Vapanguli 20:1-48
-
Vaisraeli tava rwisa womorudi rwaMbenyameni (1-48)
20 Makura Vaisraeli navenye kutundilira koDana dogoro koBere-seba ntani nomosirongo saGiliyata, tava ya pongo kumwe komeho zaJehova moMisipa.
2 Masimbi govantu ndi masimbi gomomarudi goVaisraeli nago kwa pongere mokatji ,kovantu vaKarunga. Ano sivaro sovakwayita ava va kere nomarufuro kwa kere 400 000.
3 Womorudi rwaMbenyameni kwa zuvhire asi Vaisraeli vana zi koMisipa.
Makura Vaisraeli tava pura ava va kere po asi: “Tu tantereni omu ya horokere yininke eyi yoyidona.”
4 Makura mugara goMurevhi ogu ga kwere mukadi ogu va dipagere, ta tanta asi: “Name namukadange* kwa zire tu ka rare moGibeya, sitata sorudi rwaMbenyameni.
5 Ano vantu ava va tunga mositata saGibeya kwa homokerere nge, tava kundurukida embo masiku. Awo kwa here kudipaga nge, nye tava kwatere mukadange kononkondo makura ta fu.
6 Yipo na gusire simpu sendi, tani si tetagura momaruha makura tani ga tumu mosirongo nasinye soVaisraeli, morwa awo kwa rugana sininke sokuswaukisa ntani sosidona moIsraeli.
7 Yisinke nomu uyunga ko one Vaisraeli?”
8 Makura vantu navenye tava katukire pamwe, tava uyunga asi: “Kwato ogu na za kotende zendi ndi a tengure kembo lyendi.
9 Eyi yiyo natu rugana sitata saGibeya: Tu horoworeni vagara pafungu-fungu, va ze va ka si homone.
10 Tu guseni mokatji komarudi goVaisraeli vagara 10 povagara 100 ntani vagara 100 povagara 1 000, ano vagara 1 000 povagara 10 000 ngava pongaike nondya dovakwayita, yipo ngava ka homokere Gibeya, sitata sorudi rwaMbenyameni morwa awo kwa rugana yininke yoyidona.”
11 Makura Vaisraeli tava pongo kumwe va homone sitata.
12 Konyima marudi goVaisraeli taga tumu vantu kovagara womorudi rwaMbenyameni. Vantu owo kwa ka tente asi: “Yisinke ya horokere dogoro mukadi ogu va mu dipage?
13 Tu peni vagara owo wovadona womoGibeya tu ya va dipage, yipo tu guse mo udona moIsraeli.” Nye womorudi rwaMbenyameni kapi va purakenene koVaisraeli vakwawo.
14 Makura worudi rwaMbenyameni tava tundu moyitata yawo, tava pongo kumwe va ze koGibeya, va ka rwise Vaisraeli.
15 Kugusa ko vagara 700 womoGibeya ava va horowere, ezuva olyo womorudi rwaMbenyameni kwa pongaikire vagara 26 000 womoyitata yawo ava va kere nomarufuro.
16 Movagara owo, kwa kere mo vagara 700 ava ngava ruganesa kamoho. Vagara ava navenye ngava zuguma emanya va nonge nampili ruhuki va hana kusekuna.
17 Vaisraeli kwa pongaikire vagara 400 000 kugusa ko womorudi rwaMbenyameni, awo kwa simbire marufuro ntani awo kwa kere vakwayita ava va kere noudivi.
18 Makura tava katuka, tava zi koBeteli va ka pure Karunga eyi nava rugana. Vaisraeli tava pura Karunga asi: “Yilye ogu natu pitisira tu ka rwise worudi rwaMbenyameni?” Jehova ta va limburura asi: “Juda yige na mu pitisira.”
19 Konyima, Vaisraeli tava katuka ngurangura, tava ka dika kamba zawo va kundurukide sitata saGibeya.
20 Makura Vaisraeli tava ka rwisa womorudi rwaMbenyameni, tava va rwisa moGibeya.
21 Makura worudi rwaMbenyameni tava tundu mositata saGibeya, tava ya dipaga Vaisraeli wokusika po 22 000 mezuva olyo.
22 Nye vakwayita woVaisraeli tava likida uradi pokuza hena va ka sikame pevango eli va rwililire yita mezuva lyokuhova.
23 Makura Vaisraeli tava zi, tava ka lilira Jehova dogoro kongurova. Tava pura Jehova asi: “Kuvhura tu ze hena tu ka rwise worudi rwaMbenyameni ndi?” Makura Jehova ta va limburura asi: “Kuvhura mu ze mu ka va rwise.”
24 Makura mezuva lyauvali, Vaisraeli tava homokere worudi rwaMbenyameni.
25 Ano worudi rwaMbenyameni tava tundu mositata saGibeya va gwanekere nawo, awo kwa dipagere hena Vaisraeli 18 000 ava va kere nomarufuro.
