koVaroma 4:1-25
4 Mokumona asi yimo ya kara ngoso, yisinke natu uyunga kuhamena zinyakurwetu Abirahamu?
2 Pasihonena, nsene asi Abirahamu kwa mu hungamekesere koyirugana, ngano ga kere nokonda zokulikanganga, nye kapisi kwaKarunga.
3 Yisinke ali uyunga etjangwa? Alyo kwa uyunga asi: “Abirahamu kwa pulire mwaJehova makura tava mu varwire kouhungami.”
4 Muntu ogu a rugana kugwana mfeto, morwa kuna zi ruganene nye kapisi morwa muhona gwendi nkenda.
5 Nye muntu ogu a dili kurugana nye a pure mogu a hungameke munanzo, age ngava mu varwira kouhungami morwa epuro lyendi.
6 Ngwendi moomu Ndafita ga uyungire kuhamena ruhafo rogu a hungameke Karunga nye kapisi asi morwa yirugana yendi asi:
7 “Vantu woruhafo vaava va gusira po yirugana yawo yoyidona ntani vaava va dongwenena po nonzo dawo,
8 muntu goruhafo googu Jehova a dili kuvarwira nonzo dendi.”
9 Eyi kutanta nye asi vaava tupu va rugana yovamba yiwo velike ava gwana ruhafo oru ndi navaava va dira kurugana yovamba? Moomu kani yi tanta asi: “Abirahamu kwa kere nepuro makura tava mu varwire kouhungami.”
10 Siruwoke ga mu varwilire Karunga kouhungami? Age vana mu rugana yovamba ndi age simpe kapi vana mu rugana yovamba? Age opo simpe kapi vana mu rugana yovamba.
11 Karunga kwa mu tanterere asi va mu rugane yovamba. Esi kwa kere sinongweneso sokulikida asi age muhungami, morwa epuro eli ga kere nalyo age simpe kapi vana mu rugana yovamba. Age kwa ya kere guhya gwanavenye ava va ya kere nepuro awo simpe kapi vana va rugana yovamba. Ano Karunga kwa va varwilire kouhungami,
12 yipo a kare guhya gwava va rugana yovamba nye kapisi vaava tupu va rugana yovamba nye hena nava va kara nepuro ngwendi eli ga kere nalyo zinyakurwetu Abirahamu age simpe kapi vana mu rugana yovamba.
13 Yeeyi Abirahamu noruvharo* rwendi kwa gwene etumbwidiro lyokupinga uzuni morwa kulikida epuro, nye kapisi morwa kusikisa mo Veta.
14 Nsene asi etumbwidiro eli kwa tamba tupu kwava ava sikisa mo Veta, epuro tali kara lya hana sikwafo ntani etumbwidiro kapi nali kara nomulyo.
15 Kuteza po Veta kutwaredesa kokukutengeka* nye nsene pwato Veta, kwato yokuteza po.
16 Abirahamu kwa mu tumbwidilire morwa ga kere nepuro, monkedi ezi yimo hena Karunga ga likidire nkenda zendi zonene. Eyi kwa nkondopekere asi ruvharo* rwendi narunye ngaru gwana etumbwidiro eli nye kapisi vaava tupu ava sikisa mo Veta nye hena nava va kara nepuro ngwendi lyeeli ga kere nalyo Abirahamu. Age guhya gwanatuvenye.
17 (Ngamoomu tupu va yi tjanga asi: “Ame kwa kuhorowora o kare guhya gonomuhoko dononzi.”) Age kwa likidire epuro mwaKarunga ogu a ninki vafe va kare vazuni noku tumbura yininke eyi ya dira kusika mo ngwendi ya sika mo nare.
18 Age kwa yi pulire asi nga kara guhya gonomuhoko dononzi nampili ngomu ya monekere asi kapi tayi siki mo. Age ga pulire eyi va mu tanterere asi: “Ano ruvharo* roge yipo ngaru hura.”
19 Nampili ngomu lya dilire kusesupa epuro lyendi, age kwa tere rutu rwendi asi rwa kurupa ntani kapi ta vhuru kukara novana (mokumona asi nomvhura dendi kwa kere koyiha 100) ntani ga yi divire asi Sara nganze.
20 Nye morwa Karunga ga mu tumbwidilire, age kapi ga singanyekere, nye kwa nkondoparere mepuro noku yererepeka Karunga
21 ntani ga pulire asi eyi ga mu tumbwidilire Karunga, nga yi sikisa mo.
22 Eyi yiyo “ga mu varwilire kouhungami.”
23 Nye nonkango edi “kwa mu varwilire” kapi tupu da tamba kwendi kwelike,
24 nye hena noku kwetu ava ngava varwira kouhungami, morwa kupura mogu ga pindura Jesus Hompa gwetu koufe.
25 Age kwa mu geve morwa nonzo detu ntani kwa mu pindura koufe yipo a tu varwire kouhungami.
Nonkango dokonhi
^ MoRugereka asi “mbuto.”
^ MoRugereka asi “ehandu.”
^ MoRugereka asi “mbuto.”
^ MoRugereka asi “mbuto.”
