Vapanguli 15:1-20
-
Simisoni ta tengwida kuwoko Vafilisiti (1-20)
15 Konyima zosiruwo, posiruwo sokuzangura rukokotwa, Simisoni kwa simbire sikombogona a ka dingure mukadendi. Age kwa tente asi: “Nina hara kuza kwamukadange monzugo zokurara.” Nye tamweyi zendi kapi ga mu pulisilire a hwilire mo.
2 Tamweyi zendi ta mu tantere asi: “Ame kwa gazara asi kapi wa mu hara. Yiyo na mu gava kwamukweni. Nani mumbyendi kapisi muwa unene kumupitakana? Gusa mumbyendi.”
3 Nye Simisoni ta tanta asi: “Sikando esi Vafilisiti kapisi va pe nge usima nsene nani rugana yoyidona.”
4 Simisoni ta zi, ta ka kwata vambanze 300, ta manga vambanze vavali-vavali konomusira makura ta mangerere ko noramba.
5 Age kwa hwamekere mundiro konoramba odo, makura ta tjidire vambanze momapya goVafilisiti. Age kwa hwikire nayinye, kutundilira koyitungu dogoro konombuto edi da kere mepya, kukwatera mo yitji yomandjembere nomauzwe.
6 Vafilisiti tava pura asi: “Yilye ogu ana yi rugana eyi?” Awo tava va tantere asi: “Simisoni ogu ga kwarera moTimuna, yeeyi tamweyi zendi kwa gusire mukadendi a mu gave kwamukwawo.” Makura Vafilisiti tava zi, tava ka hwika mukadi ogo noguhwe.
7 Makura Simisoni ta va tantere asi: “Nsene yimo mwa kara ngesi, ame kapi ngani hageka dogoro ngani mu tengwide kuwoko.”
8 Makura ta dipaga Vafilisiti wovanzi, ano konyima ta zi, ta ka kara mekombombo lyomomamanya aga ava tumbura asi Etamu.
9 Konyima Vafilisiti tava zi, tava ka dika notende dawo moJuda, makura tava homokere vantu womoRehi.
10 Vagara womorudi rwaJuda tava tanta asi: “Morwasinke muna kutuhomokerera?” Makura awo tava limburura asi: “Ose kuna wiza tu ya kwate* Simisoni, tu ya mu rugane eyi ga tu rugana.”
11 Makura vagara 3 000 womorudi rwaJuda tava zi mekombombo lyomomamanya aga ava tumbura asi Etamu. Awo kwa pulire Simisoni asi: “Ngoso kapi wa yi diva asi Vafilisiti yiwo ava tu pangere ndi?” Morwasinke wa tu ruganena yininke eyi? Age ta va limburura asi: “Ame kwa va tengwida kuwoko kweyi va rugana nge.”
12 Nye awo tava mu tantere asi: “Ose kuna wiza tu ya ku kwate,* tu ka ku gave koVafilisiti.” Makura Simisoni ta va tantere asi: “Tumbwidireni nge asi one kapi nomu toona nge.”
13 Awo tava mu tantere asi: “Hawe, ose tatu kumanga tupu tu ka ku gave, nye kapi tatu ku dipaga.”
Makura tava mu manga marugodi gavali gomape, tava mu gusa mo mekombombo.
14 Apa ga ka sikire koRehi, Vafilisiti tava zigire morwa awo kwa hefe apa va mu mwene. Makura mpepo zaJehova tazi mu nkondopeke, ano marugodi aga va mu menge taga ndembauka ngwendi makehe aga vana hwike ntani mauketanga taga gu ko komawoko gendi.
15 Simisoni ta gwana nompanda dosindongi sosigara makura ta di damuna, ta dipagesa ko vagara 1 000.
16 Makura Simisoni ta tanta asi:
“Ame kwa dipaga nonkore dange nonompanda dosindongi, yiyo na di pongaika nondambo.
Ame kwa dipaga vantu 1 000 nonompanda dosindongi.”
17 Apa ga mene kuuyunga, ta zuguma nompanda odo makura ta ruku evango olyo asi Ramata-rehi.*
18 Makura ta zuvhu enota, ta likwambere kwaJehova asi: “Ove nyove wa vatera mukareli goge a funde, na kanderere wa ha sigilira nge ni fe kenota ntani va dipage nge vagara ava va dira kurugana yovamba.”
19 Makura Karunga ta ninki mema ga tunde mekero eli lya kere moRehi. Apa ga ga nwine, ta kara hena nononkondo, ta ruku evango olyo asi Eni-hakore.* Evango olyo kwa kara moRehi dogoro naina.
20 Age kwa kere mupanguli nomvhura 20 posiruwo esi va pangerere Vafilisiti.
Nonkango dokonhi
^ Ndi “tu ya mange.”
^ Ndi “tu ya ku mange.”
^ Kutanta asi “Ndundu zonompanda.”
^ Kutanta asi “Runone romugara ogu ga likwamberere.”
