koVaroma 15:1-33
15 Ose ava tuna koro twa hepa kugazadara ko upirankondo wava va dira kukora, kapisi tu gazadare tupu uwa wanyamwetu.
2 Nkenye gumwe gwetu a kondjere uwa wamukwawo, yipo a mu nkondopeke.
3 Yeeyi nampili Kristusa kapi nga kondjere uwa wanyamwendi nye ngamoomu tupu va yi tjanga asi: “Maswauro aga vana kumuswaura kuna kuwiza kwange.”
4 Yininke nayinye eyi va tjenge nare, kwa yi tjangera yipo yi tu ronge ntani ose twa kara nehuguvaro morwa Matjangwa kutunkondopeka noku tu vatera tu lididimike.
5 Karunga ogu a tu hengagwida noku tu vatera tu lididimike, ngano a mu pe magazaro ngwendi gaaga ga kere nago Jesus Kristusa,
6 yipo namuvenye mu hamberere Karunga mouumwe, GuhyaHompa gwetu, Jesus Kristusa.
7 Yipo nye, litambura-tambureni moomu ga mu tambura Kristusa yipo mu yererepekere po Karunga.
8 Nina hara mu dive asi Kristusa kwa ya kere mukareli kovantu ava va rugana yovamba, yipo a ya likide asi eyi a uyunga Karunga usili ntani asi matumbwidiro gendi kozinyakurwawo ngaga sika mo.
9 Eyi kwa yi ruganenene hena yipo nomuhoko di hamberere Karunga morwa nkenda zendi. Ngamoomu va yi tjanga asi: “Eyi yiyo ngani kudivisira mokatji konomuhoko oku tani dimbi ni hamberere edina lyoge.”
10 Karunga kwa tente hena asi: “One nomuhoko, hafeni kumwe novantu vendi.”
11 Ntani hena asi: “One nomuhoko nadinye, hamberereni Jehova ntani ninkeni vantu navenye va mu hamberere.”
12 Jesaya kwa tente hena asi: “Ngapa kara ndandani zalsayi, ezi ngazi wiza zi ya pangere nomuhoko ano nomuhoko ngadi huguvara mwendi.”
13 Karunga ogu a gava ehuguvaro ngano a mu zwide ruhafo nombili morwa mwa mu huguvara yipo ehuguvaro lyeni li nkondopare kupitira mononkondo dompepo zokupongoka.
14 Vakwetu, ame na yi pura nawa-nawa asi yirugana yinzi yoyiwa eyi mwa rugana ntani mwa kara nediwo ntani one kuvhura kulironga-ronga.
15 Nye ame kwa mu tjangerere kuvyukilira kuhamena yininke yimwe, yipo ni mu diworokese kuhamena yininke eyi morwa nkenda zonene ezi ga likida nge Karunga,
16 mokuninka nge ni kare mukareli gwaJesus Kristusa konomuhoko. Ame kurugana unene mosirugana sokupongoka sombudi zongwa zaKarunga, yipo Karunga a tambure nomuhoko ngonzambo ezi va pongora nompepo zokupongoka.
17 Ame nina hafa kweyi na kara murongwa gwaJesus Kristusa noku rugana sirugana saKarunga.
18 Ame kapi nani uyunga hena kuhamena eyi na rugana nye yeeyi tupu ga rugana Kristusa ntani neyi ga uyunga kupitira mwange mokuvatera vantu wonomuhoko dapeke va limburukwe kwendi.
19 Awo kwa limburukwa morwa yitetu noyidiviso eyi na rugana kupitira mompepo zokupongoka zaKarunga. Monkedi ezi, ame kwa zuvhisire nakunye mbudi zongwa zokuhamena Kristusa kutundilira moJerusarema dogoro koIlilikumu.
20 Ame kwa tokomenene mokudira kukazuvhisira mbudi zongwa oku va divisire nare Kristusa yipo ni dire kutungira petateko eli ga tunga nare muntu gwapeke.
21 Nye ngamoomu tupu va yi tjanga asi: “Ava va dira kugwana mbudi zokumuhamena, ngava mu mona ano ava va dira kumuzuvha, ngava yi kwata egano.”
22 Eyi yiyo ngayi limbike nge yikando yoyinzi kuwiza kweni.
23 Nye ngesi ame na mana kuzuvhisira monomukunda edi, yeeyi nomvhura dononzi* ame kwa here kuwiza kweni.
24 Yipo nye, apa ngani za koSipaniya, nina hara ngani ya mu mone ntani ngomu ya sindikire nge ko konyima zokuyakara none karuwogona.
25 Nye ngesi ntaantani ni ze koJerusarema ni ka vatere vapongoki.
26 Vapuli vakwetu womoMakedoniya nava womoAkaya kuna gava yigava noruhafo yipo yi ka vatere vapongoki vamwe ava vana kara moruhepo moJerusarema.
27 Vapuli vakwetu kwa hefe mokugava yigava eyi morwa kwa lizuvhire asi va hepa kutengwida kuwoko. Vapuli vakwetu womoJerusarema kwa va tanterere ko yininke yopampepo. Yipo va lizuvhire asi nawo va hepa kutengwida kuwoko pokuvatera vapuli vakwawo womoJerusarema noyihepwa yopanyama.
28 Apa ngani ka sikisa yigava* eyi, ngani ya mu pita apa ngani za koSipaniya.
29 Na yi diva asi apa ngani wiza kweni, ngani mu retera mauwa gomanzi gaKristusa.
30 Vakwetu, tani mu korangeda mwaHompa gwetu Jesus Kristusa nemeharo lyompepo zokupongoka asi mu kanderere nge po kwaKarunga
31 yipo a popere nge kovantu womoJudeya ava va dira kupura mwaJesus ntani yipo ni ka sikise nawa yigava kovapongoki womoJerusarema.
32 Ano nsene Karunga ana yi panga, ngani ka wiza kweni noruhafo rorunene yipo tu ya likorangede-korangede.
33 Karunga ogu a gava mbili ngano a kare none namuvenye. Amen.
