Vapanguli 9:1-57
9 Konyima, Abimereki munaJerubara kwa zire kovahekuru vendi moSikemu, ta ka va tantera kumwe nekoro lyozinakuru wovagara asi:
2 “Pureni vapitisili navenye womoSikemu asi: ‘Muna hara vana vaJerubara wovagara navenye 70 va mu pangere ndi a mu pangere muntu gumwe tupu? Diworokeni asi ame ekoro lyeni.’”
3 Makura vahekuru vendi tava ka tantera vapitisili womoSikemu mbudi ezi ga va tanterere, makura awo tava tokora kukwama Abimereki, yeeyi awo kwa tente asi: “Age ekoro lyetu.”
4 Awo makura tava pe Abimereki yisiliveli 70 yomontembeli zaBara-beriti, ano Abimereki ta ruganesa yisiliveli oyo mokufuta vagara wokudira yirugana ntani wondino, yipo va ze kumwe nage.
5 Konyima, ta zi kembo lyoguhwe Jerubara moOfura makura ta ka dipaga vana woguhwe 70 pemanya limwe. Jotamu munaJerubara gomunona po yige gelike ga parukire, morwa age kwa vende.
6 Makura vapitisili navenye womoSikemu ntani nava va tunga moBete-miro tava pongo kumwe va ture Abimereki a kare hompa. Awo kwa yi ruganenene pepi nositji sosinene ntani nongundi ezi za kere moSikemu.
7 Apa ga yi zuvhire Jotamu, ta zi a ka sikame keguru lyoNdundu zaGelisimu. Age kwa va zigilire nezwi lyenene asi: “Purakeneni nge one vapitisili womoSikemu, makura Karunga nage a mu purakene.
8 “Pwa kere yitji eyi ya zire yi ka horowore* hompa ogu na yi pangera, makura tayi tantere sitji souzwe asi: ‘Ninka o tu pangere.’
9 Nye sitji souzwe tasi va tantere asi: ‘Kapi nina hara kuhageka kugava magadi aga ava ruganesa mokuyererepeka Karunga novantu ni ka pangere yitji yapeke.’*
10 Makura yitji tayi tantere sitji soukuzu asi: ‘Wiza o ya tu pangere.’
11 Nye sitji soukuzu tasi va tantere asi: ‘Kapi nina hara kusiga enyango lyange lyoutovara ni ka pangere yitji yapeke.’*
12 Konyima, yitji tayi tantere sitji somandjembere asi: ‘Wiza o ya tu pangere.’
13 Sitji somandjembere tasi limburura asi: ‘Kapi nina hara kusiga vhinyu zange zompe ezi azi hafesa Karunga novantu ni ka pangere yitji yapeke.’*
14 Konyima, yitji nayinye tayi tantere sitji somega asi: ‘Wiza o ya tu pangere.’
15 Makura sitji somega tasi va limburura asi: ‘Nsene muna hara kutura nge ni kare hompa gweni, wizeni mu ya vande momundwire gwange. Nye nsene kapi muna kutura nge ni kare hompa gweni, mundiro ngano gu tunde mositji somega gu ya hwike yitji yosedeli yomoLibanoni.’
16 “One ngoso kwa rugene youhunga apa mwa tulire Abimereki a kare hompa ndi? One mwa likida uwa Jerubara nepata lyendi morwa eyi ga mu ruganena ndi?
17 Otate kwa tulire eparu* lyawo mosiponga, yipo va mu popere koVamidiyani.
18 Nye neina one kuna homokere epata lyotate ntani muna dipaga vana vawo 70 pemanya limwe. Makura yiyo muna tura Abimereki, muna gomupika a kare hompa govantu womoSikemu, morwa age ekoro lyeni.
