Vapanguli 16:1-31
16 Ezuva limwe, Simisoni kwa zire koGasa taka mona hondedi, makura ta hwilire monzugo zohondedi.
2 Vantu womositata saGasa kwa va tanterere asi: “Simisoni mweli mositata.” Makura awo tava kundurukida evango eli ga kere, tava mu vandere perungavero lyositata masiku nagenye. Awo kwa mwenene masiku mudima, tava litantere asi: “Apa na lisa, tatu mu dipaga.”
3 Nye Simisoni kwa rere dogoro pokatji komasiku. Makura ta pinduka, ta kwata mavero gerungavero lyositata nonongundi dako mbali makura ta yi dura nositji sako sokupatesa ko. Age kwa yi likambekere, ta yi twara keguru lyondundu ezi za livyuka naHeburoni.
4 Konyima, Simisoni ta tameke kuhara mukadi gedina Delira moMuramba gwaSoreki.
5 Makura vahompa woVafilisiti tava zire Delira, tava mu tantere asi: “Mu genda konhi,* yipo a ku tantere eyi ayi mu ninkisa a kare nononkondo dononene ntani nomu natu mu kwata tu mu mange, yipo tu mu funde. Nsene no yi rugana, nkenye gumwe gwetu nga ku pa yisiliveli 1 100.”
6 Konyima, Delira ta tantere Simisoni asi: “Na kanderere, tantera nge oku o gwana nonkondo doge ntani neyi nava kumangesa nomu nava kufunda.”
7 Simisoni ta mu limburura asi: “Nsene va manga nge nomarugodi ntambali gouta wonkanza* gokudira kukukuta, name kapi ngani kara nononkondo ngwendi vantu navenye.”
8 Makura vahompa woVafilisiti tava twarere Delira marugodi ntambali gouta wonkanza gokudira kukukuta, ano age taga manga Simisoni.
9 Makura tava ninki vagara va vande monzugo zapeke, ano Delira ta zigire asi: “Simisoni, Vafilisiti vana ya siki!” Makura Simisoni ta ndembura usimbu marugodi ogo ngwendi moomu wanda au ndembuka komundiro. Yipo nye, awo kapi va divire oku adi tundu nonkondo dendi.
10 Makura Delira ta tantere Simisoni asi: “Ove kuna kumbagere nge.* Na kanderere, tantera nge eyi nava ruganesa mokukumanga.”
11 Makura Simisoni ta mu tantere asi: “Nsene va manga nge nomarugodi gomape aga va dira kuruganesa rumwe, name kapi ngani kara nononkondo ngwendi vantu navenye.”
12 Makura Delira ta gusa marugodi gomape, taga mu manga ta zigire asi: “Simisoni, Vafilisiti vana ya siki!” (Posiruwo oso vagara kwa vende monzugo zapeke.) Makura Simisoni ta ndembura marugodi ogo komawoko gendi ngwendi wanda.
13 Konyima, Delira ta tantere Simisoni asi: “Ove kwa kumbagera nge siruwo nasinye. Tantera nge eyi nava kumangesa.” Makura Simisoni ta mu tantere asi: “Nsene o honza yikoka yange ntambali nowanda, ame kapi nani kara nononkondo.”
14 Makura Delira ta yi rugana, tadi kokere nosininke sokuhonzesa, ta zigire asi: “Simisoni, Vafilisiti vana ya siki!” Makura Simisoni ta pinduka, ta lizupura sininke sokuhonzesa ntani wanda.
15 Makura Delira ta mu tantere asi: “Ngapi omu no tanta asi wa hara nge nsene ove kapi wa huguvara nge? Ove kwa kumbagera nge yikando yitatu ntani kapi wa tantera nge oku o gwana nonkondo doge dononene.”
16 Simisoni kwa rorokere ntani kwa lizuvhire ngwendi a fe, morwa nkenye ezuva Delira nga mu sivanene noku mu sininika.
17 Makura Simisoni ta mu tantere nayinye. Age kwa mu tanterere asi: “Kapi va kurura nge rumwe nohuki dange dokomutwe, morwa ame Munasili kutunda apa va hampuruka nge* ntani kuruganena Karunga. Nsene va kurura nge nohuki dange, name kapi ngani kara nononkondo ngwendi vantu navenye.”
