Vapanguli 13:1-25
13 Vaisraeli tava rugana hena yininke yoyidona kosipara saJehova, makura Jehova tava gava momawoko goVafilisiti nomvhura 40.
2 Posiruwo oso, pwa kere mugara gomoSora gomorudi rwaDana, edina lyendi kwa kere Manowa. Mukadendi kwa kere nganze.
3 Makura muengeli gwaJehova ta monekere mukadi ogo, ta mu tantere asi: “Nampili ngomu wa kara nganze, ove ngo kara nezimo makura ngo reta munona gomumati.
4 Yipo nye, kapisi ngo nwe vhinyu ndi o nwe nkenye marovhu ntani kapisi ngo lye nkenye eyi yokudira kukuhuka.
5 Ove ngo kara nezimo ntani ngo hampuruka munona gomumati. Age kapisi ngava mu kurure nohuki, yeeyi age nga kara Munasili kutunda apa ngava mu hampuruka* ntani nga ruganena Karunga. Age nga popera Vaisraeli momawoko goVafilisiti.”
6 Makura mukadi ogo ta zi ta ka tantera mugara gwendi asi: “Muntu gwaKarunga gousili ana wiza kwange ntani age kuna moneka ngwendi muengeli gwaKarunga gousili. Emoneko lyendi kutetukisa sili. Kapi nina mu pura oku ana tundu ntani kapi ana tanterere nge edina lyendi.
7 Nye age kuna tantere nge asi: ‘Ngo kara nezimo ntani ngo hampuruka munona gomumati. Yipo nye, kapisi ngo nwe vhinyu ndi ngo nwe nkenye marovhu ntani kapisi ngo lye nkenye eyi yokudira kukuhuka, yeeyi munona ogo nga kara Munasili ntani nga ruganena Karunga kutunda apa ngava mu hampuruka* dogoro konomfa dendi.’”
8 Manowa ta likwambere kwaJehova asi: “Gusira nge po Jehova. Ninka mukareli goge ogu wa tumine, a wize hena a ya tu tantere eyi natu rugana kuhamena munona ogu ngava hampuruka.”
9 Karunga gousili ta purakene kwaManowa, makura muengeli gwaKarunga gousili ta wiza a ya gwane mukadi age kuna hingire ponze zositata, nye mugara gwendi Manowa kapi ga kere po.
10 Makura mukadi ogo ta duka usimbu kwamugara gwendi, ta ka mu tantera asi: “Mugara gwina ga monekerere nge ezuva lina, ana wiza hena.”
11 Makura Manowa ta katuka ta zi namukadendi komugara ogo. Manowa ta mu pura asi: “Nyove wa uyungire namukadange ndi?” Mugara ogo ta limburura asi: “Nhi, nyame.”
12 Makura Manowa ta tanta asi: “Ngano ngayi sike mo eyi wa tente! Ngapi omu nga paruka munona ogo ntani yisinke nga rugana?”
13 Makura muengeli gwaJehova ta tantere Manowa asi: “Mukadoge nga sikise mo nayinye eyi na mu tantera.
14 Age kapisi nga lye nkenye eyi ayi tundu komandjembere. Age kapisi nga nwe vhinyu ndi nkenye marovhu ntani kapisi nga lye nkenye eyi yokudira kukuhuka ntani ga hepa kusikisa mo nayinye eyi na mu pangera.”
15 Makura Manowa ta tantere muengeli gwaJehova asi: “Kara tanko tu ku terekere sikombogona.”
16 Nye muengeli gwaJehova ta tantere Manowa asi: “Nsene ni kara kapi nani lya nondya deni, nye nsene muna hara kugava nzambo zeswakerero kwaJehova, zi gaveni.” Manowa kapi ga yi divire asi mugara ogo kwa kere muengeli gwaJehova.
17 Makura Manowa ta pura muengeli gwaJehova asi: “Yilye edina lyoge, yipo ngatu ku pandure* apa ngadi sika mo nonkango doge?”
18 Nye muengeli gwaJehova ta mu limburura asi: “Morwasinke ono kupulira nge edina lyange mokumona asi alyo ewa unene?”
19 Makura Manowa ta gusa sikombogona nonzambo zombuto ta yi zambere Jehova pemanya. Age* kwa rugene yininke yokutetukisa age Manowa namukadendi kuna kutara.
20 Muengeli gwaJehova kwa genderere momundiro ogu gwa tundire posizambero a ze meguru, age Manowa namukadendi kuna kutara. Makura tava ligandere pevhu va linyongamene.
21 Makura Manowa ta dimburura asi mugara ogo kwa kere muengeli gwaJehova. Kutunda opo, muengeli gwaJehova kapi ga monekerere hena Manowa namukadendi.
22 Manowa ta tantere mukadendi asi: “Ose tatu fu, morwa tuna mono Karunga.”
23 Nye mukadendi ta mu tantere asi: “Ngano Jehova kuna hara kutudipaga, ngano kapi ana tambura nzambo zetu zeswakerero ntani nonzambo zombuto. Age ngano kapi ana tu likida yininke nayinye eyi ndi a yi tu tantere.”
24 Konyima, mukadi ta hampuruka munona gomumati, ta mu ruku Simisoni. Apa ga kulire, Jehova kwa mu tungikire.
25 Konyima, mpepo zaJehova ta zi tameke kurugana mwendi apa ga kere moMahane-dana, evango eli lya kara pokatji kaSora naEsitaoli.
Nonkango dokonhi
^ MoRuhebeli asi “kutundilira mezimo.”
^ MoRuhebeli asi “kutundilira mezimo.”
^ Ndi “ku fumadeke.”
^ Kumoneka asi kwa tamba kwaKarunga.