19 Nsene asi one kuna tekura Jerubara nepata lyendi monkedi zouhunga, hafeni kumwe naAbimereki.
20 Nye nsene kapisi yimo, mundiro ngano gu tunde kwaAbimereki gu hwike vapitisili womoSikemu nava womoBete-miro ntani mundiro ngano gu tunde kovapitisili womoSikemu nava womoBete-miro gu hwike Abimereki.”
21 Makura Jotamu ta duka a tjwayukire koBere. Age kwa ka tungire kooko, morwa mukurwendi Abimereki.
22 Abimereki kwa pangerere Vaisraeli nomvhura ntatu.
23 Makura Karunga ta ninkisa* Abimereki novapitisili womoSikemu va dire kulizuvha, awo kwa gendere Abimereki konhi.
24 Karunga kwa pulisilire yininke eyi yi horoke yipo a tengwide kuwoko vantu ava va dipagere vana vaJerubara 70. Age kwa tengekere Abimereki novapitisili womoSikemu kweyi va tjisangere honde zovana vaJerubara. Abimereki yige ga va dipagere, ano vapitisili womoSikemu kwa mu kwatesere ko.
25 Makura vapitisili womoSikemu tava tura vagara keguru lyonondundu va vandere Abimereki. Awo ngava hakana nkenye ogu nga piti nzira ozo. Konyima, Abimereki ta yi zuvhu.
26 Makura Gali munaEbedi ta zi moSikemu kumwe nekoro lyendi, ano vapitisili womoSikemu kwa mu huguvarere.
27 Awo kwa zire ponze zositata, tava ka nyanga mandjembere gomoyikunino yawo, tava ga lyatanga va rugane vhinyu makura tava dana sipito. Ano konyima, tava zi montembeli zakarunga gwawo, tava li nokunwa ntani tava fingi Abimereki.
28 Makura Gali munaEbedi ta tanta asi: “Morwasinke natu limburukwira Abimereki naSikemu? Abimereki nani kapisi munaJerubara? Nani erenga lyendi kapisi Sebuli? Limburukweni vana vaHamoro guhyaSikemu. Morwasinke nye natu limburukwira Abimereki?
29 Ngano vantu ava kwa kere mepangero lyange, ngano ngani gusa Abimereki mouhompa.” Makura ta uyunga kuhamena Abimereki asi: “Gwederera vakwayita woge o ya rwise nge.”
30 Apa ga yi zuvhire Sebuli mupangeli gomositata eyi ga uyungire Gali munaEbedi, ta handuka unene.
31 Makura ta tumu mokahore-hore vantu kwaAbimereki va ka mu tantere asi: “Gali munaEbedi mweli moSikemu kumwe nekoro lyendi ntani awo kuna kuninkisa vantu womositata va ku rwanese.
32 Wiza kumwe novantu woge masiku o ya va ndindire ponze zositata.
33 Apa ngali sa ezuva, ngo livinduke kupinduka o homokere sitata. Ano apa nga kurwanesa kumwe novantu vendi, ngo kondje paapa wa hulira yipo o mu funde.”
34 Makura Abimereki novantu vendi tava katuka va ze masiku. Awo kwa ndindilire ponze zositata saSikemu ntani kwa lihangwire monombunga ne.
35 Apa ga zire Gali munaEbedi pevero lyositata, Abimereki novantu vendi tava tundu oku va kere va mu homokere.
36 Apa ga va mwene Gali, ta tantere Sebuli asi: “Tara vantu ava vana kutunda keguru lyonondundu.” Nye Sebuli ta mu tantere asi: “Ove kuna kumona nomundunduma donondundu, kapisi vantu.”
37 Konyima, Gali ta tanta hena asi: “Tara vantu ava vana kutunda pokatji komukunda, ano vamwe kuna kutundilira konzira ezi za pita kositji sosinene saMeyonenimu.”
38 Sebuli ta mu limburura asi: “Nani kapisi nyove wa likangangere asi: ‘Morwasinke natu limburukwira Abimereki?’ Ava kapisi yiwo vantu wa sensere? Zende o ka va rwise.”
