Vapanguli 11:1-40
11 Jefuta kwa kere Mugiliyata ntani age kwa kere mukwayita gononkondo. Ozina kwa kere hondedi, ano edina lyoguhwe kwa kere Giliyata.
2 Nye mukadaGiliyata* nage kwa mu reterere hena vana wovagara. Apa va kulire, awo kwa tjidire Jefuta membo lyawo, tava mu tantere asi: “Ove kapi ngo pinga yuma membo lyotate, yeeyi ove kwa kuretera pomukadi gwapeke.”
3 Makura Jefuta ta va sigi ta ka tunga mosirongo saTobo. Ano vagara wokudira yirugana tava lipakerere nendi va mu kwame.
4 Konyima, Vaamoni tava rwisa Vaisraeli.
5 Vaamoni apa va rwisire Vaisraeli, masimbi gomoGiliyata taga zi usimbu ga ka simbe Jefuta kosirongo saTobo.
6 Makura tava tantere Jefuta asi: “Tu ze o ka tu pitisire tu ka rwise Vaamoni.”
7 Nye Jefuta ta tantere masimbi gomoGiliyata asi: “Nani kapisi nyone mwa tjidire nge membo lyotate morwa kwa nyenga nge? One kuna wiza kwange yeeyi muna kuligwanekera noudigu.”
8 Makura masimbi gomoGiliyata taga tantere Jefuta asi: “Nhi, yiyo tuna wizire koge. Nsene no za o ka tu vatere tu ka rwise Vaamoni, ove ngo pangera vantu navenye ava va tunga moGiliyata.”
9 Jefuta ta tantere masimbi gomoGiliyata asi: “Nsene nani za none tu ka rwise Vaamoni, makura Jehova nga vatere nge ni va funde, ame ngani kara mupangeli gweni.”
10 Makura masimbi gomoGiliyata taga tantere Jefuta asi: “Jehova a kare mbangi pokatji ketu ntani nga tu pangure nsene kapi ngatu sikisa mo eyi tuna uyunga.”
11 Jefuta ta zi nomasimbi gomoGiliyata makura vantu tava mu horowora a kare mupangeli nomupitisili gwawo. Ano Jefuta ta ruguruka kuuyunga nonkango dendi komeho zaJehova moMisipa.
12 Makura Jefuta ta tumu vantu kwahompa goVaamoni, va ka mu tantere asi: “Yisinke na mu zona eyi muna kuyahomwena sirongo sange?”
13 Makura hompa goVaamoni ta tantere vantu ava ga tumine Jefuta asi: “Ame kuna kumuhomona morwa apa va tundire Vaisraeli moEgipite, awo kwa ya gusire sirongo sange kutundilira koArunoni dogoro koJaboko yi tware dogoro komukuro gwaJorodana. Tengwidireni nge sirongo sange, yipo tu kare mombili.”
14 Nye Jefuta ta tumu hena vantu vendi kwahompa goVaamoni
15 va ka mu tantere asi:
“Jefuta kuna tanta asi: ‘Vaisraeli kapi va gusa sirongo soVamowaba nosirongo soVaamoni,
16 yeeyi apa va tundire moEgipite, awo kwa pitire momburundu dogoro kEfuta lyEgeha makura tava ka sika moKadesi.
17 Makura Vaisraeli yipo va tumine vantu kwahompa gwaEdomu, tava ka mu tantera asi: “Tu pulisira tu pite mosirongo soge,” nye hompa gwaEdomu kapi ga va purakenene ntani hena awo kwa tumine mbudi kwahompa goVamowaba, nye nage kapi ga va pulisilire. Makura Vaisraeli yipo va twikilire kutunga moKadesi.
18 Apa va pitire Vaisraeli momburundu, awo kwa kundurukire sirongo saEdomu nosirongo saMowaba. Awo kwa pitilire koUpumezuva wosirongo saMowaba tava dike notende dawo momukunda gwaArunoni. Awo kapi va hederere komururani goVamowaba, yeeyi Arunoni kwa kere mururani goVamowaba.
19 “‘Konyima, Vaisraeli kwa tumine vantu kwaSihoni hompa goVaamoli ogu nga pangere moHesiboni, tava mu tantere asi: “Tu pulisira tu pite mosirongo soge tu ze kosirongo setu.”
20 Nye Sihoni kapi ga pulisilire Vaisraeli va pite mosirongo sendi morwa kapi ga va huguvarere, makura yipo ga pongaikire vantu vendi, tava ka dika notende moJahasi va rwise Vaisraeli.
