koVaroma 14:1-23
14 Tambureni muntu ogu ga kara nepuro lyesesu ntani mwa ha pangura ava va kara nomagano gokulisiga naga geni.*
2 Ogu ga kara nepuro lyokupama, kulya nayinye nye ogu ga kara nepuro lyesesu, kulya tupu yikwahidi.
3 Ogu a li nayinye kapisi a sense ogu a dili kulya nayinye ano ogu a dili kulya nayinye, nage kapisi a pangure ogu a li nayinye yeeyi Karunga ga mu tambura.
4 Nyove yilye nye asi o pangure mukareli gwamukweni? Age kapisi mukareli goge nye Karunga yige hekurwendi. Age yige ga kara nononkondo dokutokora nsene asi eyi a rugana uhunga ndi epuko. Mevatero lyaJehova, kuvhura yi mu tompoke.
5 Gumwe kutara ezuva limwe asi lya pitakana ekwawo ano gumwe kutara ezuva limwe asi lya lifana nomazuva gapeke. Nkenye ogu a pure nawa-nawa asi eyi ga pura uhunga.
6 Ogu a tara ezuva limwe asi mulyo kupitakana ekwawo, kuyiruganena mokufumadeka Jehova. Ntani hena ogu a li nayinye, kuyilya mokufumadeka Jehova, yeeyi age kupandura Karunga. Ano ogu a dili kulya nayinye, nage kufumadeka Jehova ntani age kupandura Karunga.
7 Kwato ogu a parukire mwamwene tupu ntani kwato ogu a fire mwamwene tupu.
8 Yeeyi nsene kuna kuparuka kuna kuparukira Jehova ano nsene tu fa, tatu fire Jehova. Yipo nye, tu fe ndi tu paruke, ose kwa hamena kwaJehova.
9 Eyi yiyo ga fira Kristusa noku pinduka koufe yipo a kare Hompa gwanavenye, vafe novanamwenyo.
10 Morwasinke nye no pangwira mukweni? Ndi morwasinke no sensera mukweni? Yeeyi natuvenye ngatu ka sikama komeho zosipundi sompanguro saKarunga.
11 Yeeyi kwa tjanga asi: “‘Tani ligana asi’ ‘nkenye ogu nga twira nge nongoro ntani nga yi divisa asi nyame Karunga,’” yimo ana kutanta Jehova.
12 Nkenye gumwe nga ka zeresa yirugana yendi kwaKarunga.
13 Yipo nye, twa ha lipangura-pangureni hena, nye tu tokomeneni mokudira kutura sipundukiso ndi silimbikiso kovakwetu.
14 Ame na yi diva nawa-nawa mwaHompa Jesus asi kwato sininke sa nyata mwasene, muntu mwene yige a si tara asi sa nyata, kwendi yiko sa nyata.
15 Nsene mukweni a punduka morwa nondya edi o li, ngoso kapi hena ono kulikida eharo. Wa ha zonagwisa epuro lyendi morwa nondya doge, yeeyi Kristusa kwa mu fira.
16 Yipo nye, wa ha ninka yirugana yoge yoyiwa va yi uyunge momudona.
17 Yeeyi mokukahwilira moUhompa waKarunga kapi ya korera konondya edi a li muntu ndi koyikunwa eyi a nu. Nye ga hepa kuhungama noku kara nombili ntani noruhafo mevatero lyompepo zokupongoka.
18 Yeeyi ogu a ruganene Kristusa monkedi ezi, Karunga kumutambura ntani vantu nawo kumuhafera.
19 Yipo nye, tu kondjereni mbili ntani nokulinkondopeka-nkondopeka.
20 Hagekeni kuzonagura sirugana saKarunga morwa nondya. Yininke nayinye kwa zera nye ayo epuko kulya nondya nsene asi ado kuvhura di pundukise* mukweni.
21 Hansa kudira kulya nyama ndi kunwa vhinyu ndi kurugana nkenye eyi nayi pundukisa mukweni.
22 Eyi wa pura kuhamena yininke oyo, yi kare tupu pokatji koge naKarunga. Muntu goruhafo, googu a dili kulipangura nyamwendi kweyi ga pura asi uhunga.
23 Nye nsene a singanyeka nye a lye, ta kara nounzoni morwa kapi ana kuyilya mepuro. Nkenye eyi atu rugana ya hana asi mepuro, nzo.
