Vapanguli 4:1-24
4 Nye konyima zapa ga fire Ehudi, Vaisraeli tava tameke hena kurugana yininke yoyidona kosipara saJehova.
2 Makura Jehova ta va gava momawoko gaJabini hompa goVakanani ogu nga pangere mositata saHasoro. Mukurona govakwayita vendi kwa kere Sisera ogu ga tungire moHarosete zovanayirongo.*
3 Vaisraeli kwa likwamberere kwaJehova, morwa Jabini* kwa kere noturukara toyita 900 otu twa kere nomarufuro komakoso* ntani kwa hepekere unene Vaisraeli nomvhura 20.
4 Muporofete gomukadi Debora kwa kere mupanguli goVaisraeli posiruwo oso ntani age kwa kere mukadaRapidoto.
5 Debora nga hingire mositji sendi songone esi sa kara pokatji kaRama naBeteli momukunda gonondundu gwaEfurayimi. Ano Vaisraeli ngava zi kwendi, a ka va tantere eyi ana tokora Karunga.
6 Age kwa tuminine Baraka munaAbinoamu ogu ga kere moKedesi-nafitali, age kwa mu tanterere asi: “Jehova Karunga goVaisraeli kwa ku pangera asi: ‘Zende* koNdundu zaTaboro kumwe novagara 10 000 womorudi rwaNafitali naSeburoni.
7 Ame ngani kuretera Sisera mukurona govakwayita vaJabini noturukara twendi toyita novakwayita vendi korunone* rwaKisoni ntani ngani mu gava momawoko goge.’”
8 Makura Baraka ta tantere Debora asi: “Ame ngani za nsene ngo za name, nye nsene kapi ngo za name, ame kapi ngani za ko.”
9 Makura Debora ta tanta asi: “Ngani za nove. Nye nampili ngoso, ove kapi ngo gwana efumano moyita eyi, yeeyi Jehova nga gava Sisera momawoko gomukadi.” Makura Debora ta katuka a ze kumwe naBaraka koKedesi.
10 Baraka kwa zigidire vagara womorudi rwaSeburoni noru rwaNafitali va ze kumwe koKedesi. Ano vagara wokusika 10 000 tava mu kwama. Debora kwa zire kumwe nage.
11 Hebere goMukeni kapi ga tungire noVakeni vakwawo ava va tundire moruvharo rwaHobabu. Age kwa kere tamweyi zaMosesa, ano tende zendi kwa zi dikilire pepi nositji sosinene moSananimu moKedesi.
12 Awo kwa tanterere Sisera asi Baraka munaAbinoamu ana zi koNdundu zaTaboro.
13 Makura Sisera ta pongaike turukara twendi toyita 900, otu twa kara nomarufuro komakoso* ntani novakwayita navenye ava va tundire nage moHarosete zovanayirongo va ze korunone* rwaKisoni.
14 Ano Debora ta tantere Baraka asi: “Katuka, yeeyi ezuva lyanaina Jehova na gava Sisera momawoko goge. Jehova yige ana kukupitisira.” Makura Baraka ta tundu koNdundu zaTaboro kumwe novagara 10 000 ava va mu kweme.
15 Makura Jehova ta piyaganeke Sisera novakwayita vendi ntani noturukara twendi toyita komeho zaBaraka. Sisera ta humburuka mokarukara kendi a duke.
16 Baraka ta tjida turukara toyita dogoro koHarosete zovanayirongo. Vakwayita navenye vaSisera kwa va dipagere; kwato ogu ga hupire po.
17 Nye Sisera kwa dukilire motende zaJayeli mukadaHebere, yeeyi Jabini hompa gwaHasoro kwa kere nombili nepata lyaHebere goMukeni.
18 Makura Jayeli ta pwaga a gwane Sisera, ta mu tantere asi: “Hompa gwange hwilira. Wa ha tjira.” Sisera ta hwilire motende zaJayeli, makura Jayeli ta mu kudumike nguho.
19 Sisera ta mu tantere asi: “Na kanderere, pe nge ko mema ni nwe, yeeyi ame enota nina kuzuvha.” Makura Jayeli ta paturura mpunda* omu mwa kere masini, ta mu pe a nwe. Konyima ta mu kudumike hena nguho.
20 Sisera ta tantere Jayeli asi: “Sikama pevero lyotende, ano nsene na kupura muntu asi: ‘Mweli mugara motende zoge ndi?’ uyunga asi: ‘Mwato!’”
21 Nye Jayeli mukadaHebere ta gusa mbohwa zokotende nohamara. Ano apa ga ponyokere Sisera morwa eroroko, ta mu hondjavere, ta mu pampara mbohwa momutwe dogoro ta zi ka hwilira mevhu, makura ta fu.
22 Baraka kwa sikwire Sisera, makura Jayeli ta pwaga a gwanekere nendi, ta mu tantere asi: “Wiza ni ya ku likide mugara ogu ono kupapara.” Makura Baraka ta zi motende zaJayeli, ta ka gwana Sisera ana fu azo mbohwa momutwe gwendi.
23 Yipo nye, mezuva olyo, Karunga kwa fundire Jabini hompa goVakanani komeho zoVaisraeli.
24 Vaisraeli kwa twikilire kurwisa Jabini hompa goVakanani dogoro tava mu dipaga.
Nonkango dokonhi
^ Ndi “Harosete-hagoyimu.”
^ MoRuhebeli asi “age.”
^ MoRuhebeli asi “turukara toyivera.”
^ Ndi “Tuma vagara.”
^ Ndi “komuramba.”
^ MoRuhebeli asi “turukara toyivera.”
^ Ndi “komuramba.”
^ Ndjato va ruganesa kosipapa sosikorama. Tara koMauzera.
