Vapanguli 14:1-20
14 Makura Simisoni ta zi koTimuna, ta ka mona mukadi goMufilisiti.
2 Makura ta zi, ta ka tantera oguhwe nozina asi: “Ame nina ka mona moTimuna mukadi goMufilisiti ogu nina hara. Nina hara mu ka mu simbe, yipo ngani mu kware.”
3 Nye oguhwe nozina tava mu tantere asi: “Ngoso kapi to vhuru kugwana mukadi mekoro lyetu ntani movantu vetu ndi? Yisinke no ka paparera mukadi mokatji koVafilisiti ava va dira kurugana yovamba?” Nye Simisoni ta tantere oguhwe asi: “Ka mu simbireni nge, morwa yige ga wapera nge.”
4 Ozina noguhwe kapi va yi dimbwilire asi Jehova yige ana kuyigendesa, yeeyi age* kwa paparere mpito yipo a tengeke Vafilisiti, morwa Vafilisiti kwa pangerere Israeli posiruwo oso.
5 Makura Simisoni ta zi kumwe noguhwe nozina koTimuna. Apa ga ka sikire poyikunino yomandjembere yomoTimuna, ta mu homokere nyime* age kuna kununga.
6 Makura mpepo zaJehova ta zi mu nkondopeke, ta papagura nyime nomawoko gendi ngwendi gogu ana kupapagura sikombogona. Age kapi ga tanterere oguhwe ndi ozina eyi ga rugene.
7 Makura Simisoni ta zi, ta ka uyungisa mukadi goMufilisiti ntani age kwa mu here simpe ngwendi pomuhowo.
8 Konyima apa ga tengwire hena koTimuna a ka simbe mukadi, ta zapuka a tare nyime ogu ga dipagere. Ta ka gwana mo nonyiki nousi.
9 Makura ta gusa usi nomawoko gendi, ta gendi oku ta li. Apa ga ka sikire koguhwe nozina, ta va pe ko va lye. Nye kapi ga va tanterere asi age kuna u gusa mwanyime ogu ga dipagere.
10 Kutunda opo, Simisoni noguhwe tava zi komukadi goMufilisiti, makura Simisoni ta ka rugana sipito, yeeyi yiyo ngava rugana vadinkantu wovagara.
11 Apa va mu mwene vantu, tava mu retere vagara 30 va mu karese ko.
12 Makura Simisoni ta va tantere asi: “Nina hara kumutera po rungano. Nsene nomu gwana elimbururo momazuva aga ntambali gosipito, ngomu li tantere nge makura ngani mu pe makehe 30 gomawa ntani noyikoverero 30.
13 Nye nsene kapi ngomu gwana elimbururo, ngomu pe nge makehe 30 gomawa ntani noyikoverero 30.” Awo tava tanta asi: “Tu tantera rungano roge, tuna hara kuruzuvha.”
14 Makura ta va tantere asi:
“Nondya kwa tundire mosininke esi a si li,ntani utovara kwa tundire mosininke sononkondo.”
Yisinke yina kutanta? Awo kapi va vhulire kugwana elimbururo momazuva gatatu.
15 Mezuva lyaune tava tantere mukadaSimisoni asi: “Genda mugara goge konhi yipo a tu tantere elimbururo. Nsene kapi ngo yi rugana, ngatu kuhwika kumwe nembo lyoguho. Nani ove kwa tu zigida yipo o ya guse emona lyetu?”
16 Makura mukadi ogo ta lilire mugara gwendi Simisoni asi: “Ove wa nyenga nge ntani kapi wa hara nge. Ove kwa tantera vantu vange rungano, nye kapi wa tantera nge eyi aru tanta.” Simisoni ta mu limburura asi: “Nampili onane notate kapi nava tantera elimbururo, ove nyove nani li tantera nye ndi?”
17 Nye mukadi ogo kwa lilililire Simisoni mazuva nagenye ntambali gosipito. Mezuva lyauntambali, ta mu tantere elimbururo, morwa age kwa mu sininikire. Makura mukadi ogo ta ka tantera vantu vendi elimbururo.
18 Mezuva lyauntambali komeho li ka toke ezuva,* vagara womositata tava mu tantere asi:
“Yisinke youtovara kupitakana usi,ntani yisinke yononkondo kupitakana nyime?”
Makura Simisoni ta va limburura asi:
“Ngano kapi ana mu vatere mukadange,*ngano kapi muna gwana elimbururo.”
19 Makura mpepo zaJehova ta zi mu nkondopeke, ta zi koAsikeroni ta ka dipaga vagara 30, ta gusa yikoverero yawo, makura ta yi gava kovagara ava va geve elimbururo. Age kwa handukire unene apa ga tengwire kembo lyoguhwe.
20 MukadaSimisoni tava mu gava kwagumwe govagara ava va wizire va ya karese ko Simisoni.
Nonkango dokonhi
^ Kumoneka asi kwa tamba kwaKarunga.
^ Ndi “nyimegona gomugara.”
^ Ndi nampo asi “komeho a ze monzugo zomonda.”
^ MoRuhebeli asi “ngano kapi muna purwisa ngombe zange.”
