Vapanguli 12:1-15
12 Vagara womorudi rwaEfurayimi tava pongo, makura tava rutu va ze mesinya mwina koSafoni,* tava ka tantera Jefuta asi: “Morwasinke wa dilire kutuzigida tu ka ku vatere apa wa zire o ka rwise Vaamoni? Ose ngatu kuhwikilira membo lyoge.”
2 Nye Jefuta ta va tantere asi: “Name novantu vange kwa rwire yita yoyinene kumwe noVaamoni. Ame na mu zigidire mu ya vatere nge, nye one kapi mwa ya poperere nge momawoko gawo.
3 Apa na mwene asi kapi muna kuwiza mu ya popere nge, yipo na tokwere kutura eparu lyange mosiponga ni ka rwise Vaamoni, ano Jehova kwa va geve momawoko gange. Morwasinke nye muna wizire naina mu ya rwanese nge?”
4 Jefuta makura ta pongaike vagara womomukunda gwaGiliyata, tava rwisa vagara womorudi rwaEfurayimi makura tava fundu Vaefurayimi ava va tente asi: “Nampili ngomu mwa tunga one Vagiliyata mosirongo saEfurayimi naManase, one vatjwayuki womosirongo saEfurayimi.”
5 Vagara womomukunda gwaGiliyata kwa kwete mavango gokurutira gaJorodana, makura tava tura po vagara va kondere womorudi rwaEfurayimi. Apa vagara womorudi rwaEfurayimi va here kuruta, vagara womoGiliyata ngava va pura asi: “One womorudi rwaEfurayimi ndi?” Ano nsene va limburura asi: “Hawe,”
6 awo ngava va pura va uyunge asi: “Shibboleth.” Nye awo ngava uyunga asi: “Sibboleth,” morwa kapi ngava vhuru kutumbura nawa nkango ozo. Makura awo ngava va kwata nokuvadipagera pomavango gokurutira mukuro gwaJorodana. Posiruwo oso, awo kwa dipagere womorudi rwaEfurayimi 42 000.
7 Jefuta kwa kere mupanguli moIsraeli nomvhura ntazimwe. Konyima, Jefuta gomoGiliyata ta dogoroka, makura tava mu horeke mositata esi ga tungire moGiliyata.
8 Konyima zonomfa dendi, Ibisani gomoBeterehema ta kara mupanguli moIsraeli.
9 Age kwa kere novana wovagara 30 ano wovakadi 30. Age kwa ninkire vana vendi wovakadi va ka kwarere mepata lyapeke ntani ta ka reta vakadi 30 va va kware vana vendi wovagara. Age kwa kere mupanguli moIsraeli nomvhura ntambali.
10 Makura Ibisani ta dogoroka, tava mu horeke moBeterehema.
11 Konyima zonomfa dendi, Eroni gomorudi rwaSeburoni ta kara mupanguli moIsraeli. Age kwa pangerere Vaisraeli nomvhura 10.
12 Makura Eroni gomorudi rwaSeburoni ta dogoroka, tava mu horeke mositata saAiyaroni mosirongo saSeburoni.
13 Konyima zonomfa dendi, Abudoni munaHireli gomoPiratoni ta kara mupanguli moIsraeli.
14 Age kwa kere novana 40 novatekuru 30 ava va kere noyindongi 70 eyi ngava rondo. Age kwa kere mupanguli moIsraeli nomvhura ntantatu.
15 Makura Abudoni munaHireli gomoPiratoni ta dogoroka. Age kwa mu horekere moPiratoni mosirongo saEfurayimi, kondundu zoVaamareki.
Nonkango dokonhi
^ Ndi nampo asi “va ze koMuzogo.”