18 Apa ga yi dimbwilire Delira asi Simisoni ana mu tantere nayinye, makura ta zigida usimbu vahompa woVafilisiti, ta va tantere asi: “Sikando esi kuvhura mu wize, yeeyi age ana tantere nge nayinye.” Makura vahompa woVafilisiti tava wiza kwendi ntani awo kwa pitwire yimaliwa.
19 Makura Delira ta ninki Simisoni a rare pomatungi gendi, ta zigida mugara a ya kurure yikoka yendi ntambali. Makura Delira ta kara nononkondo kumupitakana, yeeyi nonkondo dendi kwa mu tundire.
20 Makura Delira ta zigire asi: “Simisoni, Vafilisiti vana ya siki!” Makura Simisoni ta pinduka ta litantere asi: “Nani rugana ngwendi moomu na rugene pomuhowo yipo ni tjwayuke.” Nye age kapi ga yi divire asi Jehova ana mu sigi.
21 Makura Vafilisiti tava mu kwata, tava korora mo meho gendi. Konyima tava mu twara koGasa, tava mu manga nomauketanga gongoporo. Awo kwa mu ninkire a va gogere mbuto modorongo.
22 Nye nohuki dendi tadi tameke hena kukura konyima zapa va di kurwire.
23 Vahompa woVafilisiti tava pongo kumwe va gave nonzambo dononzi kosikarunga sawo sedina Dagoni ntani va dane sipito, yeeyi awo kwa tente asi: “Karunga gwetu ga gava nkore zetu Simisoni momawoko getu!”
24 Apa vantu va mwene sikarunga sawo, tava si hamberere ntani tava tanta asi: “Karunga gwetu ga gava nkore zetu momawoko getu, ezi za zonagura sirongo setu nokudipaga vantu wovanzi.”
25 Mokumona asi awo kwa hefe unene, tava tanta asi: “Zigideni Simisoni a ya tu zorese po.” Makura tava ka simba Simisoni modorongo a ya va zorese. Awo kwa mu ninkire a sikame pokatji konongundi.
26 Makura Simisoni ta tantere mumati ogu ga mu kwete kewoko asi: “Ninka ni kwate konongundi edi da kwata nzugo yipo ni zegamene ko.”
27 (Nzugo ozo kwa zulire vagara novakadi. Vahompa navenye woVafilisiti nawo kwa kere monzugo ozo, ano keguru lyazo kwa kere ko vagara novakadi 3 000 ava va tarerere Simisoni ngomu ga va zoresere.)
28 Simisoni makura ta likwambere kwaJehova asi: “Jehova Hompa Mupangeli gwanayinye, na kanderere diworoka nge ntani na kanderere pe nge nonkondo sikando esi, yipo ni tengwide kuwoko Vafilisiti kweyi va korora meho gange.”
29 Makura Simisoni ta sikama pokatji konongundi mbali dopokatji, edi da kwata nzugo. Ta kwata ngundi zimwe nokuwoko kwendi kokorulyo, ano ngundi nkwawo nokuwoko kwendi kokorumoho.
30 Simisoni ta zigire asi: “Ninka nge ni fe noVafilisiti!” Makura ta sindike nongundi paapa ga hulira, makura nzugo tazi gwire vahompa novantu ava va kere mo. Ezuva olyo, age kwa dipagere vantu wovanzi kupitakana ava ga dipagere apa ga kere nomwenyo.
31 Konyima, vamumbya vendi nekoro lyoguhwe tava wiza va ya guse simpu sendi. Awo tava mu twara va ka mu horeke montoko zoguhwe Manowa ezi za kara pokatji kaSora naEsitaoli. Age kwa kere mupanguli moIsraeli nomvhura 20.
Nonkango dokonhi
^ Ndi “Mu hengaika.”
^ Ndi “magava ntambali.”
^ Ndi “Ove kuna danauka name.”
^ MoRuhebeli asi “kutunda apa na kere mezimo lyonane.”
