koVaroma 10:1-21
10 Vakwetu, eharo lyange lyokomutjima nelikwambero lyange kwaKarunga lyeeli asi ngava va parure.
2 Ame kuvhura ni yi gavere umbangi asi awo kwa kara nomupampi kwaKarunga, nye kapi va kwata egano mpango zendi.
3 Yeeyi awo kapi va diva eyi a tara Karunga asi ya hungama, awo kukwama nompango edi va tura po vene. Eyi yiyo ava dilire kulimburukwa nompango daKarunga dokuhamena uhungami.
4 Yeeyi Veta kwa ya haga po mwaKristusa, yipo asi nkenye ogu a likida epuro ngava mu hungameke.
5 Yeeyi Mosesa kwa tente asi: “Muntu ogu a rugana youhunga kuliza neyi azi tanta Veta, nga paruka.”
6 Nye Matjangwa gokupongoka nago hena kwa tanta asi epuro yilyo ali ninkisa muntu a hungame. Ago kwa tanta asi: “Wa ha uyunga momutjima goge asi ‘yilye ogu nga za meguru?’ kuninka asi a ka humburure Kristusa,
7 ndi asi ‘yilye ogu nga za mekero?’ kuninka asi a ka pindure Kristusa koufe.”
8 Nye alyo yisinke lya uyunga ko? Alyo kwa tanta asi: “Nonkango pepi nove da kara, ado kwa kara mokana koge ntani momutjima goge,” kutanta asi nonkango depuro edi tuna kuzuvhisa.
9 Yeeyi nsene o divisa nokana koge moyitarameho asi Jesus, Hompa, noku pura momutjima goge asi Karunga ga mu pindura koufe, nga va kuparura.
10 Yeeyi mokuninka asi muntu va mu hungameke, ga hepa kupura momutjima gwendi ano mokuninka asi va mu parure ga hepa kudivisa mbudi nokana kendi.
11 Yeeyi etjangwa kwa tanta asi: “Nkenye ogu a pura mwendi, kapi ngava mu fisa nomuga.”
12 Yeeyi pwato elisigo pokatji koMujuda noMugereka. Hompa gwawo gumwe tupu ogu ga kara nougavi wounene kwanavenye ava ava mu zigida.
13 Yeeyi “nkenye ogu a kugu edina Jehova ngava mu parura.”
14 Nye ngapi omu nava li kuga nsene asi kapi va pura mwendi? Ano ngapi omu nava pura mwendi nsene asi kapi va mu zuvha? Ano ngapi omu nava mu zuvha nsene asi kwato ogu ga va zuvhisira?
15 Ngapi omu nava zuvhisa nsene asi kwato ogu ga va tuma? Ngamoomu tupu va yi tjanga asi: “Ee, omu tupu da wapa nompadi dava ava zuvhisa mbudi zongwa kuhamena yininke yoyiwa!”
16 Nye navenye kapi va limburukwa kombudi zongwa. Eyi yiyo ga tente Jesaya asi: “Jehova, wolye ava va pura moyininke eyi va zuvha kwetu?”*
17 Muntu kupura tupu konyima zapa a zuvhu nonkango. Ano nonkango kudizuvha apa gumwe a zuvhisa kuhamena Kristusa.
18 Nye tani pura, ngoso kapi va yi zuvha? Yeeyi “mbudi zawo kwa lihanena uzuni mudima ntani nava va tunga komavango gokoure va zi zuvha.”
19 Tani pura hena, Israeli ngoso kapi ga yi kwata egano ndi? Mosesa kwa tente asi: “Ngani kuninka o zuvhire mfudu nomuhoko dapeke, ngani kuhandukisa kupitira momuhoko gougova.”
20 Nye Jesaya kwa uyungire nouradi asi: “Ame kwa gwene nge ava va dilire kupapara nge ntani kwa divikwire kwava va dilire kupulida nge.”
21 Nye age kwa uyungire kuhamena Vaisraeli asi: “Nkenye ezuva ame ngani gonwene mawoko gange vantu wokudira kulimburukwa ntani wonomutjima dokukukuta.”
Nonkango dokonhi
^ Ndi “mbudi zetu.”
