koVaroma 5:1-21
5 Mokumona asi kwa tu varwira kouhungami morwa epuro, tu kareni nombili* naKarunga kupitira mwaHompa gwetu Jesus Kristusa,
2 omu twa gwanena nkenda zaKarunga zonene morwa epuro. Tu hafeni morwa twa kara nehuguvaro lyokukagwana uyerere waKarunga.
3 Kapisi yooyo yelike nye tu hafeni hena pokukara momaudigu morwa twa yi diva asi udigu kureta edidimiko,
4 ano edidimiko kutuvatera yipo Karunga a tu hafere ano eyi kutupa ehuguvaro,
5 ano ehuguvaro eli kapi ali tu fisa nomuga, yeeyi Karunga kuruganesa mpepo zendi zokupongoka ezi a tu pe mokutulikida asi ga tu hara.
6 Yeeyi apa twa kere ose simpe kwato nonkondo, Kristusa kwa fililire vadinikarunga posiruwo esi ga penge Karunga.
7 Kapisi ureru komuntu a fire muhungami nye nsene asi muntu gomuwa kuvhura kumufira.
8 Nye Karunga kwa tu likida eharo morwa apa twa kere simpe vananzo, Kristusa yipo ga tu fililire.
9 Mokumona asi ose kwa tu hungameka kupitira mohonde zendi, twa yi pura nawa-nawa asi ngatu zowoka kehandu lyaKarunga.
10 Nsene asi apa twa kere nonkore daKarunga, Karunga kwa tulisire po mbili nose kupitira monomfa daMunendi, ngapi nye omu nga dira kutuparura kupitira mwendi, mokumona asi ga tulisa po mbili nose?
11 Kapisi yooyo yelike, nye ose hena kuhafa kweyi ga rugana Karunga mokutuninka tu kare nombili nendi kupitira mwaHompa gwetu Jesus Kristusa.
12 Yeeyi nzo kwa wiza mouzuni kupitira momuntu gumwe ano nzo kwa reta nomfa makura nomfa yiyo da lihanena movantu navenye morwa vantu navenye kwa zona.
13 Yeeyi nzo yizo za hovere kukara po komeho zi wize Veta, nye kwato ogu ava pangura nsene asi pwato veta.
14 Nampili ngoso, nomfa kwa pangerere ngwendi hompa, kutundilira kwaAdamu dogoro kwaMosesa, nampili kwava va dilire kuzona monkedi ezi ga zonene Adamu ogu ga fanekesa ogu nga wiza.
15 Nye uhwi waKarunga wa lisiga nonzo zaAdamu. Nzo zomuntu gumwe kwa ninkisa vantu wovanzi va fe nye nkenda zaKarunga zonene mwaJesus Kristusa, ngazi reta mauwa gomanzi kovantu wovanzi!
16 Ntani hena, uhwi kapi wa lifana nonzo ezi ga tulire muntu gumwe. Nzo kwa ninkisa vantu navenye va kare vananzo, nye uhwi ou wa wiza po morwa nonzo dononzi, kwa ninkisa vantu wovanzi va va hungameke.
17 Nye kupitira monzo zomuntu gumwe, nomfa kupangera ngwendi hompa. Nye nkenda zaKarunga zonene nouhwi wendi kwetu, wa pitakana nayinye. Ava ava gwana eyi, ngava ka pangera morwa Jesus Kristusa!
18 Moomu tupu kuzona komuntu gumwe kwa ninkisa vantu navenye va va pangure, noyirugana youhunga yomuntu gumwe yimo ya ninkisa vantu va va hungameke va ka gwane eparu.
19 Moomu tupu kudira kulimburukwa komuntu gumwe kwa ninkisa vantu wovanzi va kare vananzo, nokulimburukwa komuntu gumwe nako ngaku ninkisa vantu wovanzi va kare vahungami.
20 Veta kwa wiza po mokulikida vantu asi awo vananzo. Nye apa apa kara nonzo dononzi, Karunga nage yipo a likida nkenda zendi zonene.
21 Nositambo musinke? Yipo asi ngamoomu tupu nzo za pangerere ngwendi hompa kumwe nonomfa, ufekenda waKarunga wounene nawo u pangere ngwendi hompa kupitira mouhungami u twaredese vantu komwenyo gwanarunye kupitira mwaJesus Kristusa Hompa gwetu.
Nonkango dokonhi
^ Ndi nampo asi “ose twa kara nombili.”
