Vapanguli 6:1-40
6 Nye Vaisraeli kwa rugene hena yininke yoyidona kosipara saJehova, makura Jehova ta va gava momawoko goVamidiyani nomvhura ntambali.
2 Vamidiyani kwa hepekere Vaisraeli, makura Vaisraeli tava duka va ka vande konondundu, momakombombo ntani komavango goudigu kuza.
3 Apa ngava kunu Vaisraeli nombuto, Vamidiyani noVaamareki ntani novantu ava va tunga koUpumezuva ngava va rwisa.
4 Awo ngava dike notende dawo yipo va rwise Vaisraeli ntani ngava zonagura muzangu gwawo dogoro koGasa. Awo kapi ngava sigire po Vaisraeli eyi nava lya ndi va sige nzwi ndi ntwedu ndi sindongi.
5 Awo ngava wiza noyimuna yawo nonotende dawo ntani vanzi va kere ngwendi simbonde. Kwato ogu nga vhuru kuvavarura ntani kwato ogu nga vhuru kuvarura nongameru dawo. Awo ngava wiza mosirongo va ya si zonagure.
6 Makura Vaisraeli ta ru va gwana ruhepo rorunene morwa Vamidiyani; tava likwambere kwaJehova a va vatere.
7 Apa va likwamberere Vaisraeli kwaJehova a va vatere koVamidiyani,
8 Jehova ta va tumine muporofete ogu ga va tanterere asi: “Jehova Karunga goVaisraeli kuna tanta asi: ‘Ame kwa mu gusa moEgipite omu mwa kere vapika.
9 Yipo nye, ame kwa mu poperere koVaegipite nokovantu ava va mu hepekere ntani kwa va tjidire komeho zeni, tani mu pe sirongo sawo.
10 Ame kwa mu tanterere asi: “Ame nyame Karunga gweni Jehova. Mwa ha tjira yikarunga yoVaamoli ava va kara mosirongo esi mwa tunga.” Nye one kapi mwa limburukwire nge.’”*
11 Konyima, muengeli gwaJehova ta wiza, ta hingire mositji sosinene esi sa kere moOfura. Sitji oso kwa kere saJowasi gomoruvharo rwaAbiyesere. Munendi Ngidiyona kwa hwege rukokotwa mosikameno sovhinyu, yipo va dire kurumona Vamidiyani.
12 Muengeli gwaJehova ta mu monekere, ta mu tantere asi: “Jehova kumwe nove ana kara, ove mukwayita gononkondo.”
13 Makura Ngidiyona ta mu limburura asi: “Gusira nge po hompa gwange. Nsene asi Jehova kumwe nose ana kara, morwasinke tuna kuligwanekerera nomaudigu aga? Ose kapi tuna kumona yirugana yendi nayinye yoyiwa eyi va tu tantera ozinyakurwetu asi ‘Jehova kwa tu gusa mosirongo saEgipite.’ Nye Jehova ga tu zumba ntani ga tu gava momawoko goVamidiyani.”
14 Makura Jehova ta mu tara, ta tanta asi: “Zende o ka ruganese nonkondo doge, o popere Vaisraeli momawoko goVamidiyani. Nani kapisi nyame nina kukutuma?”
15 Ngidiyona ta mu limburura asi: “Gusira nge po Jehova. Ngapi omu nani popera Vaisraeli mokumona asi epata lyetu yilyo lyenunu po morudi rwaManase ntani ame nyame gokudira mulyo po mepata lyotate?”
16 Nye Jehova ta mu limburura asi: “Ame ngani kara kumwe nove, eyi yiyo ngo fundira Vamidiyani ngwendi muntu gumwe ono kurwanesa.”
17 Makura Ngidiyona ta mu tantere asi: “Nsene asi ono hafere nge, likida nge sidiviso yipo ni yi pure asi nyove ono kuuyunga name.
18 Wa ha tunda po apa dogoro ni ka tengure nouhwi ni ya u ture komeho zoge.” Makura muengeli ta tanta asi: “Tani kara paapa dogoro o ka tengure.”
19 Ngidiyona ta zi, ta ka tereka sikombogona ntani ta ka rugana mboroto zokudira yihaheso nousura wonokilograma 11.* Makura ta tura nyama posikumba, ano muhoka mokayiga, makura ta yi mu twarere mositji sosinene.
20 Muengeli gwaKarunga gousili ta mu tantere asi: “Gusa nyama ntani mboroto zokudira yihaheso o yi ture pemanya lyenene makura o tjisire ko muhoka.” Makura age ta yi rugana.
21 Muengeli gwaJehova ta gusa mpango ezi za kere mokuwoko kwendi, ta ninki zi gume konyama ntani komboroto zokudira yihaheso, ano mundiro tagu tundu memanya tagu hwike nyama nomboroto zokudira yihaheso. Makura muengeli gwaJehova ta dongonoka.
