Vapanguli 21:1-25
-
Rudi rwaMbenyameni tava ru popere (1-25)
21 Vaisraeli kwa tulire po mugano ogu moMisipa pokutanta asi: “Kwato ogu nga gava munendi gomukadi korudi rwaMbenyameni va mu kware.”
2 Makura vantu tava zi koBeteli, tava ka hingira komeho zaKarunga gousili dogoro kongurova. Awo kwa lilire unene.
3 Awo kwa tente asi: “Jehova Karunga goVaisraeli, morwasinke ya horokera yininke eyi moIsraeli? Morwasinke naru dongonokera po rudi rumwe moIsraeli?”
4 Ezuva lyokukwama ko, vantu tava pinduka ngurangura zonene, tava dike sizambero va zambere po nonzambo deswakerero ntani nononzambo dombili.
5 Makura Vaisraeli tava tanta asi: “Koruli rudi roVaisraeli runa dili kuwiza ru ya ponge komeho zaJehova ndi?” Yeeyi awo kwa tulire po mugano asi nkenye ogu nga dira kuwiza komeho zaJehova poMisipa, ngava mu dipaga.
6 Vaisraeli kwa fililire nkenda rudi rwaMbenyameni kweyi ya va horokerere. Awo kwa tente asi: “Neina rudi rumwe vana ru gusa mo moIsraeli.
7 Kupi natu gwana vakadi ava natu pa worudi rwaMbenyameni? Yeeyi ose kwa gana kwaJehova asi kapi ngatu va pa vana vetu wovakadi va va kware.”
8 Awo tava pura asi: “Rudi musinke roVaisraeli runa dili kuwiza komeho zaJehova moMisipa?” Tava dimburura asi kwato gomodoropa zaJabesi-giliyata ogu ga wizire oku va pongere vantu mokamba.
9 Yeeyi apa va varwire vantu, tava dimburura asi kwato gomodoropa zaJabesi-giliyata ogu ga kere po.
10 Makura vantu tava tumu vagara 12 000 wononkondo. Awo kwa va pangerere asi: “Zendeni mu ka dipage vantu ava va tunga moJabesi-giliyata norufuro, kukwatera mo vakadi novanona.
11 Eyi yiyo nomu ka rugana: Mwa hepa kukadipaga vagara navenye ntani vakadi ava va ligwanekera panyama novagara.”
12 Awo kwa ka gwene vakadona 400 modoropa zaJabesi-giliyata ava va dira kuligwanekera rumwe panyama novagara, makura tava va twara mokamba moSiro mosirongo saKanani.
13 Makura Vaisraeli tava tumu mbudi kovantu womorudi rwaMbenyameni, ava va kere kemanya lyaLimoni, makura tava tulisa po mbili nawo.
14 Makura womorudi rwaMbenyameni tava ka tengura. Awo kwa va pere vakadi womoJabesi-giliyata ava va dilire kudipaga, nye vakadi owo vasesu va kere.
15 Vantu kwa fililire nkenda womorudi rwaMbenyameni kweyi ya va horokerere, morwa Jehova kwa ninkisire marudi goVaisraeli ga ligaunuke.
16 Makura masimbi aga ga kere mombunga taga tanta asi: “Kupi natu gwana vakadi ava natu pa vagara navenye ava vana hupu ko? Yeeyi vakadi navenye womorudi rwaMbenyameni va va dipaga.”
17 Awo tava limburura asi: “Womorudi rwaMbenyameni va hepa kugwana upingwa wawo, yipo moIsraeli nga mu dire kudongonoka rudi rumwe.
18 Nye ose kapi tatu vhuru kuvapa vana vetu wovakadi va va kware, yeeyi ose kwa gene asi: ‘Nkenye ogu nga gava mukadi korudi rwaMbenyameni, ngava mu finge.’”
19 Makura tava tanta asi: “Kosili sipito saJehova esi asi kara moSiro nkenye mvhura. Siro kwa kara koMuzogo gwaBeteli ntani koUpumezuva wonzira ezi za tunda koBeteli zi ze dogoro koSikemu koMbindakano zaRebona.”
20 Awo kwa pangerere womorudi rwaMbenyameni asi: “Zendeni mu ka vande moyikunino yomandjembere.
21 Apa ngomu mona vakadona kuna kupwaga va lipakerere novakwawo va dane, ngomu tunde moyikunino yomandjembere mu kwate vakadona owo womoSiro ntani mwa hepa kutengura nawo kosirongo sorudi rwaMbenyameni.
22 Ano nsene ngava tu sivanena vaguhya vawo ndi vampanza vawo, ose ngatu va tantera asi: ‘Tu fireni nkenda, yeeyi ose kapi twa ka kwete vakadi wokugwanena po moyita, tu va pe va kware ntani kapi twa here kumuninkisa mu zone pokumuninka mu va pe vana veni wovakadi va va kware.’”
23 Makura worudi rwaMbenyameni tava yi rugana. Awo tava gusa vakadona ava va dene. Kutunda opo, tava tengura kosirongo* sawo, tava ka tungurura yitata yawo, makura tava tungu mo.
24 Makura Vaisraeli tava ligaunuka va tengure komarudi gawo nokomapata gawo ntani kosirongo* sawo.
25 Posiruwo oso, Vaisraeli kapi va kere nahompa. Nkenye ogu nga rugana eyi ana hara.*
Nonkango dokonhi
^ MoRuhebeli asi “upingwa.”
^ MoRuhebeli asi “upingwa.”
^ Ndi “eyi nga gazara asi youhunga.”
