Vapanguli 17:1-13
-
Yikarunga yaMika nomupristeli gwendi (1-13)
17 Pwa kere mugara gedina Mika ogu ga tungire momukunda gonondundu gwaEfurayimi.
2 Age kwa tanterere ozina asi: “Yisiliveli 1 100 eyi mwa paparere koyili kwange, nyame na yi gusa. Apa mwa fingire muntu ogu ga yi gusire, name na yi zuvhire.” Makura ozina tava tanta asi: “Jehova ngano a ku tungike munange.”
3 Makura age ta tengwida yisiliveli 1 100 kozina, nye ozina tava mu tantere asi: “Ame ngani yi gava* kwaJehova, yipo munange a ka yi rugane mafano gokuhonga ntani sikarunga sosivera. Tani yi ku tengwidire.”
4 Apa ga tengwidire yisiliveli kozina, awo tava gusa po yisiliveli 200, tava yi gava komuntu ogu a hambura yisiliveli. Makura age ta rugana efano lyokuhonga nosikarunga sosivera, ta yi tura membo lyaMika.
5 Mika kwa kere nonzugo omu ga tulire yikarunga. Age kwa rugene sikoverero sopomapepe ntani noyikarunga* hena yimwe ntani age kwa horowere munendi gumwe a kare mupristeli gwendi.
6 Posiruwo oso, Vaisraeli kapi va kere nahompa. Nkenye ogu nga rugana eyi ana hara.*
7 Pwa kere mumati gomoBeterehema zomoJuda ogu ga tundilire moruvharo rwaJuda.* Age kwa kere Murevhi ntani kwa tungire moBeterehema siruwo songandi.
8 Age kwa tundire mositata saBeterehema zomoJuda a ka papare evango oku na ka tunga. Makura ta ka sika momukunda gonondundu gwaEfurayimi membo lyaMika.
9 Makura Mika ta mu pura asi: “Kupi ono tundu?” Age ta limburura asi: “Ame Murevhi gomoBeterehema zomoJuda. Ame kuna kuza ni ka papare evango oku nani ka tunga.”
10 Mika makura ta mu tantere asi: “Tunga kumwe name yipo o kare mugavindunge* gwange nomupristeli gwange. Nkenye mvhura ame ngani kupa yisiliveli murongo noyikoverero ntani nonondya.” Makura Murevhi ogo ta hwilire membo.
11 Murevhi ogo kwa pulire a kare kumwe naMika ntani age kwa kere ngwendi gumwe govana vendi.
12 Makura Mika ta mu tura a kare mupristeli gwendi ntani age kwa tungire membo lyaMika.
13 Mika ta tanta asi: “Ngesi nina yi diva asi Jehova nga tekura nge nawa, morwa nina tura Murevhi a kare mupristeli gwange.”
Nonkango dokonhi
^ Ndi “ngani yi pongwera.”
^ MoRuhebeli asi “teraphim.”
^ Ndi “eyi nga gazara asi youhunga.”
^ Nampo yeeyi ga tungire momukunda gorudi rwaJuda.
^ MoRuhebeli asi “otate.”
