Vapanguli 3:1-31
3 Edi kuna kara nomuhoko edi ga pulisilire Jehova di kare mosirongo, yipo di heteke Vaisraeli ava va dira kurwa rumwe yita noVakanani,
2 (Karunga kwa yi rugene eyi, yipo Vaisraeli ava ngava kwama ko nawo ngava rwe yita, eyi va dira kulimonena rumwe)
3 ado kuna kara: vahompa vatano woVafilisiti, Vakanani navenye, Vasidoni ntani Vahevhi ava va tunga koNdundu zaLibanoni kutundilira koNdundu zaBara-heremoni dogoro koRebo-Hamati.*
4 Nomuhoko edi kwa di ruganesere di heteke Vaisraeli nsene asi awo ngava limburukwa nompangera daJehova edi ga pere ozinyakurwawo kupitira mwaMosesa.
5 Yipo nye, Vaisraeli kwa tungire mokatji koVakanani, Vaheti, Vaamoli, Vaperesi, Vahevhi ntani Vajebusi.
6 Vaisraeli ngava kwara vakadi wokonomuhoko odo ntani ngava gava vana vawo wovakadi va va kware vagara wokonomuhoko odo ntani awo kwa tamekere kukarera yikarunga yawo.
7 Vaisraeli kwa rugene yininke yoyidona kosipara saJehova, awo hena kwa divarere Karunga gwawo Jehova ntani ngava karere mafano gaBara nonongundi dokupongoka.*
8 Makura Jehova ta handukire unene Vaisraeli, ta va gava momawoko gaKusani-lisatayimu, hompa gwaMesopotamiya.* Awo kwa ruganenene Kusani-lisatayimu nomvhura ntantatu.
9 Apa va likwamberere Vaisraeli kwaJehova a va vatere, Jehova yipo ga horowere Otiniyeli munaKenasi mumbyaKarebu a va popere.
10 Jehova ta mu pe mpepo zendi zokupongoka, makura ta kara mupanguli goVaisraeli. Apa ga zire koyita, Jehova kwa geve Kusani-lisatayimu hompa gwaMesopotamiya* momawoko gendi, makura ta mu fundu.
11 Kutunda opo, sirongo kwa kere mombili nomvhura 40. Makura Otiniyeli munaKenasi ta dogoroka.
12 Vaisraeli tava tameke hena kurugana yininke yoyidona kosipara saJehova. Makura Jehova yipo ga pulisilire Egironi hompa goVamowaba a funde Vaisraeli, morwa awo ngava rugana yininke yoyidona kosipara saJehova.
13 Ntani hena, Karunga kwa ninkire Vaamoni noVaamareki va va rwise. Awo kwa rwisire Vaisraeli, makura tava gusa sitata soyitji yonongone.
14 Vaisraeli kwa ruganenene Egironi hompa goVamowaba nomvhura 18.
15 Makura Vaisraeli tava likwambere kwaJehova a va vatere. Jehova yipo ga horowere Ehudi munaGera gomorudi rwaMbenyameni, ogu nga ruganesa ewoko lyokorumoho a va vatere. Konyima, Vaisraeli ngava tumu mutero* kwaEgironi hompa goVamowaba kupitira mwaEhudi.
16 Ehudi kwa rugene rufuro* rokusika koyiha yonosentimeta 40,* makura ta ru limangerere ketungi lyendi lyokorulyo konhi zosikoverero sendi.
17 Makura ta twara mutero kwaEgironi hompa goVamowaba. Egironi kwa kere mugara gokuneta unene.
18 Apa ga mene Ehudi kugava mutero, ta tantere vantu ava va simbire mutero va ze.
19 Nye apa ga ka sikire pevango apa pwa kara mafano gokuhonga moGiligali, ta tengura ta ka tantera hompa asi: “Hompa, nina kara nombudi zemehoramo ezi nina hara kukutantera.” Makura hompa ta tanta asi: “Zendeni!”* Makura vakareli vendi tava tundu po.
20 Makura Ehudi ta zi kwaEgironi ogu ga hingilire gelike monzugo zekeguru zoutenda. Ehudi ta tanta asi: “Nina hara kukutantera mbudi zokutunda kwaKarunga.” Makura Egironi ta katuka posipundi sendi souhompa.
21 Ehudi ta gusa rufuro ketungi lyendi lyokorulyo nokuwoko kwendi korumoho, makura ta ru mu tu mezimo.
22 Rufuro narunye kwa hwililire mezimo nosikundo* sako, ano magadi ta ga kudumike rufuro, morwa Ehudi kapi ga ru pwezere mo, makura nze tazi pwaga.
23 Ehudi kwa pwagerere pekende ntani age kwa pete mavero gokonzugo zekeguru.
24 Apa ga tundire mo, vakareli vaEgironi tava ka tengura, tava ya gwana mavero gokonzugo zekeguru vana ga pata. Tava tanta asi: “Nampo mweli monzugo zoutenda kuna kulivatera.”*
25 Awo kwa ndindilire siruwo sosire dogoro tava kara nosinka, nye apa va mwene asi kapi ana kuzegurura mavero gokonzugo zekeguru, tava gusa nsapi va ga paturure, makura tava mono hompa gwawo ana gwire pevhu ntani ana fu.
26 Apa va gazarere vakareli eyi nava rugana, siruwo oso Ehudi ana duka, ta ka pita mafano aga va honga dogoro ta ka sika koSeira.
27 Apa ga ka sikire, ta fudu ruvinga momukunda gonondundu gwaEfurayimi, makura Vaisraeli tava tundu momukunda ogo ano age kwa va pitisilire.
28 Makura age ta va tantere asi: “Kwameni nge, yeeyi Jehova ana gava nonkore deni Vamowaba momawoko geni.” Awo tava mu kwama, tava ka sikama pomavango gokurutira gomukuro gwaJorodana, yipo va kondere Vamowaba va dire kutjwayuka ntani kapi va pulisilire nkenye ogu a rute.
29 Posiruwo oso, awo kwa dipagere Vamowaba wokusika koyiha 10 000, awo kwa kere vagara wononkondo; kwato nampili gumwe ogu ga vhulire kutjwayuka.
30 Vaisraeli kwa fundire Vamowaba ezuva olyo makura kutunda opo sirongo tasi kara mombili nomvhura 80.
31 Konyima zaEhudi, ta kukwama Samugara munaAnati. Age kwa dipagere vagara woVafilisiti 600 nositji soutwe.* Samugara nage kwa poperere Vaisraeli.
Nonkango dokonhi
^ Ndi “pevero lyaHamati.”
^ Tara koMauzera.
^ MoRuhebeli asi “Aramu-naharayimu.”
^ MoRuhebeli asi “Aramu.”
^ Ndi “mauhwi.”
^ Kwa tamba korufuro ronomemo mbali.
^ MoRuhebeli asi “cubit zimwe.” Nampo kwa tamba kocubit zonsupi. Tara App. B14.
^ MoRuhebeli asi “Mweneni!”
^ Kwa tamba sininke sokukwatera esi sa kara korufuro.
^ MoRuhebeli asi “kuna kudumike nompadi dendi.”
^ Kwa tamba kositji soutwe esi ngava singisa nongombe.
