Vapanguli 8:1-35
8 Makura vagara womorudi rwaEfurayimi tava tantere Ngidiyona asi: “Morwasinke wa tu ruganena yininke eyi? Morwasinke wa dililire kutuzigida tu ze kumwe nove tu ka rwise Vamidiyani?” Awo kwa mu tangwisire unene.
2 Nye age ta va tantere asi: “Eyi na rugana nayimwe si mokuyihetakanesa neyi mwa rugana. Nani mandjembere aga va pongaika womorudi rwaEfurayimi kapisi mawa kupitakana eyi va zangura womoruvharo rwaAbiyesere?
3 Karunga kwa geve Orebu naSebu vapitisili woVamidiyani momawoko geni. Eyi na rugana nayimwe si mokuyihetakanesa neyi mwa rugana.” Apa ga uyungire nonkango edi, makura awo tava litura.
4 Ngidiyona ta zi komukuro gwaJorodana, makura ta rutu. Nage novagara 300 ava ga kere nawo kwa rorokere, nye awo kwa twikilire kutjida nonkore dawo.
5 Makura ta tantere vagara womoSukoto asi: “Na kanderere, peni ko vagara ava vana kukwama nge mboroto, yeeyi awo vana roroka ntani ose kuna kutjida Seba naSalimuna vahompa woVamidiyani.”
6 Nye vapitisili womoSukoto tava tanta asi: “Morwasinke natu gavera mboroto kovakwayita woge? Ove nare ono kwata Seba naSalimuna ndi?”
7 Makura Ngidiyona ta tanta asi: “Nawa tupu, apa nga gava Jehova Seba naSalimuna momawoko gange, ame ngani tjaragura marutu geni nomega ntani nononhonho domomburundu.”
8 Apa ga tundire opo, ta zi koPenueli ta ka hundira yininke yokulifana, nye vagara womoPenueli tava mu limburura ngwendi moomu va mu limbwilire vagara womoSukoto.
9 Age kwa tanterere hena vagara womoPenueli asi: “Apa ngani ka funda, ame ngani ya zonagura po ruhungu oru.”
10 Seba naSalimuna kwa kere moKarakoro kumwe novakwayita vawo wokusika koyiha 15 000. Ava yiwo velike vakwayita ava va hupire po povakwayita wokoUpumezuva, yeeyi vakwayita wokusika po 120 000 kwa va dipagere norufuro.
11 Ngidiyona kwa twikilire kugenda monzira ezi ava gendi vantu ava va tunga monotende koUpumezuva waNoba naJogebeha, ta ka homona kamba ezi za dilire kuliwapaikira yita.
12 Seba naSalimuna apa va dukire, Ngidiyona ta va tjida ta ka kwata vahompa owo vavali woVamidiyani, makura vantu womokamba tava piyagana.
13 Ngidiyona munaJowasi makura ta tundu koyita, ta piti nzira ezi za vyuka koHeresi.
14 Monzira zendi, ta kwata mumatigona gomoSukoto, makura ta mu puragere. Mumatigona ogo makura ta tjanga madina govapitisili nomasimbi gomoSukoto 77.
15 Makura Ngidiyona ta zi kovagara womoSukoto, ta ka va tantera asi: “Seba naSalimuna vava, ava mwa ninkire nge asi: ‘Morwasinke natu gavera mboroto kovakwayita woge? Ove nare ono kwata Seba naSalimuna ndi?’”
16 Makura ta gusa masimbi gomositata, ta tengeke vagara womoSukoto nomega ntani nononhonho domomburundu.
17 Ngidiyona kwa zonagwire hena ruhungu romoPenueli, makura ta dipaga vagara womositata.
18 Makura ta pura Seba naSalimuna asi: “Vagara wokufana ngapi mwa dipagere moTaboro?” Awo tava mu limburura asi: “Awo kwa fene ngwendi nyove, nkenye ogu kwa fene ngwendi munahompa.”
