koVaroma 16:1-27
16 Tani mu korangeda mu tambure Foibe mukareli mukwetu, ogu a vatere mombungakriste zaKenkereya.
2 Mu tambureni mwaHompa monkedi omu ya fira kutambura vapongoki ntani mu peni nkenye evatero eli na hepa, yeeyi age kwa popera wovanzi kukwatera mo name.
3 Kundeni po Pilisikira naAkura, varugani vakwetu mwaJesus Kristusa,
4 ava va lizamberere eparu lyawo mokupopera nge.* Name nava womonombungakriste dokonomuhoko dapeke tatu va pandura.
5 Ntani kundeni po hena mbungakriste ezi azi pongere membo lyawo. Kundeni po mukwetu gokuhara, Epainetusi, gumwe gwava va hovere kukara varongwa vaKristusa moAsiya.
6 Kundisireni po Mariya, ogu ga mu ruganena unene.
7 Kundisireni po ekoro lyange, Andoronikusa naJuniasa ava twa kere nawo modorongo, vagara ava va divikwa kovapositoli ntani ava va kara varongwa vaKristusa siruwo sosire kupitakana nge.
8 Kundisireni po Ampiliyatusi, mukwetu gokuhara mwaHompa.
9 Kundisireni po Urubanusi, murugani mukwetu mwaKristusa ntani mukwetu gokuhara, Sitakusi.
10 Kundisireni po Aperesi, mukareli gwaKristusa gokulimburukwa. Kundisireni po vemembo lyaAlisitoburusi.
11 Kundisireni po ekoro lyange Herodiyoni. Kundisireni po vemembo lyaNarekisusi, varongwa vaHompa.
12 Kundisireni po Tilifaina naTilifosa, vakadi ava ava rugana unene mwaHompa. Kundisireni po Peresisi, mukwetu gokuhara, yeeyi age kwa rugana unene mwaHompa.
13 Kundisireni po Rufusi, ogu va horowora mwaHompa nozina ava va kara ngwendi onane kwange.
14 Kundisireni po Asinkeretusi naFeregoni naHeremesi naPatorobasi naHerumasi ntani novapuli vakwetu ava va kara nawo.
15 Kundisireni po Firorogusi naJuliya naNereusi namumbyendi* gomukadona naOlimpasi ntani vapongoki ava va kara nawo.
16 Likunda-kundisireni po nencumito lyokupongoka. Nombungakriste nadinye daKristusa dina mu kundisire po.
17 Vakwetu, tani mu korangeda mu vangarere kwava ava retesa po maligaunuko ntani nokupundukisa wopeke pokuronga yininke eyi ya lilimba neyi mwa lironga. Li kareni ure nawo.
18 Yeeyi vagara vangoso kapisi vapika vaHompa Kristusa, nye vapika womadowo* gawo. Awo kupukisa vantu pokuuyunga nonkango donongwa dokugombeka.
19 Ulimburukwi weni una divikwa kwanavenye, ano oyo yina hafesa nge. Nye nina hara mu kare nonondunge yipo mu rugane yoyiwa ntani mu kare mwa hana usima oku tomu nyokere po yoyidona.
20 Karunga ogu a gava mbili, ntaantani nga myone Satana konhi zonompadi deni. Nkenda zonene zaHompa gwetu Jesus, ngano zi kare none.
21 Timoteusa murugani mukwetu, ana mu kundisire po ntani naRusiusi naJasoni naSosipateli, Vajuda vakwetu, nawo vana mu kundisire po.
22 Ame Teretiusa, ogu va ninka a tjange mbilive ezi, nina mu kundisire po mwaHompa.
23 Gaiyusi, ogu ga tambura nge membo lyendi ntani nombungakriste ezi azi pongere mo, vana mu kundisire po. Erasitusa, mugendesi* goyimaliwa yomositata, ana mu kundisire po ntani mumbyendi Kwarutusi, nage ana mu kundisire po.
24 *——
25 Karunga kuvhura a mu nkondopeke kupitira mombudi zongwa ezi ani zuvhisa ntani nombudi zokuhamena Jesus Kristusa. Mbudi ezi kwa zi horwere kupitira mosihoramo saKarunga esi sa horamene nomvhura dononzi.
26 Nye ngesi sihoramo oso va si horora. Ntani kupitira moMatjangwa gouporofete, nomuhoko nadinye da ya diva sihoramo esi. Eyi ya liza nompango zaKarunga ogu ga kara po narunye. Age kwa hara asi nomuhoko nadinye di pure mwendi oku tadi limburukwa kwendi.
27 Karunga munandunge gelike thi, va mu hamberere narunye kupitira mwaJesus Kristusa. Amen.
Nonkango dokonhi
^ Ndi “mwenyo gwange.”
^ MoRugereka kapi va vyukilira kutumbura nsene asi age mumbyamuntu ndi mukurwamuntu.
^ Ndi “womazimo.”
^ Ndi “erenga.”
^ Tara mwaMateusa 17:21, ftn.
