koVaroma 13:1-14
13 Nkenye muntu a limburukwe kepangero eli ali mu pangere, yeeyi kwato epangero eli lya kara po ga hana kulipulisira Karunga. Mapangero aga ga kara po, Karunga ga ga tura po.
2 Yipo nye, nkenye ogu a rwanesa epangero, kurwanesa ewapaiko lyaKarunga. Ava ava rwanesa epangero ngava va pangura.
3 Ava ava rugana uwa kapi va hepa kutjira epangero ntudi vaava tupu ava rugana udona. Nsene kapi ono hara kutjira epangero, twikira kurugana uwa makura alyo ngali kupandure.
4 Alyo kwa karera po Karunga yipo mu gwanene mo uwa. Nye nsene ove kurugana udona, tjira, yeeyi kapi lya dwarera rufuro mawoko-woko. Alyo kwa karera po Karunga mokutengeka ava ava rugana udona.
5 Eyi yiyo nye nomu limburukwira, kapisi morwa kutjira tupu etengeko nye morwa ezwi lyeni lyokomutjima.
6 Eyi yiyo nye omu futire mutero, morwa awo kwa karera po Karunga mokuruganena vantu yipo va sikise mo sitambo esi.
7 Gaveni kwankenye ogu eyi ya mu fira, mutero kwava womutero, ano mfuto zepangero kepangero, ano ava va fira kuvatjira va tjireni, ano ava va fira kuvafumadeka va fumadekeni.
8 Mwa ha kara nomakongo kwankenye ogu ga hana asi gokulihara-hara, yeeyi nkenye ogu ga hara mukwawo, kusikisa mo veta.
9 Yeeyi yipango yomoVeta eyi asi: “Walye o hondere, walye o dipaga, walye o vaka, walye o dovaukire,” ntani noyipango yimwe hena kwa yi kwatakana mosipango esi asi: “Hara mukweni moomu wa lihara nyamoge.”
10 Muntu ogu ga hara mukwawo kapi a mu ruganene udona, yipo nye, eharo kusikisa mo veta.
11 Ruganeni eyi morwa mwa diva asi siruwo sina siki mu pinduke mo monompofu deni, yeeyi ezoworo lyetu pepi lina kara kupitakana apa twa tamekere kukara vapuli.
12 Masiku pepi nokupita gana karere, ezuva ntaantani li se. Tu zumbeni nye yirugana yomomundema tu dware yirwiso yomouzera.
13 Tu kareni nonkareso zongwa moomu ava kara vantu nonkareso zongwa mutenya. Twa ha lizumbilira moyipito yoyidona nounkorwe noruhonda nonkareso zokunyata* nokurwanangana ntani nomfudu.
14 Nye kwameni sihonena saHompa Jesus Kristusa ntani kapisi mu gazadare omu nomu hafesa madowo geni gopanyama.
