Vapanguli 2:1-23
2 Makura muengeli gwaJehova ta tundu moGiligali a ze koBokimu, ta tantere Vaisraeli asi: “Ame kwa mu gusa mosirongo saEgipite ni mu tware mosirongo esi na tumbwidira ozinyakurweni ntani hena, ame kwa tente asi: ‘Kapi ngani teza po egwanekero* eli na tura po kumwe none.
2 Nye one kapisi ngomu ture po egwanekero kumwe novantu ava va tunga mosirongo esi ntani ngomu zonagure po yizambero yawo.’ Nye one kapi mwa limburukwa nge. Morwasinke mwa yi ruganena?
3 Eyi yiyo na uyungilire asi: ‘Ame kapi ngani va tjida mo komeho zeni. Awo ngava mu pukisa ntani ngava mu ninkisa mu karere yikarunga yawo.’”
4 Muengeli gwaJehova apa ga tanterere Vaisraeli yininke eyi, awo tava lili unene.
5 Awo tava ruku evango olyo asi Bokimu* makura tava zambere po Jehova nonzambo.
6 Apa ga rekerere Josuwa vantu va ze, nkenye Muisraeli ta tengura kosirongo sendi.
7 Vantu kwa twikilire kukarera Jehova posiruwo saJosuwa ntani posiruwo somasimbi aga ga parukire konyima zonomfa daJosuwa, aga ga mwene nayinye eyi ga ruganenene Jehova Vaisraeli.
8 Makura Josuwa munaNunu, mukareli gwaJehova, ta dogoroka ado nomvhura dendi 110.
9 Makura tava mu horeke mositata saTimunati-heresi esi ga pingire. Aso kwa kara momukunda gonondundu gwaEfurayimi koMuzogo goNdundu zaGasi.
10 Makura navenye ava va parukire posiruwo saJosuwa, tava dogoroka, tava va horeke ngwendi moomu va horekere vantu vawo,* makura ta kukwama ko vantu ava va dilire kudiva Jehova neyi ga ruganenene Vaisraeli.
11 Vaisraeli kwa rugene yininke yoyidona kosipara saJehova ntani kwa karerere mafano gaBara.
12 Awo kwa sigire Jehova Karunga gozinyakurwawo ogu ga va gusire mosirongo saEgipite. Awo kwa karerere yikarunga yapeke, yikarunga eyi ngava karere vantu ava va va kundurukidire ntani awo kwa yi nyongamenene, ano eyi kwa handukisire Jehova.
13 Awo kwa sigire Jehova tava karere mafano gaBara naga gaAsitarete.
14 Makura Jehova ta handukire unene Vaisraeli, ta va gava momawoko gononkore dawo edi dava rwisire nokugusa yininke yawo. Age kwa va geve hena momawoko gononkore dawo edi dava kundurukidire ntani awo kapi va vhulire kurwisa nonkore dawo.
15 Nkenye oku ngava zi, Jehova ngava ninki va ligwanekere noudigu ngwendi moomu ga yi tente Jehova ntani ngwendi moomu ga va rondwere Jehova, awo kwa ligwanekerere noudigu wounene.
16 Makura Jehova yiyo ga horowere vapanguli va va popere kononkore dawo.
17 Nye awo kapi va purakenene nampili kovapanguli, ngava karere* yikarunga yapeke ntani ngava yi nyongamene. Awo kapi va kweme nzira ezi va kweme ozinyakurwawo ava va limburukwire nompangera daJehova. Awo kapi va kere ngwendi ozinyakurwawo.
18 Apa nga horowora Jehova vapanguli, Jehova nga vatere nkenye mupanguli a va popere kononkore dawo posiruwo sendi, yeeyi Jehova ngava fire nkenda* apa ngava va hepeke noku va tekura momudona.
19 Nye apa nga dogoroka mupanguli, awo ngava rugana yininke yoyidona unene kupitakana vaguhya vawo pokukarera yikarunga yapeke noku yi nyongamena. Awo kapi va sigire yirugana yawo yoyidona nonkareso zawo zondona.
20 Makura Jehova ta handukire unene Vaisraeli, ta va tantere asi: “Mokumona asi muhoko ogu kapi gwa sikisa mo egwanekero eli na tulire po nozinyakurwawo ntani kapi gwa limburukwa nge,
21 ame kapi ngani tjida mo nomuhoko edi ga sigire Josuwa komeho a fe.
22 Ame kwa yi rugene eyi mokuheteka Vaisraeli nsene nava limburukwa Jehova pokukwama eyi va rugene ozinyakurwawo.”
23 Yipo nye, Jehova kapi ga zonagwire po nomuhoko edi. Age kapi ga di tjidire mo ntani kapi ga di geve momawoko gaJosuwa.
Nonkango dokonhi
^ Ndi “elizuvhasano.”
^ Kutanta asi “Vantu ava vana kulira.”
^ MoRuhebeli asi “tava va twara kovantu vawo.” Esi sisewe sa tamba konomfa.
^ MoRuhebeli asi “awo ngava hondere.”
^ Ndi “nga livere.”
