Vapanguli 19:1-30
-
Womorudi rwaMbenyameni tava kwatere mukadi kononkondo moGibeya (1-30)
19 Posiruwo oso, apa Vaisraeli va dilire kukara nahompa, Murevhi gumwe ogu ga tungire momukunda gonondundu gwaEfurayimi gokoure kwa kwere ko hena mukadi gumwe* gomoBeterehema zomoJuda.
2 Nye mukadi ogo kwa honderere, makura ta sigi mugara gwendi a ze kembo lyoguhwe. Age kwa ka kere kooko makwedi gane.
3 Makura mugara gwendi ta mu sikura yipo a ka mu lihenge a tengure. Age kwa zire nomukareli gwendi gomugara ntani noyindongi. Apa ga ka sikire, mukadi ogo ta twara mugara gwendi membo lyoguhwe. Tamweyi zendi apa ga mu mwene, ta hafa unene.
4 Makura tamweyi zendi ta mu ninki a kare nage mazuva gatatu. Awo kwa lire oku tava nu makura ta rara moomo.
5 Mezuva lyaune, tava pinduka ngurangura zonene va ze, nye tamweyi zendi ta mu tantere asi: “Lya yipo o gwane nonkondo makura ntani nye no za.”
6 Makura tava hingire va lye oku tava nu, konyima tamweyi zendi ta mu tantere asi: “Na kanderere, rara masiku ganaina yipo o lihafese.”*
7 Apa ga pindukire ngurangura a ze, tamweyi zendi ta mu likwambere, makura ta rara hena masiku ogo.
8 Apa ga pindukire ngurangura zonene mezuva lyautano asi a ze, tamweyi zendi ta mu tantere asi: “Na kanderere, lya yipo o gwane ko nonkondo.” Awo kwa hokwere kulya dogoro ezuva ta li hara kutoka.
9 Apa ga katukire a ze ko namukadendi ntani nomukareli gwendi, tamweyi zendi ta mu tantere asi: “Ezuva ntaantani li toke, rara masiku ganaina morwa ntaantani kukare mundema. Rara o lihafese. Mungura kuvhura ngo pinduke ngurangura zonene yipo o tengure kembo* lyoge.”
10 Nye mugara ogo kapi ga here hena kukara masiku ogo, ta katuka a ze dogoro ta ka sika koJebusi ndi Jerusarema. Age kwa gendere namukadendi nomukareli gwendi ntani noyindongi yendi yivali eyi ya simbire nomurongero.
11 Apa va kere pepi naJebusi alyo ezuva lina hara kutoka. Mukareli makura ta pura hekurwendi asi: “Kuvhura tu ze mositata saJebusi tu ka rare mo ndi?”
12 Nye hekurwendi ta mu tantere asi: “Kapi tatu vhuru kuza mositata sovanayirongo omu va dira kutunga Vaisraeli. Tu zeni tupu dogoro koGibeya.”
13 Ta tantere hena mukareli gwendi asi: “Tu kondjeni tu ka sike moGibeya ndi moRama, yipo tu ka rare mwasimwe soyitata oyo.”
14 Makura tava twikire norugendo rwawo, ano ezuva tali tameke kutoka apa va kere pepi naGibeya, sitata sorudi rwaMbenyameni.
15 Makura tava zi mositata saGibeya va ka rare moomo. Apa va ka sikire, tava hingire pevango eli ava pongere vantu, nye kwato ogu ga va zigidire va ka rare membo lyendi.
16 Ngurova ozo, musamane gumwe kwa wizire a tunde komapya. Age kwa tundilira momukunda gonondundu gwaEfurayimi nye age kwa tungire moGibeya, ano vantu ava va tungire mositata oso kwa kere womorudi rwaMbenyameni.
17 Apa ga kankukire musamane, ta mono mugara ana kara pevango eli ava pongere vantu, ta mu pura asi: “Kupi ono kutunda ntani kupi ono kuza?”
18 Age ta limburura asi: “Ose kuna kutunda koBeterehema zomoJuda, tu ze oku na tunda komukunda gonondundu gwaEfurayimi gokoure. Ame kwa zire koBeterehema zomoJuda, ngesi kuna kuza konzugo zaJehova,* nye kwato ogu ana kutambura nge membo lyendi.
19 Ose tuna kara norwenge nowayi woyindongi yetu ntani novhinyu nomboroto ezi natu lya name namukadange nomukareli gwetu. Kwato eyi tuna hepa.”
20 Nye musamane ta tanta asi: “Mbili zi kare none. Tani mu pe nkenye eyi muna hepa, nye mwa ha rara pevango eli ava pongere vantu.”
21 Makura musamane ta mu twara membo lyendi ntani ta pe yindongi wayi. Konyima tava likuhu konompadi dawo, tava li nokunwa.
22 Apa va lire nokunwa, vagara vamwe wovadona womositata, tava kundurukida embo ntani tava toona kevero. Awo kwa tanterere musamane ogo asi: “Pwagesa mo mugara ogu ana wiza membo lyoge, yipo tu ya mu rare.”
23 Makura mwenyæmbo ta pwaga ko, ta va tantere asi: “Hawe vakwetu. Na kanderere, mwa ha rugana yininke yoyidona. Mugara ogu mugenda gwange, mwa ha rugana yininke yoyidona ngoso.
24 Nina kara novana wovakadona ava va dira kuligwanekera rumwe panyama novagara ntani mukadagwagoogu mugara. Ninkeni ni ka va mu retere mu ya va rugane* moomu muna hara. Nye mwa ha rugana yininke yoyidona mugara ogu.”
25 Nye vagara owo kapi va mu purakenene, makura mugara goMurevhi ta kwata mukadendi, ta mu twara ponze kovagara owo. Awo kwa mu kwaterere kononkondo ntani kwa mu hepekere masiku mudima dogoro monongura. Ano ngurangura zonene, tava mu sigi a ze.
26 Mukadi ogo makura ta wiza, ta ya ligandere pevero lyembo lyomusamane omu ga kere mugara gwendi.* Age kwa rere poopo dogoro ezuva ta li si.
27 Apa ga pindukire mugara gwendi* ngurangura a zegurure mavero gokonzugo, yipo a twikire norugendo rwendi, ta mono mukadendi ana rara ponze, ago mawoko gendi pevero.
28 Makura ta tantere mukadendi asi: “Pinduka tu ze.” Nye mukadendi kapi ga mu limbwilire. Makura mugara ta tura simpu samukadendi posindongi, ta zi kembo lyendi.
29 Apa ga ka sikire kembo lyendi, ta gusa mbere.* Ta tetagura mukadendi momaruha 12, makura ta tumu maruha ogo mosirongo nasinye soVaisraeli.
30 Navenye ava va yi mwene kwa tente asi: “Yininke eyi kapi ya horoka rumwe ndi tu yi mone kutunda apa Vaisraeli va tunda moEgipite dogoro naina. Yi konakoneni nawa, mu gazadare ko nokututantera eyi natu rugana.”
Nonkango dokonhi
^ MoRuhebeli asi “sihora.”
^ Ndi “o hafese mutjima goge.”
^ MoRuhebeli asi “kotende.”
^ Ndi nampo asi “ame kurugana konzugo zaJehova.”
^ Ndi “mu ya va rugane yoyidona.”
^ MoRuhebeli asi “hekurwendi.”
^ MoRuhebeli asi “hekurwendi.”
^ Ndi “mbere zokudipagesa.”
