koVaroma 9:1-33
9 Ame murongwa gwaKristusa. Mpepo zokupongoka kupitisira ezwi lyange lyokomutjima, ano eyi nina kuuyunga usili. Ame kapi nina kukumbagera pokutanta asi,
2 ame kuna kulizuvha ruguwo rorunene ntani kukora kokudira kuhaga momutjima gwange.
3 Ame nina liwapaikire mokutengeka nge mevango lyokutengeka Vajuda vakwetu ava ava dili kukwama Kristusa, nsene asi kuvhura ngayi va vatere.
4 Awo Vaisraeli a va ga horowora Karunga va kare vana vendi. Karunga kwa va yererepekere noku tura po malizuvhasano nawo ntani noku va pa Veta. Awo kwa va pere mpito zokumukarera ntani kwa va pere matumbwidiro.
5 Awo kwa tunda mozinyakurwetu omu ga tunda Kristusa, va mu hampuruke ngomuntu. Karunga, mupangeli gwanayinye, va mu hamberere narunye. Amen.
6 Nye kapisi asi nonkango daKarunga kapi da sika mo. Yeeyi kapisi navenye kwa tunda mwaIsraeli.
7 Nampili ngomu va tundilira mwaAbirahamu nye Karunga kapi nga va tara asi navenye vana vaAbirahamu vene-vene, yeeyi “ruvharo* roge ngaru tundilira mwaIsaka.”
8 Eyi kutanta asi vana vaKarunga vene-vene kapisi vaava va hampurukira Abirahamu, nye vaava va wiza po kupitira metumbwidiro lyaKarunga.
9 Yeeyi Karunga kwa tumbwidilire asi: “Mvhura ozo, posiruwo ngaseesi, ngani wiza ano Sara nga kara nomuna gomumati.”
10 Etumbwidiro olyo kapi tupu va li geve kwaSara nye hena noku kwaRepeka ogu ga hampurukire vamapange ano guhyawo, Isaka, zinyakurwetu,
11 yeeyi vana owo awo noku va hampuruka si simpe ntani va hana kurugana yoyiwa ndi yoyidona, Karunga ga tokwere nare asi yilye nga horowora po. Morwa Karunga kuhoworora ogu ana hara nye kapisi kuliza noyirugana yomuntu.
12 Eyi yiyo va mu tanterere asi: “Mukurona yige nga ruganena mumbyendi.”
13 Ngamoomu va yi tjanga asi: “Jakopo yige na here ano Esau kwa mu nyengere.”
14 Eyi kutanta nye asi Karunga kapi a hungike ndi? Hawe!
15 Age kwa tanterere Mosesa asi: “Ame ngani likida nkenda kwankenye ogu ngani hara kulikida nkenda ntani ngani likida eharo kwankenye ogu ngani hara kulikida eharo.”
16 Yipo nye, kapi ya korera keharo lyomuntu ndi koyirugana yendi, nye konkenda zaKarunga.
17 Eyi yiyo lya uyungira etjangwa kuhamena Farawo asi: “Eyi yiyo na dililire kukuzonagura po yipo ni likide nonkondo dange ntani yipo edina lyange ngali divikwire po uzuni mudima.”
18 Yipo nye, age kulikida nkenda kwankenye ogu ana hara ntani kupulisira nkenye ogu ana hara kukukutika mutjima gwendi a gu kukutike.
19 Vamwe kuvhura va pure nge asi: “Morwasinke nye a paparere mapuko mwetu? Yilye gokuvhura kurwanesa mpango zendi?”
20 Nyove yilye nye gokuvhura kupangura Karunga? Sininke esi va honga kuvhura si pure muhongi gwaso asi: “Morwasinke wa hongera nge monkedi ezi ndi?”
21 Nani muhongi gerova kapi ga kara nononkondo dokuhonga sipako simwe somulyo ano simwe sokudira mulyo kerova limwe ndi?
22 Eyi ya lifana neyi ga rugana Karunga ogu ga here kulikida nonkondo dendi nehandu lyendi nye yiyo ga lididimikira yipako yehandu eyi ya fira ezonauko.
23 Age kwa yi rugene eyi mokulikida uyerere wendi wounene kwa va nga likida nkenda. Age kwa va wapaikira mokukavapa mfeto.
24 Ose nyose ava ga zigida, kapisi moVajuda tupu mwelike nye hena nava wokonomuhoko dapeke.
25 Moomu tupu ga tanta Hoseya asi: “Ava va kara asi kapisi vantu vange, ngani va tumbura asi ‘vantu vange,’ ano mukadi ogu na dilire kuhara, ngani mu tumbura asi ‘muharwa gwange,’
26 ntani mevango eli va va tanterere asi ‘one kapisi vantu vange,’ yimo ngava va tumbwira asi ‘vana vaKarunga gomunamwenyo.’”
27 Ntani hena, Jesaya kwa uyungire kuhamena Vaisraeli asi: “Nampili ngomu sivaro sovana vaIsraeli sa sika pomuheke gwefuta, wovasesu tupu ngava parura.
28 Yeeyi Jehova nga pangura uzuni ntani nga genderera kuyirugana.”
29 Ntani hena, ngamoomu ga yi pumbire Jesaya asi: “Nsene asi Jehova mupitisili govakwayita vemeguru kapi nga tu sigira po muna gumwe, ngatu kara ngwendi Sodoma noku fana ngwendi Gomora.”
30 Eyi kutanta nye asi vantu wokonomuhoko dapeke kwa likida epuro yiyo va va hungameka, nampili ngomu va dilire kurugana youhunga ndi?
31 Vaisraeli ngava kondjere veta zouhungami, nye kapi ngava zi sikisa mo.
32 Morwasinke? Morwa awo kwa gazarere asi ngava va hungameka kupitira moyirugana yawo nye kapisi mepuro. Awo kwa lipundwire “memanya lyokupundukisa,”
33 ngamoomu va yi tjanga asi: “Tareni! Ame kuna kutura moSiyoni emanya lyokupundukisa ntani lyokuhandukisa, nye nkenye ogu nga tura epuro mwalyo, kapi ngava mu fisa nomuga.”
Nonkango dokonhi
^ MoRugereka asi “mbuto.”
