koVaroma 11:1-36
11 Tani pura, Karunga ga nyoka vantu vendi ndi? Hawe! Yeeyi name Muisraeli, gomoruvharo* rwaAbirahamu, gemezimo lyaMbenyameni.
2 Karunga kapi ga nyoka vantu vendi ava ga hovere kuhorowora. Kapi mwa diva eyi lya tanta etjangwa omu ga likwamberere Eliya kwaKarunga kuhamena Israeli ndi?
3 Eliya kwa tente asi: “Jehova, vana dipaga vaporofete woge noku zungurura yizambero yoge. Nyamelike nina hupu po ntani vana hara kudipaga nge.”
4 Nye yisinke ga mu limbwilire Karunga? “Nina kara simpe novantu 7 000 ava va dira kutongamena rumwe Bara.”
5 Mokulifana, poveli Vaisraeli ava va hupa po ava ga horowora Karunga monkenda zendi zonene.
6 Nsene age kwa va horowora morwa nkenda zendi zonene, eyi kutanta asi kapi ga va horowora morwa yirugana yawo. Nye ngano asi kwa va horowora morwa yirugana yawo, kapi hena ngano ya kara asi morwa nkenda zendi zonene.
7 Yisinke natu vhura kutanta? Sininke esi va paparere Vaisraeli kapisi navenye va si gwana nye ava ga horowora yiwo va si gwana. Wokuhupa ko kwa nyokere kupurakena,
8 moomu tupu va yi tjanga asi: “Karunga kwa va ninka va kare monompofu dononene yipo meho gawo ga dire kumona ano matwi gawo ga dire kuzuvha dogoro naina eli.”
9 Ntani hena, Ndafita kwa tanta asi: “Ninka yipito yawo yi kare ekwe ntani siraha yipo ngava gwe noku va tengeka.
10 Ninka meho gawo ga mone mundema yipo va dire kumona ntani va ninka va nyongame nomugongo dawo nkenye apa.”
11 Tani pura, awo ngoso kwa gwa makura nokuvhura si kupinduka hena ndi? Hawe! Nye kuzona kwawo kwa ninkisa nomuhoko dapeke di gwane eparu ano eyi kwa va ninkisa va fire nomuhoko odo mfudu.
12 Nsene asi kuzona kwawo kwa retera uzuni mauwa ano kusesupa kwawo kwa retera vantu wonomuhoko dapeke mauwa, ngapi nye apa sivaro sawo ngasi sika mo!
13 Ame kuna kuuyunga none vapuli vakwetu wokonomuhoko dapeke. Mokumona asi ame mupositoli ogu va tuma konomuhoko dapeke, ame kutara sirugana sange kwaKarunga asi mulyo unene.
14 Ame kuna hara ni ninkise womuhoko gwange va kare nomfudu koyininke eyi mwa gwana yipo vamwe ngava va parure.
15 Morwa kwa va zumba, ayo kwa ninkisa vamwe wokonomuhoko dapeke va likwatakane naKarunga. Nsene a va tambura, ayo ngayi fana ngwendi kuna kuvapindura koufe.
16 Nsene asi ruha romboroto oru vana kugava ngonzambo zoyiyimwa yokuhova kwa pongoka, mboroto nazinye za pongoka ano nsene asi nondandani da pongoka, nonomutayi nado da pongoka.
17 Karunga kwa teta ko nomutayi dimwe kositji souzwe noku mu gugikira ko one nampili ngomu mwa kara uzwe womowiza, ano none kuna kugwanena mo uwa monondandani daso.
18 Mwa ha gazara* asi one mulyo kupitakana nomutayi dapeke. Nsene mu gazara* asi one mulyo, diworokeni asi nondandani yido adi mu vatere nye kapisi nyone omu vatere nondandani.
19 Vamwe veni kuvhura mu tante asi: “Nomutayi kwa di teta ko yipo va gugike nge mo.”
20 Ayo usili! Morwa kudira kukara nepuro yiyo va va tetera ko nye ove kuna karere ko morwa kukara nepuro. Wa ha linenepeka nye kara noutjirwe.
21 Nsene asi Karunga ga teta ko nomutayi dene-dene, nove kuvhura a ku tete ko.
22 Karunga nkenda ntani kuhanduka. Age kuhandukira ava ava gu morwa kudira kukara nepuro. Nye age ta ku fire nkenda nsene o twikira kukara monkenda zendi. Nsene asi kapisi ngoso, nga ku teta ko kositji.
23 Ano Vajuda nsene va tameka hena kulikida epuro, ngava va gugikira ko hena, yeeyi Karunga kuvhura kuvagugikira ko hena.
24 Nsene asi one kwa mu teta kouzwe womowiza noku ya mu gugika kouzwe womosikunino nampili ngomu asi kapisi yimo ya fira kuyirugana, ngapi nye nomutayi dene-dene ngava dira kuditengwidira ko kouzwe oku va di teta!
25 Vakwetu, ame kuna hara mu dive sihoramo saKarunga yipo mu dire kulimona asi one nondunge. Vaisraeli vamwe kwa kukutika nomutjima dawo dogoro sivaro sovantu wokonomuhoko dapeke ngasi sike mo,
26 monkedi ezi yimo ngava va parura Vaisraeli navenye. Ngamoomu va yi tjanga asi: “Muzowoli nga tunda moSiyoni noku ninka womoruvharo rwaJakopo va sige udinikarunga wawo.
27 Aga yigo malizuvhasano ngani tura po nawo, apa ngani dongonona po nonzo dawo.”
28 Yosili, awo nonkore daKarunga morwa kwa nyoka mbudi zongwa ano one yiyo mwa gwanena mo uwa. Nye Karunga kwa va horowere ntani ga va hara morwa etumbwidiro eli ga tulire po nozinyakurwawo.
29 Karunga kapi nga livera kouhwi ou ga gava ntani kapi nga livera kuhamena ava ga zigida.
30 Moomu tupu none ngomu dili kulimburukwa Karunga nye ngesi va mu likida nkenda morwa kudira kulimburukwa kwawo,
31 nawo kudira kulimburukwa kwawo kwa ninkisa Karunga a mu likide nkenda. Nye nawo ngava va likida nkenda moomu va mu likida none nkenda.
32 Yeeyi vantu navenye kapi va limburukwire Karunga makura yiyo ga va sigilire moukaro owo yipo a likide nkenda kovantu navenye.
33 Ee, omu tupu Karunga ga kara nougawo nounongo nediwo lyenzi! Yilye gokuvhura kudiva nawa-nawa matokoro gendi? Yilye gokuvhura kudiva nawa-nawa yirugana yendi?
34 “Yilye ogu ga diva magazaro gaJehova ndi a mu pe ko magano?”
35 Ndi “yilye ogu ga mu pa rumwe yuma yipo asi konyima nga yi mu tengwidire?”
36 Yeeyi yininke nayinye kwa tunda kwendi ntani kwa karera po mwarwendi ntani nositambo sendi. Age ga fira kumuyererepeka narunye. Amen.
