koVaroma 8:1-39
8 Yipo nye, ava va kara mouumwe naJesus Kristusa kapi ngava va pangura.
2 Yeeyi veta zompepo ezi azi gava mwenyo kupitira mwaJesus Kristusa, za va mangurura ko koveta zonzo nonomfa.
3 Morwa kudira kusikilira mo, vantu kapi va vhulire kusikisa mo nawa-nawa Veta yipo zi va zowore. Karunga yipo ga rugene eyi za dilire kusikisa mo Veta, age kwa tumine Munendi a ya kare norutu rokufana ngwendi rovantu wokudira kusikilira mo yipo a ya guse po nzo. Monkedi ezi, Karunga kwa pangura nzo,
4 yipo tu rugane youhunga eyi za tanta Veta pokudira kupulisira madowo gorutu ga tu pangere nye zi tu pangere mpepo zaKarunga.
5 Yeeyi ava ava kwama madowo gorutu, nkenye apa awo kudemenena kweyi yopanyama, nye ava ava kwama yompepo, nkenye apa awo kudemenena eyi ya liza nompepo zaKarunga.
6 Yeeyi kudemenena nkenye apa kweyi yopanyama kutwaredesa konomfa, nye kudemenena nkenye apa kweyi yompepo kutwaredesa komwenyo nombili.
7 Ntani hena, kudemenena kweyi yopanyama kutuninkisa tu kare unkore naKarunga, yeeyi kapi ayi tu ninkisa ndi asi ngayi tu ninkise tu limburukwe veta zaKarunga.
8 Ava ava kwama madowo gorutu nokuvhura si kuhafesa Karunga.
9 Nye one kapi omu kwama madowo gorutu. Nsene asi mpepo zaKarunga kwa kara mweni, one kukwama yompepo. Nye ogu ga dira kukara nomagazaro gaKristusa, kapi ga hamena kwaKristusa.
10 Nye nsene asi one kwa kara mouumwe naKristusa, nampili marutu geni ga fe morwa nzo, mpepo ngazi mu pa mwenyo morwa uhungami.
11 Nsene asi mpepo zogu ga pindura Jesus koufe kwa kara mweni, ogu ga pindura Jesus Kristusa, nga ninka hena marutu geni gokufa ga kare nomwenyo kupitira mompepo zendi ezi za kara mweni.
12 Yipo nye vakwetu, twa ha pulisira marutu getu ga tu pangere tu rugane eyi ga hara,
13 nsene mu kwama madowo gorutu, ngomu fa nye nsene mu dipagesa madowo gorutu kompepo, ngomu paruka.
14 Yeeyi navenye ava azi pitisire mpepo zaKarunga, vana vaKarunga.
15 Yeeyi mpepo zaKarunga kapi azi tu ninkisa tu kare vapika ntani tu kare hena nowoma nye kupitira mompepo, ose kwa ya kara vana vaKarunga ano mpepo ozo kututumangeda tu zigire asi: “Aba,* Tate!”
16 Mpepo zaKarunga kutuhorwera asi ose sili vana vaKarunga.
17 Nsene asi ose vana vaKarunga, nose ngatu ka pinga upingwa ou nga gava Karunga. Ngatu ka pinga upingwa owo kumwe naKristusa. Nsene tu hepa nage, ngava ka tu yererepeka kumwe nage.
18 Yeeyi mahepeko aga tuna kuligwanekera nago ngesi nayimwe si pokugahetakanesa kumwe nomfeto ezi nga ka horora Karunga.
19 Unsitwe kuna kundindira nononkondo Karunga mokuhorora vana vendi.
20 Yeeyi unsitwe kwa u geve mezonauko, kapisi meharo lyawene nye meharo lyogu ga u geve, nampili ngoso, pwa kara ehuguvaro
21 asi unsitwe ngau manguruka mezonauko u ka gwane umanguruki wounene wokukara vana vaKarunga.
22 Twa yi diva asi unsitwe naunye kutuga nokuzuvha kukora dogoro ngesi.
23 Nose ava twa gwana ruha rokuhova romfeto kutanta asi mpepo zokupongoka, kutuga ngomu tuna kundindira Karunga a tu ninke tu kare vana vendi. Age ngayi rugana eyi morwa Kristusa ga gava mfeto a tu mangurure mo momarutu getu gopanyama.
24 Yeeyi ose kwa tu parwira mehuguvaro eli, nye nsene o mona yininke eyi wa huguvara, kapi tapa kara hena ehuguvaro. Ngapi omu muntu na kara nehuguvaro nsene kuna kumona eyi ga ndindira?
25 Nye nsene tu kara nehuguvaro koyininke eyi ya dira kusika mo, ose ngatu yi ndindira nedidimiko.
26 Mokulifana, apa atu dili nonkondo, mpepo nazo kutuvatera. Apa atu dili kudiva asi yisinke natu tumbura mekanderero, mpepo kutuhundilira po apa atu tugu.
27 Karunga ogu a konakona nomutjima detu, ga diva eyi azi hundilire po mpepo vapongoki, yeeyi azo kuhundira eyi ya liza nompango zendi.
28 Twa yi diva asi Karunga kuninka nayinye yi ruganene kumwe yipo va gwanene mo uwa ava va mu hara, ava yiwo ga zigidira sitambo sendi,
29 morwa kutunda ketameko, ga divire ava nga horowora yipo ga tokwere va fane Munendi yipo nga kare mbeli mokatji kovamumbya vendi wovanzi.
30 Ntani hena, age kwa zigida ava ga horowora. Ano ava ga zigida yiwo ga hungameka. Moruhura, ava ga hungameka yiwo hena ga yererepeka.
31 Yisinke natu uyunga kuhamena yininke eyi? Nsene asi Karunga kwa hama kwetu, yilye ogu natu funda?
32 Mokumona asi kapi ga ruvire Munendi nye ga mu tu pa, age nga tu pa hena yininke yapeke kumwe nage.
33 Yilye gokuvhura kupa usima ava ga horowora Karunga? Karunga yige ga va hungameka.
34 Yilye gokuvhura kutupangura? Kwato, morwa Jesus Kristusa kwa fa yiyo va mu pindura koufe, age kwa ka hingira korulyo rwaKarunga ntani kutuhundilira po.
35 Yisinke yokutugusa mo meharo lyaKristusa? Maudigu ndi ruhepo ndi mahepeko ndi nzara ndi nkagi ndi yiponga ndi matjiliso gokutudipaga?
36 Ngamoomu va yi tjanga asi: “Ose nkenye apa kuhara kutudipaga mwaroge. Vantu kututara ngwendi nonzwi vana kutwara va ka dipage.”
37 Nye mwanayinye eyi, ose kufunda mevatero lyogu ga tu hara.
38 Ame kwa yi pura nawa-nawa asi kwato yokutugusa mo meharo lyaKarunga, yi kare asi nomfa ndi eparu ndi vaengeli ndi mapangero ndi yininke yantaantani ndi yokomeho ndi vanankondo
39 ndi yekeguru ndi yokonhi ndi nkenye sinamwenyo. Yosili, kwato yokutugusa mo meharo lyaKarunga eli ga tu likida kupitira mwaJesus Kristusa, Hompa gwetu.
Nonkango dokonhi
^ Nkango zoRuhebeli ndi zoRuarameya ezi azi tanta asi: “Tate!”