21 Makura Jehova Karunga goVaisraeli ta gava Sihoni novantu vendi navenye momawoko gawo. Yipo nye, Vaisraeli kwa fundire Vaamoli womomukunda ogo, tava gusa sirongo nasinye esi va tungire.
22 Awo kwa gusire sirongo nasinye soVaamoli kutundilira koArunoni dogoro koJaboko ntani kutundilira komburundu dogoro komukuro gwaJorodana.
23 “‘Jehova Karunga goVaisraeli yige ga tjidire mo Vaamoli, makura ove ono hara kutjida mo Vaisraeli ndi?
24 Nani one kapi omu gusa nkenye eyi a mu pe karunga gweni Kemosi? Yipo nye, nose kutjida nkenye ogu a tjida Karunga gwetu Jehova.
25 Ove ngoso wa pitakana Baraka munaSiporo hompa gwaMowaba ndi? Age kapi ga rumbasanene noVaisraeli ndi a va rwanese.
26 Apa va tungire Vaisraeli mositata saHesiboni nomonodoropa edi da si kundurukidire, nomositata saAroere nomonodoropa edi da si kundurukidire, ntani apa va tungire nomvhura 300 moyitata nayinye eyi ya kara konontere daArunoni, morwasinke wa dilire kuyigusa posiruwo sina?
27 Ove wa lipuka kuhomona nge, morwa ame kwato eyi na ku rugana. Naina Jehova ngano a kare mupanguli pokatji koVaisraeli noVaamoni.’”
28 Nye hompa goVaamoni kapi ga purakenene kombudi ezi ga mu tumininine Jefuta.
29 Jehova kwa pere Jefuta mpepo zendi zokupongoka, makura Jefuta ta piti momukunda gwaGiliyata ntani mosirongo saManase a ze kositata saMisipa* esi sa kara momukunda gwaGiliyata. Ano apa ga tundire moMisipa ta zi koVaamoni.
30 Makura Jefuta ta tumbwidire Jehova asi: “Nsene ngo gava Vaamoni momawoko gange,
31 nkenye ogu nga hova kupwaga membo lyange a simbagwire nge apa ngani ka funda Vaamoni, ngani mu gava ngonzambo zeswakerero koge Jehova.”
32 Makura Jefuta ta zi a ka rwe yita noVaamoni, ano Jehova ta va gava momawoko gendi.
33 Age kwa dipagere Vaamoni kutundilira koAroere dogoro koMiniti ntani dogoro koAbeli-keramimu. Jefuta kwa dipagere vantu wovanzi nokukwata yitata 20. Yipo nye, Vaamoni kwa va fundire komeho zoVaisraeli.
34 Konyima, Jefuta ta zi kembo lyendi koMisipa. Ano munendi ta pwaga membo a mu simbagwire, age kuna kusika kangomagona oku ta dana. Age yige gelike munendi ga kere, age kapi ga kere hena nomuna gomugara ndi gomukadi.
35 Apa ga mu mwene, ta taura yikoverero yendi, ta tanta asi: “Nane munange! Ono guvisa nge, morwa tani ku tumu koure. Ame na tumbwidira Jehova, kapi tani vhuru kuteza po mugano gwange.”
36 Nye munendi ta mu tantere asi: “Tate, nsene asi one kwa tumbwidira Jehova, sikiseni mo eyi mwa tumbwidira, morwa Jehova ga funda nonkore deni Vaamoni.”
37 Ta tantere hena oguhwe asi: “Eyi yiyo nina hara kurugana: Pulisireni nge ni ka kare nyamelike makwedi gavali konondundu, ni ka lire kumwe novakwetu morwa kapi ngani kwara.”*
38 Makura oguhwe tava mu tantere asi: “Zende!” Age ta zi konondundu, ta ka kara ko makwedi gavali kumwe novakwawo a ka lire, morwa kapi nga kwara.
39 Apa ga pwire makwedi gavali, ta tengura koguhwe, ano oguhwe tava rugana eyi va tumbwidilire. Age kapi ga ligwanekerere panyama nomugara. Vaisraeli ngava rugana yininke eyi nkenye apa:
40 Nkenye mvhura vakadona woVaisraeli ngava zi va ka korangede* munaJefuta goMugiliyata. Awo ngava yi rugana mazuva gane tupu momvhura.
Nonkango dokonhi
^ Kwa tamba komukadi gwapeke.
^ MoRuhebeli asi “Misipe,” ezi nkedi zapeke omu ava litjanga.
^ Ndi “ni ka lire ukadona wange kumwe novakadona vakwetu.”
^ Ndi “va ka mu pandadeke.”