26 Makura Vaisraeli navenye tava zi koBeteli. Awo kwa lilire nokuhingira komeho zaJehova ntani kwa dililire dogoro kongurova. Awo kwa zembe hena nonzambo deswakerero nononzambo dombili komeho zaJehova.
27 Konyima, Vaisraeli tava pura Jehova eyi nava rugana, yeeyi sikesa segwanekero saKarunga gousili kwa kere moBeteli posiruwo oso.
28 Pinehasa munaEliyasara mutekurwaArona, nga rugana* ngomupristeli komeho zosikesa segwanekero posiruwo oso. Makura Vaisraeli tava pura Karunga asi: “Kuvhura hena tu ka rwise worudi rwaMbenyameni ndi twa ha za ko?” Jehova ta va limburura asi: “Zendeni, yeeyi mungura ame ngani va gava momawoko geni.”
29 Makura Vaisraeli tava tura vagara va vande komaruha nagenye gositata saGibeya.
30 Vaisraeli kwa zire va ka homokere worudi rwaMbenyameni mezuva lyautatu, makura tava va rwisa ngwendi moomu va yi rugene pomuhowo.
31 Apa va zire worudi rwaMbenyameni va ka gwanekere novakwayita, awo kwa tundire mositata makura tava rwisa vakwawo nokuvadipaga ngwendi moomu va yi rugene yikando yapeke. Tava dipaga vagara vamwe monzira zimwe ezi za vyuka koBeteli ntani nezi za vyuka koGibeya. Vagara woVaisraeli wokusika koyiha 30 kwa va dipagerere monzira.
32 Makura womorudi rwaMbenyameni tava tanta asi: “Ose kuna kuvafunda ngwendi moomu twa va fundire.” Nye Vaisraeli tava tanta asi: “Tu dukeni yipo tu va tware mononzira, va kare ure nositata.”
33 Makura vagara navenye woVaisraeli tava tundu komavango gawo oku va kere, tava ru yita moBara-tamara. Ano Vaisraeli ava va vende tava kara poopo pomavango gawo aga va vende moGibeya.
34 Yipo nye, vagara 10 000 woVaisraeli ava va horowere kwa wizire moGibeya, makura tava ya ru yita. Nye worudi rwaMbenyameni kapi va yi divire asi vana litura moudigu.
35 Jehova kwa vaterere Vaisraeli va funde worudi rwaMbenyameni. Vaisraeli kwa dipagere vagara 25 100 womorudi rwaMbenyameni ava va kere nomarufuro.
36 Apa va dukire Vaisraeli, womorudi rwaMbenyameni kwa gazarere asi vana va fundu, nye Vaisraeli kwa huguvarere vantu ava va vende kositata saGibeya.
37 Vagara ava va vende tava bubauka, tava zi va ka homokere sitata saGibeya. Makura tava zi mositata tava ka dipaga vantu vamo navenye norufuro.
38 Vaisraeli kwa lizuvhire novagara ava va zire va ka vande, yipo va gave sidiviso pokututumuna musi mositata.
39 Apa va dukire Vaisraeli, worudi rwaMbenyameni tava tameke kuvahomokera, tava dipaga Vaisraeli wokusika koyiha 30. Makura worudi rwaMbenyameni tava tanta asi: “Ose kuna kuvafunda ngwendi moomu twa va fundire.”
40 Nye musi tagu tameke kututumuka mositata. Apa va pirukire womorudi rwaMbenyameni, tava mono sitata nasinye kuna kupya.
41 Makura Vaisraeli tava piruka va rwise womorudi rwaMbenyameni, ano worudi rwaMbenyameni tava tukuka apa va mwene asi udigu una va gwana.
42 Makura tava dukire momburundu, nye Vaisraeli tava va kwama ntani vagara ava va tundire moyitata tava lipakerere nawo va va dipage.
43 Awo kwa kundurukidire worudi rwaMbenyameni, tava twikire kuvatjida. Tava va dipaga komeho zositata saGibeya koyiha yoUpumezuva.
44 Ezuva olyo, vagara 18 000 womorudi rwaMbenyameni kwa va dipagere, navenye kwa kere vakwayita wononkondo.
45 Vagara womorudi rwaMbenyameni tava piruka va dukire momburundu kemanya lyaLimoni ntani Vaisraeli kwa dipagere vantu 5 000 mononzira. Awo kwa twikilire kuvatjida dogoro koGidomu, tava ka dipaga hena vagara 2 000.
46 Vagara navenye womorudi rwaMbenyameni ava va dipagere ezuva olyo kwa kere 25 000, navenye kwa kere nomarufuro ntani kwa kere vakwayita wononkondo.
47 Nye vagara 600 kwa dukilire momburundu kemanya lyaLimoni ntani awo kwa ka kere kemanya olyo makwedi gane.
48 Makura Vaisraeli tava tengura va ka rwise womorudi rwaMbenyameni wokuhupa ko ava va kere mositata. Awo kwa dipagere vantu noyimuna yawo ntani nanayinye eyi ya hupire mo. Awo hena kwa hwikire yitata nayinye eyi va gwene.
