koVaroma 1:1-32
1 Mbilive ezi kuna kutunda kwaPaurusa, mukareli gwaJesus Kristusa. Ame kwa zigida nge ni kare mupositoli ntani kwa horowora nge ni zuvhise mbudi zongwa zaKarunga
2 ezi ga tumbwidira Karunga moMatjangwa gokupongoka kupitira movaporofete vendi.
3 Mbudi ezi kwa hamena kwaMunendi ogu ga tundilira moruvharo* rwaNdafita.
4 Age MunwaKarunga, yeeyi Karunga kwa ruganesere nonkondo dendi, mpepo zokupongoka, a mu pindure koufe. Muna ogu yige Jesus Kristusa, Hompa gwetu.
5 Karunga kwa tu likida nkenda kupitira mwendi. Jesus kwa horowora nge ni kare mupositoli, yipo ni vatere vantu wokonomuhoko nadinye va kare nepuro, va limburukwe ntani va fumadeke edina lyendi.
6 None kwa mu horowora mo monomuhoko mu kwame Jesus Kristusa.
7 Kwanamuvenye ava mwa kara moRoma ava ga hara Karunga noku mu horowora mu kare vapongoki:
Karunga Guhyetu naHompa Jesus Kristusa ngano va mu fire nkenda unene nokumupa mbili.
8 Pomuhowo, tani pandura Karunga gwange kupitira mwaJesus Kristusa kuhamena namuvenye, morwa vantu mouzuni naunye kuna kuuyunga kuhamena epuro lyeni.
9 Karunga ogu ani karere nomutjima gwange nagunye pokuzuvhisa mbudi zongwa kuhamena Munendi, ga yi diva asi ame kumutumbura nkenye apa momakanderero gange.
10 Ame kulikwambera kwaKarunga asi nsene a yi panga, ngani wiza kweni.
11 Yeeyi ame kuna hara ngani ya mu mone yipo ngani ya mu pe uhwi wopampepo mu ya nkondopare,
12 eyi nina tamba yeeyi asi epuro lyange li ya mu korangede, ano none lyeni li ya korangede nge.
13 Vakwetu, nina hara mu dive asi rorunzi ame kwa here kuwiza kweni yipo ni ya mone yitundwamo yoyiwa yokuzuvhisira oko, ngwendi moomu yina kuhoroka monomuhoko dapeke, nye dogoro ngesi kapi ya vhulika nge.
14 Ame kwa kara nositumbukira koVagereka novanayirongo* novanongo ntani magova.
15 Ame nina tokomene kuyamuzuvhisira mbudi zongwa omo moRoma.
16 Yeeyi ame nokulifa si nomuga mbudi zongwa, yeeyi yimo a parwire Karunga vantu, pomuhowo Vajuda ntani Vagereka.
17 Azo kuhorora uhungami waKarunga kovantu ava ava likida epuro, ntani ayo kunkondopeka epuro lyawo ngamoomu va yi tjanga asi: “Nye muhungami nga parukira mepuro.”
18 Yeeyi Karunga kuna kulikida ehandu lyendi kutundilira meguru kovadinikarunga navenye, nava ava rugana udona. Awo kukondera usili u dire kudivikwa.
19 Nayinye eyi va hepa kudiva kuhamena Karunga va yi va horwera, yeeyi Karunga mwene yige ga yi va horwera.
20 Yeeyi yikara yendi eyi ayi dili kumoneka, ngwendi nonkondo dendi ntani asi age yige Karunga, kuyimonenena moyininke eyi ga sita kutunda ketameko lyouzuni, ngayi va limbe kulipopera.
21 Nampili ngomu va divire Karunga, kapi va mu fumadekere ndi va mu pandure. Awo kwato nondunge ntani kapi ava kwata egano yininke.
22 Nampili ngomu ava litumbura asi vanongo, nye awo vagova.
23 Mevango lyokufumadeka Karunga ogu a dili kufa, awo kufumadeka mafano govantu ava ava fu nomafano goyidira noyikorama yomaguru gane neyi yokuwovana.
24 Morwa kuhara kusikisa mo madowo gomonomutjima dawo, Karunga yipo ga va sigilira va kwame madowo gomarutu gawo.
25 Awo kwa pirura usili waKarunga u kare yimpempa, yiyo ava karere yininke eyi ga sita mevango lyokumukarera age Musiti, ogu ga fira kumuhamberera narunye. Amen.
26 Eyi yiyo ga va sigilira Karunga va kwame madowo gawo goruhonda, yeeyi vakadi kwa siga ukaro wopasintu wokukara novagara,
27 novagara nawo kwa siga ukaro wopasintu wokukara novakadi yiyo ava lirugana vene navene yonomuga. Awo ngava gwana mfeto zawo koyirugana yawo yoyidona.
28 Moomu ava dili kugazara asi kudiva Karunga mulyo, naKarunga nage yiyo ga va sigilira momagazaro gawo gomadona, va rugane eyi ya dira kuwapera.
29 Awo kwa zura udinikarunga noudona nedowo noyirugana nayinye yoyidona nokunyenena nokudipaga nokurwana nokukumbagera nonyengo norugambo,
30 awo kuswaura, kwa nyenga Karunga, kutuka, kulinenepeka, kulikanganga, kuretesa po yoyidona, kapi ava limburukwa vakurona vawo,
31 kapi va paka nondunge, kapi ava sikisa mo matumbwidiro ntani kapi va paka eharo nonkenda.
32 Nampili ngomu va yi diva nawa-nawa asi Karunga kwa tanta asi navenye ava ava rugana yininke eyi va fira kufa, awo simpe kuyirugana ntani awo hena kukwatesa ko ava ava yi rugana.
