edi da si kundurukida ntani kapi va tjidire mo vantu ava va tungire mositata saDoro nonodoropa edi da si kundurukida, womositata saIbiliyamu nonodoropa edi da si kundurukida ntani womositata saMegido nonodoropa edi da si kundurukida. Vakanani kapi va here kutunda mo mosirongo.
28 Vaisraeli apa va kere nononkondo, awo kwa ninkire Vakanani va rugane yirugana youdigu,* nye awo kapi va va tjidire mo.
29 Womorudi rwaEfurayimi nawo kapi va tjidire mo Vakanani ava va tungire mositata saGesere. Vakanani kwa twikilire kutunga moGesere mokatji kawo.
30 Womorudi rwaSeburoni kapi va tjidire vantu ava va tunga mositata saKitironi ntani ava va tunga moNaharoli. Vakanani kwa twikilire kutunga mokatji kawo ntani awo kwa va ninkire va rugane yirugana youdigu.
31 Womorudi rwaAseli kapi va tjidire mo vantu ava va tungire mositata saAko, Sidoni, Ahirabu, Akisibu, Heliba, Afiki ntani Rehobu.
32 Awo kwa tungire mokatji koVakanani ava va tungire mosirongo oso, morwa awo kapi va va tjidire mo.
33 Womorudi rwaNafitali kapi va tjidire vantu ava va tungire mositata saBete-semesi ntani nava va tungire moBete-anati, nye awo kwa tungire mokatji koVakanani ava va tungire mosirongo. Vantu womositata saBete-semesi naBete-anati kwa va ninkire va rugane yirugana youdigu.
34 Vaamoli kwa ninkisire vantu womorudi rwaDana va kare momukunda gonondundu, yeeyi awo kapi va va pulisilire va ka tunge momazana.
35 Yipo nye, Vaamoli kwa twikilire kutunga koNdundu zaHeresi, moAiyaroni ntani moSalibimu, nye apa va kere nononkondo womoruvharo rwaJosefa, awo kwa va ninkire va rugane yirugana youdigu.
36 Mukunda goVaamoli kwa tamekerere koAkarabimu ntani kutundilira koSera yi kandwise.
Nonkango dokonhi
^ MoRuhebeli asi “vana vaIsraeli wovagara.”
^ Ndi “kwa gava.”
^ Ndi nampo asi “ta sakerere age posindongi.”
^ Ndi “Negebu.”
^ Kutanta asi “Mavango gomema.”
^ Kutanta asi “Evango eli ngava zonagura po.”
^ MoRuhebeli asi “turukara toyivera.”
^ Ndi “nengere.”
^ MoRuhebeli asi “ngatu ku likide eharo lyanarunye.”
^ Ndi “yokomusininiko.”
