Vapanguli 7:1-25
7 Makura Jerubara ndi Ngidiyona novantu ava ga kere nawo, tava pinduka ngurangura zonene tava ka dika notende dawo pepi norunone rwaHarodo, ano kamba zoVamidiyani kwa kere koMuzogo gokamba zoNgidiyona kondundu zaMore ezi za kara momuramba.
2 Jehova ta tantere Ngidiyona asi: “Kapi tani vhuru kugava Vamidiyani momawoko goge, morwa vantu ava ono kara nawo vanzi, ndi ngano Vaisraeli ngava gazara asi awo kwa funda morwa nonkondo davene.
3 Tantera vantu asi: ‘Nkenye ogu ana kara noutjirwe ntani kuna kukankama, a tengure kembo.’” Makura Ngidiyona ta va heteke. Vantu 22 000 tava tengura kembo, ano vantu 10 000 yiwo va hupire po.
4 Jehova ta tantere hena Ngidiyona asi: “Simpe vantu vanzi ono kara nawo. Va ninka va ze korunone yipo ni ka va heteke. Ame nani ka ku tantera asi yilye ogu na za nove nogu na dira kuza nove.”
5 Makura Ngidiyona ta twara vantu korunone.
Jehova ta tantere Ngidiyona asi: “Nkenye ogu na nwa mema nomawoko gendi ngwendi moomu azi nu mbwa mema, mu tulira ruha rumwe. Ano nkenye ogu na tongamena a nwe mema, nage mu tulira ruha rumwe.”
6 Sivaro sovantu ava va nwine mema nomawoko gawo va hana kutongamena kwa kere 300. Ano vantu wokuhupa ko kwa tongamenene va nwe mema.
7 Makura Jehova ta tantere Ngidiyona asi: “Ame ngani kupopera kumwe novagara 300 ava vana nu mema nomawoko gawo ntani ame ngani gava Vamidiyani momawoko goge. Nye vantu wokuhupa ko va ninka va tengure kembo.”
8 Konyima zokugusa nondya ntani nonombinga kovantu, Ngidiyona ta ninki vakwayita wokuhupa ko va tengure kembo. Age kwa kere tupu novagara 300. Kamba zoVamidiyani kwa livyukire nage momuramba.
9 Masiku ogo, Jehova ta mu tantere asi: “Pinduka o ka homone kamba, yeeyi ame nina zi gava momawoko goge.
10 Nye nsene asi woma ono kuzuvha, zende kokamba kumwe nomukareli goge Pura.
11 Purakena eyi nava uyunga, ano konyima ove no kara nouradi* wokuhomona kamba ozo.” Makura nage nomukareli gwendi Pura tava zi pepi nokamba zovakwayita.
12 Vamidiyani noVaamareki novantu navenye ava va tunga koUpumezuva, kwa zulire momuramba ngwendi madugi gasimbonde. Ano nongameru dawo kwa kere nonzi unene ngwendi muheke gwekefuta.
13 Makura Ngidiyona ta wiza, ta zuvhu mugara ana kutantera mukwawo nzodi zendi. Mugara ogo kwa tanterere mukwawo asi: “Ame kuna roto asi mboroto zokuliudinga zoyilya kuna kugarumukira mokamba zoVamidiyani. Azo kuna zi kotende yiyo zina litoona mo unene ano yiyo zina gu tende.”
14 Makura mukwawo zogo mugara, ta mu limburura asi: “Ayo kwa fanekesa rufuro rwaNgidiyona munaJowasi goMuisraeli. Karunga ana gava Vamidiyani ntani nokamba nazinye momawoko gendi.”
15 Apa ga zuvhire Ngidiyona mugara ana kusimwitira nzodi nomu va zi fatwilire, makura ta linyongamene a karere Karunga. Konyima ta tengura kokamba zoVaisraeli ta tanta asi: “Katukeni, yeeyi Jehova ana gava kamba zoVamidiyani momawoko getu.”
16 Makura ta gaununa vagara 300 monombunga ntatu, tava pe nombinga notuvaza totunene omu va tulire noramba.
17 Makura ta va tantere asi: “Tarereni nge, mu rugane eyi nani rugana. Apa nani za konontere dokamba, none mwa hepa kuza.
18 Apa nani fuda ruvinga kumwe novantu ava ngani kara nawo, none mwa hepa kufuda nombinga mu zigire asi: ‘Rufuro rwaJehova noru rwaNgidiyona!’”
19 Ngidiyona novagara 100 ava ga kere nawo, tava zi konontere dokamba pokatji komasiku, posiruwo esi ava litjindji vanomeni wokuhova.* Awo kwa fudire nombinga makura tava tavagura tuvaza twawo totunene tomema otu va kwatererere.
20 Makura nombunga ntatu tadi fudu nombinga, tava tavagura tuvaza. Awo kwa kwaterere noramba momawoko gawo gokorumoho ntani kwa fudire nombinga edi va kwaterere momawoko gawo gokorulyo. Awo kwa zigilire asi: “Rufuro rwaJehova noru rwaNgidiyona!”
21 Nkenye ogu kwa sikeme pevango lyendi ntani awo kwa kundurukidire kamba, makura vakwayita navenye tava duka oku tava zigire.
22 Vagara 300 kwa twikilire kufuda nombinga, ano Jehova kwa ninkire vantu mokamba va lirwanese. Makura vakwayita tava duka dogoro koBete-sita va vyuke koSarera ntani dogoro koAbeli-mehora pepi naTabata.
23 Vagara woVaisraeli womorudi rwaNafitali noru rwaAseli ntani nava womorudi rwaManase, kwa va zigidire va tjide Vamidiyani.
24 Ngidiyona kwa tumine vantu va ze momukunda gonondundu gwaEfurayimi, va tantere vantu asi: “Zendeni mu ka rwise Vamidiyani ntani mu ka kwate mavango gawo gokurutira dogoro koBete-bara nokomukuro gwaJorodana.” Makura vagara navenye womorudi rwaEfurayimi tava pongo kumwe, tava ka kwata mavango gawo gokurutira dogoro koBete-bara ntani komukuro gwaJorodana.
25 Awo kwa kwete hena vapitisili woVamidiyani, Orebu naSebu; tava dipagere Orebu pemanya lyaOrebu, ano Sebu kwa mu dipagerere mosikameno sovhinyu saSebu. Awo kwa twikilire kutjida Vamidiyani ntani awo kwa retere mutwe gwaOrebu nogu gwaSebu kwaNgidiyona momukunda gwaJorodana.
Nonkango dokonhi
^ MoRuhebeli asi “mawoko goge naga kara nononkondo.”
^ Kutundilira koyiha yovili 10 kositenguko dogoro vili 2 kongurangura.
