Vapanguli 18:1-31
18 Posiruwo oso, Vaisraeli kapi va kere nahompa ntani womorudi rwaDana kwa paparere evango oku nava tunga, morwa awo kapi va gwene upingwa mokatji koVaisraeli vakwawo.
2 Womorudi rwaDana kwa tumine vagara vatano va ka tare sirongo, awo kwa kere vagara wokuhuguvara ntani kwa tundire moSora nomoEsitaoli. Awo kwa va tanterere asi: “Zendeni mu ka tare sirongo.” Apa va ka sikire membo lyaMika momukunda gonondundu gwaEfurayimi, tava rara moomo.
3 Apa va kere pepi nembo lyaMika, tava dimburura ezwi lyomumati goMurevhi. Makura tava mu zire, tava mu pura asi: “Yilye ga kureta ko oku? Yisinke ono kuyarugana ko oku? Yisinke ono kudilira kutunda mo momukunda ogu?”
4 Age ta va tantere eyi ga mu ruganena Mika. Age kwa va tanterere asi: “Age kwa ninka nge ni kare mupristeli gwendi.”
5 Tava mu tantere asi: “Tu pulira ko kwaKarunga nsene rugendo rwetu ngaru tompoka.”
6 Makura mupristeli ta va tantere asi: “Zendeni mombili. Jehova nga kara kumwe none morugendo rweni.”
7 Makura vagara owo vatano tava twikire norugendo rwawo, tava ka sika moRaisi. Awo kwa ka gwene vantu ava va dilire kuhuguvara nomuhoko dapeke, ngwendi Vasidoni. Awo kwa kere mombili ntani kapi va kere nosinka, ano mosirongo sawo kapi mwa kere muntu ogu ngava hepeke. Awo kwa kere ure noVasidoni ntani kapi ngava ruganene kumwe novantu vapeke.
8 Apa va ka tengwire kovakwawo koSora nokoEsitaoli, vakwawo kwa va pulire asi: “Ngapi omu yina ka genda po?”
9 Awo kwa va tanterere asi: “Tu zeni tu ka va homokere, yeeyi tuna ka mona asi sirongo sawo siwa. Morwasinke muna kulikatakatera? Mwa ha liranga kukagusa sirongo.
10 Apa ngatu ka sika, ngatu ka gwana vantu wokudira sinka ntani nosirongo sosinene. Karunga kwa si gava momawoko getu ntani aso sirongo esi sa kara noyininke nayinye yepevhu.”
11 Makura vagara 600 womorudi rwaDana ava va liwapaikilire yita, tava katuka va tunde moSora nomoEsitaoli.
12 Tava zi, tava ka dika kamba zawo moKiliyata-jeyalimu moJuda. Eyi yiyo ava tumbwire evango eli lya kara koUtokero waKiliyata-jeyalimu asi Mahane-dana* dogoro naina.
13 Kutunda opo, tava zi komukunda gonondundu gwaEfurayimi makura tava ka sika kembo lyaMika.
14 Makura vagara vatano ava va zire va ka tare sirongo saRaisi, tava tantere vakwawo asi: “Mwa yi diva asi momambo aga kwa kara mo sikoverero sopomapepe, yikarunga,* mafano gokuhonga ntani nomafano goyivera ndi? Gazadareni ko eyi nomu vhura kurugana ko.”
15 Makura tava sikama, ano vagara vatano tava hwilire membo lyaMika omu ga kere mumati goMurevhi, tava pura omu ana karere.
16 Ano vagara 600 womorudi rwaDana ava va liwapaikilire yita kwa sikeme pevero.
17 Makura vagara vatano ava va zire va ka tare sirongo tava hwilire, tava gusa mafano gokuhonga, sikoverero sopomapepe, yikarunga* ntani mafano goyivera. (Mupristeli kwa sikeme pevero kumwe novagara 600 ava va liwapaikilire kuza koyita.)
18 Awo kwa zire membo lyaMika tava gusa mafano gokuhonga, sikoverero sopomapepe, yikarunga* ntani mafano goyivera. Mupristeli ta va pura asi: “Yisinke eyi muna kurugana?”
19 Nye awo tava mu tantere asi: “Mwena. Wa ha uyunga. Wiza kumwe nose o ka kare mugavindunge* gwetu nomupristeli gwetu. Ono hara kukara mupristeli ogu a ruganene muntu gumwe ndi mupristeli ogu a ruganene rudi ntani epata lyomoIsraeli?”
20 Makura mupristeli ta yi hafere, ta gusa sikoverero sopomapepe, yikarunga* ntani mafano gokuhonga, ta zi kumwe nawo.
21 Makura tava katuka, tava pitisa vana vawo, yimuna yawo ntani noyininke yawo yomulyo komeho.
22 Apa va kere ure nembo lyaMika, vagara vamwe ava va tungire pepi nembo lyendi, tava pongo kumwe, makura tava sikura womorudi rwaDana dogoro tava ka va gwana.
23 Awo tava zigire womorudi rwaDana, ano womorudi rwaDana tava piruka, tava pura Mika asi: “Yisinke ono hara? Morwasinke ono tu sikwire novantu wovanzi?”
24 Makura Mika ta tanta asi: “One kwa gusa yikarunga eyi na rugana ntani mupristeli gwange. Kwato eyi mwa sigira nge ko. Ngapi nye omu nomu pura nge asi yisinke eyi ono hara?”
25 Makura womorudi rwaDana tava tanta asi: “Wa ha tu harukira, ngano nava kuhomokera vagara ava ava handuka usimbu va ku dipage nove nepata lyoge.”
26 Makura womorudi rwaDana tava twikire norugendo rwawo, ano Mika apa ga mwene asi awo kwa kere nononkondo kumupitakana, ta tengura a ze kembo lyendi.
27 Konyima zapa va gusire yikarunga eyi ga rugene Mika ntani mupristeli gwendi, tava zi koRaisi omu va kere vantu wombili ntani wokumwena. Awo kwa dipagere vantu vamo, tava hwike sitata.
28 Kwato ogu ga vhulire kupopera sitata oso, morwa aso kwa kere ure naSidoni ntani kapi ngava ruganene kumwe novantu vapeke, aso hena kwa kere momuramba gwaBete-rehobu. Makura tava tungurura sitata oso, tava tungu mo.
29 Ntani hena, awo kwa rukire sitata oso edina lyazinyakurwawo Dana, munaIsraeli. Nye pomuhowo edina lyaso kwa kere Raisi.
30 Konyima, womorudi rwaDana tava dike sikarunga sawo, makura Jonatana munaGeresomu, mutekurwaMosesa ntani vana vendi, tava kara vapristeli womorudi rwaDana dogoro paapa vantu womosirongo va zire mounkwate.
31 Nye sikarunga esi ga rugene Mika esi va dikire, kwa kere moomo siruwo esi za kere nzugo zaKarunga moSiro.
Nonkango dokonhi
^ Kutanta asi “Kamba zaDana.”
^ MoRuhebeli asi “teraphim.”
^ MoRuhebeli asi “teraphim.”
^ MoRuhebeli asi “teraphim.”
^ MoRuhebeli asi “guhyetu.”
^ MoRuhebeli asi “teraphim.”
