koVaroma 7:1-25
7 Vakwetu, kapi mwa yi diva asi Veta kupangera muntu apa a kara nomwenyo ndi? (Ame kuna kuuyungisa vantu ava va diva veta)
2 Pasihonena, mukadi kukara moveta zamugara gwendi age mugara gwendi simpe nomwenyo, nye nsene ana fu, ta manguruka mo moveta zamugara gwendi.
3 Yipo nye, nsene asi mugara gwendi muzuni nye a kware mugara gwapeke, age ngoso kuna kuhondera. Nye nsene mugara gwendi a fa, age ana manguruka mo nye moveta zendi, kapi ana kuhondera nsene a kwara mugara gwapeke.
4 Yipo nye vakwetu, none kwa kere moVeta. Nye kupitira monzambo zaKristusa, kapi hena muna kara moVeta nye one kuna hamene kwendi, ogu va vhumbura, yipo tu yime yiyimwa eyi ayi yererepeke Karunga.
5 Yeeyi apa ngatu kwama madowo gorutu,* Veta kwa horwere asi madowo gorutu kutuninkisa tu ture nzo ano nzo kututwaredesa konomfa.
6 Nye ngesi twa manguruka ko koVeta morwa kapi zina kutupangera hena. Ose ngesi vapika vaKarunga monkedi zompe, pampepo, nye kapisi ngwendi pwanare, mokukwama Veta.
7 Eyi kutanta nye asi Veta nzo ndi? Hawe! Pwa hana Veta, ngano kapi na diva asi yisinke nzo. Pasihonena, ngano Veta kapi za tanta asi: “Walye o dovaukire,” ngano kapi na diva asi yisinke kudovaukira.
8 Nye nzo kwa gwana mpito zokupindura madowo gokulisiga-siga mwange, ngano pwato veta, nzo ngano kapi za kara po.
9 Ame kwa kere nomwenyo apa za dilire kukara po veta. Nye apa za wiza, nzo yipo za kara po, makura ame yiyo na fa.
10 Yipango eyi ngano ya pa nge mwenyo, kwa retera nge nomfa.
11 Yipango kwa pa mpito nzo zi pukise nge nokudipaga nge.
12 Veta mwazene ko kwa pongoka ano sipango naso kwa pongoka ntani kwa hungama ntani siwa.
13 Yoyiwa yiyo ya reta nomfa dange ndi? Hawe! Nye nzo yizo za reta nomfa dange. Kupitira mweyi yoyiwa, nzo kwa retera nge nomfa yipo yi horore asi yisinke nzo. Veta kwa horora asi nzo kwa retera vantu udona.
14 Twa yi diva asi Veta kwa tunda kwaKarunga nye ame muntu tupu gopanyama, ogu va randesa konzo.
15 Ame kapi ani kwata egano eyi ani rugana. Yeeyi mevango lyokurugana eyi na hara, ame kurugana eyi na nyenga.
16 Na yi kwatesa ko asi Veta ngwa nye ame simpe kurugana eyi na dira kuhara.
17 Nye ngesi kapisi nyame nawa-nawa ani rugana yininke eyi, nye nzo ezi za kara mwange.
18 Yeeyi na diva asi mwange, morutu rwange, mwato uwa, yeeyi ame kwa kara neharo lyokurugana yoyiwa nye kapi ani vhuru kuyisikisa mo.
19 Yeeyi kapi ani vhuru kurugana uwa ou na hara nye ame kurugana udona ou na nyenga.
20 Nsene asi ame kurugana eyi na dira kuhara, kapisi nyame hena nina kuyirugana nye nzo ezi za kara mwange.
21 Pwa kara veta ezi azi pangere nge, apa ani hara kurugana yoyiwa, udona nawo kukara pwange.
22 Momutjima gwange, ame kwa hara veta zaKarunga,
23 nye na dimburura asi morutu* rwange mwa kara hena veta zapeke ezi azi rwanesa veta zomomagazaro gange. Veta ozo kuna kara nzo ezi za kara morutu* rwange, azo kupangera nge.
24 Ame munaruhepo! Yilye ogu nga parura nge mo morutu oru rokutwaredesa nge konomfa?
25 Tani pandura Karunga kweyi ga parura nge kupitira mwaJesus Kristusa, Hompa gwetu! Momagazaro gange, ame mupika koveta zaKarunga nye morutu rwange, ame mupika koveta zonzo.
Nonkango dokonhi
^ MoRugereka asi “maruha gorutu.”
^ MoRugereka asi “maruha gorutu.”
^ MoRugereka asi “maruha gorutu.”