39 Makura Gali ta pitisire vapitisili womoSikemu, va ze va ka rwise Abimereki.
40 Abimereki ta tjida Gali, ano Gali ta duka ntani vantu wovanzi kwa va dipagere dogoro pevero lyositata.
41 Abimereki kwa twikilire kutunga moAruma, ano Sebuli ta tjida Gali nekoro lyendi va tunde moSikemu.
42 Ezuva eli lya kweme ko, vantu tava tundu mositata, ano Abimereki ga yi zuvhire
43 makura ta gusa vantu vendi, ta va gaununa monombunga ntatu, ta ndindire ponze zositata. Apa ga mwene vantu kuna kutunda mositata, tava homokere makura ta va dipaga.
44 Abimereki novantu vendi tava duka va ka sikame pevero lyositata. Ano nombunga mbali dokuhupa ko kwa homokerere navenye ava va kere ponze zositata, tava va dipaga.
45 Abimereki kwa rwisire vantu womositata ezuva nalinye, makura ta kwata sitata. Age kwa dipagere vantu ava va kere mo ntani kwa zungwilire sitata, ta tjisire mo mungwa.
46 Apa va yi zuvhire vapitisili woruhungu rwaSikemu, tava duka usimbu va ka vande montembeli zaEli-beriti.
47 Apa ga zuvhire Abimereki asi vapitisili woruhungu rwaSikemu vana pongo kumwe,
48 Abimereki novantu vendi navenye, tava zi koNdundu zaSalimoni. Abimereki ta gusa ekuva, ta tete mutayi gositji ta gu likambeke pepepe, ta tantere vantu vendi asi: “None ruganeni eyi nina rugana!”
49 Makura vantu vendi navenye nawo tava tete nomutayi, tava kwama Abimereki. Awo kwa tulire nomutayi odo konzugo ezi va vende vantu, tava zi hwike. Makura vantu navenye womoruhungu rwaSikemu tava fu. Vagara novakadi ava va fire kwa sikire koyiha 1 000.
50 Makura Abimereki ta zi koTebesi, ta kundurukida sitata saTebesi, ta si kwata.
51 Pokatji kositata oso kwa kere po ruhungu oru rwa kora, ano vagara novakadi novapitisili wositata kwa dukilire moruhungu oro. Awo kwa lipatererere ntani kwa rondere keguru lyoruhungu.
52 Abimereki ta zi koruhungu oro a ka ru zonagure. Apa ga ka sikire pevero lyoruhungu asi ngano a ru hwike,
53 makura mukadi gumwe ta gandere emanya lyokugogesa mbuto pomutwe gwaAbimereki, ta tauka mutwe.
54 Makura Abimereki ta zigida mukareli gwendi ogu nga mu simbire yirwiso yendi, ta mu tantere asi: “Gusa rufuro roge o dipage nge, yipo ngava dire kutanta asi: ‘Mukadi ga mu dipagere.’” Makura mukareli gwendi ta mu tu rufuro, ta fu.
55 Apa va mwene vantu womoIsraeli asi Abimereki ana fu, tava tengura komambo gawo.
56 Yipo nye, Karunga kwa tengwidire kuwoko Abimereki koudona ou ga rugene apa ga dipagere vana woguhwe 70.
57 Karunga kwa tengwidire hena kuwoko vagara womoSikemu kweyi va rugene. Yipo nye, nonkango daJotamu munaJerubara kwa sikire mo ngwendi moomu ga tente apa ga va fingire.
Nonkango dokonhi
^ Ndi “yi ka tungike.”
^ MoRuhebeli asi “ni ka linyungangere yitji yapeke.”
^ MoRuhebeli asi “ni ka linyungangere yitji yapeke.”
^ MoRuhebeli asi “ni ka linyungangere yitji yapeke.”
^ Ndi “mwenyo.”
^ MoRuhebeli asi “ta tumine mpepo zondona.”