22 Ngidiyona ta dimburura asi age kwa kere muengeli gwaJehova.
Makura ta tanta asi: “Nane woo!, Jehova Hompa Mupangeli gwanayinye, ame nina mono muengeli gwaJehova sipara nosipara!”
23 Nye Jehova ta mu tantere asi: “Mbili zi kare nove. Wa ha tjira, kapi no fa.”
24 Makura Ngidiyona ta dikire po Jehova sizambero, aso kusitumbura asi Jehova mbili* dogoro naina. Aso kwa kara moOfura omu va kara womoruvharo rwaAbiyesere.
25 Masiku ogo, Jehova ta mu tantere asi: “Gusa ntwedugona zoguho zauvali zonomvhura ntambali ntani zonagura sizambero saBara esi va kara naso oguho nokuteta ngundi zokupongoka* ezi za kara pepi naso.
26 Apa no mana kutunga sizambero saKarunga goge Jehova keguru lyemanya eli, nokutura mamanya momukweyo, gusa ntwedugona zauvali o zi gave ngonzambo zeswakerero, o zi ture poyitare eyi yina tundu kongundi zokupongoka* ezi ono tetagura.”
27 Makura Ngidiyona ta gusa vakareli vendi wovagara murongo, ta rugana moomu ga mu tanterere Jehova. Nye age kwa tjilire vemepata lyoguhwe ntani vagara womositata, makura yipo ga yi rugene masiku.
28 Apa va pindukire ngurangura zonene vagara womositata, tava mono sizambero saBara vana si zonagura po ntani ngundi zokupongoka* ezi za kere pepi naso vana zi tete, ano ntwedugona zauvali vana zi zamba posizambero esi va dikire.
29 Awo tava lipura vene navene asi: “Yilye ogu ana yi rugana eyi?” Konyima zokuyikonakona tava tanta asi: “Ngidiyona munaJowasi yige ana yi rugana eyi.”
30 Makura vagara womositata tava tantere Jowasi asi: “Pwagesa munoge tu ya mu dipage morwa ana zonagura sizambero saBara nokuteta ngundi zokupongoka* ezi za kara pepi naso.”
31 Makura Jowasi ta tantere ava va mu zililire asi: “Morwasinke muna kupoperera Bara? Morwasinke muna kumuvaterera? Nkenye ogu ana kumupopera va hepa kumudipaga ngurangura ezi. Nsene asi age karunga, mu sigeni a lipopere mwene mokumona asi kweli ogu ana zonagura po sizambero sendi.”
32 Makura ta ruku Ngidiyona edina Jerubara* ezuva olyo, ta tanta asi: “Bara a lipopere mwene, mokumona asi kweli ogu ana zonagura sizambero sendi.”
33 Vamidiyani navenye noVaamareki ntani novantu ava va tunga koUpumezuva, tava lipakerere, tava rutu mesinya mwina* lyoMuramba gwaJesireli, makura tava dike notende dawo.
34 Makura Jehova ta gava mpepo zendi zokupongoka kwaNgidiyona. Makura Ngidiyona ta fudu ruvinga, ano womoruvharo rwaAbiyesere tava mu kwama.
35 Age kwa tumine hena vantu va ze kovantu womorudi rwaManase, makura nawo tava wiza va ya mu kwatese ko. Ngidiyona kwa tumine hena vantu korudi rwaAseli, rwaSeburoni noru rwaNafitali, makura awo tava wiza va ya gwanekere nage.
36 Ngidiyona ta tantere Karunga gousili asi: “Nsene nyame ono kuruganesa ni popere Vaisraeli ngwendi moomu wa yi tumbwidira,
37 ame kuna kutura nohuki dononzwi porupare, nsene eme na li gwira ponohuki, nye evhu nalinye li kukute makura nani yi diva asi ove ngo ruganesa nge ni popere Vaisraeli ngwendi moomu wa yi tumbwidira.”
38 Makura ta yi horoka ngorooro. Apa ga pindukire ngurangura zonene ezuva lyokukwama ko, ta kama nohuki dononzwi, ano eme eli lya tundire konohuki dononzwi kwa zwidire rupasa rorunene.
39 Nye Ngidiyona ta tantere hena Karunga gousili asi: “Wa ha handukira nge nye ninka ni ku pure hena. Na kanderere, ninka hena ni ruganese nohuki dononzwi ni heteke nsene simpe no kara kumwe name. Ninka nohuki dononzwi di kukute ano eme li gwire pevhu nalinye.”
40 Ano Karunga ta yi rugana masiku ogo. Nohuki dononzwi kwa kukutire, ano eme kwa worekere evhu nalinye.
Nonkango dokonhi
^ MoRuhebeli asi “kapi mwa purakenene kezwi lyange.”
^ MoRuhebeli asi “ephah zimwe.” Tara App. B14.
^ Ndi “Jehova-shalom.”
^ Tara koMauzera.
^ Tara koMauzera.
^ Tara koMauzera.
^ Tara koMauzera.
^ Kutanta asi “Bara a lipopere mwene paveta.”
^ Ndi “tava rutu mukuro.”