19 Ngidiyona ta tanta asi: “Vagara owo, vana wonane. Ame tani gana komeho zaJehova asi ngano kapi mwa va dipagere ngano name kapi nani mu dipaga.”
20 Makura ta tantere mbeli zendi Jetere asi: “Katuka, o va dipage.” Nye mumati ogo kapi ga gusire rufuro rwendi, age kwa kere nowoma yeeyi age kwa kere munona.
21 Makura Seba naSalimuna tava tanta asi: “Nani ove kapisi mugara gononkondo? Morwasinke ono kudilira kukatuka o tu dipage nyamoge?” Makura Ngidiyona ta katuka, ta dipaga Seba naSalimuna ntani ta gusa maurenga gokufana ngwendi kwedi aga ga kere mononsingo donongameru dawo.
22 Konyima, vagara woVaisraeli tava tantere Ngidiyona asi: “Tu pangera nove namunoge ntani namutekuroge, yeeyi ove ono tu popere momawoko goVamidiyani.”
23 Nye Ngidiyona ta va tantere asi: “Name namunange kapi tatu mu pangere. Jehova yige na mu pangera.”
24 Ngidiyona ta tanta hena asi: “Tani mu hundire sininke simwe: Nkenye ogu a guse pemona lyendi linga zokudwara mezuru a zi pe nge.” (Nonkore dawo kwa kere nonolinga dongorodo demezuru, morwa awo kwa kere womoruvharo rwaIsimayeli.)
25 Makura tava limburura asi: “Tatu di ku pe.” Makura awo tava zara ekehe, ano nkenye ogu ta gusa pemona lyendi linga zokudwara mezuru ta zi tura pekehe.
26 Mukumo gonolinga dongorodo demezuru edi va mu pere kwa sikire ponokilograma 19,* kugusa ko maurenga gokufana ngwendi kwedi, tuurenga, makehe gopurupuli aga ngava dwara vahompa woVamidiyani ntani maurenga gomononsingo donongameru.
27 Makura Ngidiyona ta yi rugana sikoverero sopomapepe, ta si tura mositata sendi saOfura, ano Vaisraeli navenye kwa si karerere* ntani aso kwa kere siraha kwaNgidiyona nepata lyendi.
28 Ngesi yimo Vaisraeli va fundire Vamidiyani ntani awo kapi va rwanesere hena Vaisraeli.* Ano sirongo kwa kere mombili nomvhura 40 posiruwo saNgidiyona.
29 Makura Jerubara munaJowasi ta tengura kembo lyendi, ta ka kara kooko.
30 Ngidiyona kwa kere novana 70, yeeyi age kwa kere novakadi wovanzi.
31 Mukadendi* gumwe gomoSikemu nage kwa mu reterere munona gomumati, ta mu ruku Abimereki.
32 Ano Ngidiyona munaJowasi ta dogoroka konyima zokuparuka nawa siruwo sosire ntani age kwa mu horekere montoko zoguhwe Jowasi moOfura, sitata soruvharo rwaAbiyesere.
33 Konyima zapa ga fire Ngidiyona, Vaisraeli tava tameke hena kukarera* mafano gaBara ntani tava horowora Bara-beriti a kare karunga gwawo.
34 Vaisraeli kapi va diworokere Karunga gwawo Jehova ogu ga va poperere momawoko gononkore dawo edi dava kundurukidire,
35 ndi va likide eharo lyanarunye kepata lyaJerubara ndi Ngidiyona koyininke nayinye yoyiwa eyi ga ruganenene Vaisraeli.
Nonkango dokonhi
^ MoRuhebeli asi “noshekel dongorodo 1 700.” Tara App. B14.
^ Ndi “kwa honderere naso pampepo.”
^ MoRuhebeli asi “kapi va kankwire nomutwe dawo.”
^ Ndi “Sihora.”
^ Ndi “tava hondere nago pampepo.”
